A Lele I Jeremaia 5 - AI VOLA TABU（FIJ1864）

Sa tukuna ko Saioni na ka ca sa yacovi koya, a sa masumasu vua na Kalou, 1-22.

1NANUMA, Jiova, na ka sa yacovi keimami: vakasama, ka raica na keimami veivakalialiai.

2A neimami vanua, sa vukici me nodra na kai tani; a neimami veivale, me nodra na vulagi.

3Keimami sa luveniyali ka tawa vakatamani, sa vaka na alewa dawai na tina i keimami.

4A meimami wai, ni sa voli e nai lavo keimami sa qai gunuva; a neimami buka, sa volitaki mai vei keimami.

5Sa bitaki na domo i keimami: keimami sa oca, sa sega na neimami vakacegu.

6Ia vei ira na kai Ijipita keimami sa solia na liga i keimami, vei ira talega na kai Asiria, me keimami mamau e na madrai.

7A tama i keimami, era sai valavala ca; a ra sa sega; ia koi keimami, sa nodra caka cala keimami sa colata.

8O ira na tamata wale, era sa veitaliataki keimami: sa sega e vakabulai keimami mai na ligadra.

9Keimami mate a qai rawa kina na keimami kakana, e na vuku ni seleiwau mai veikau.

10Na kuli i keimami, sa loaloa mai me vaka na lovo, e na vuku ni sa ka rerevaki na dausiga.

11Na alewa ni Saioni, era sa yarataki ira; kei ira na gonealewa e na veikoro vakabita.

12O ira na turaga, era sa rube e ligadra: a matadra na qase, sa sega ni dokai.

13O ira na cauravou, era kauta me qaqi sila; kei ira na gone, ni ra cola buka era sa bale.

140 ira na qase, era sa cegu ni tiko mai na matamata-ni-koro; o ira na cauravou, era sa cegu ni qiri lali tiko.

15Sa mudu na marau ni loma i keimami; sa vuki me tagi na neimami meke.

16Sa lutu tani nai sala mai na ulu i keimami: ule koi keimami o qo, ni keimami sai valavala ca!

17E na vuku ni ka o qo sa bibi kina na loma i keimami; e na vuku ni ka o qo sa butobuto kina na mata i keimami.

18E na vuku ni ulu-ni-vanua ko Saioni, ni sa lala, sai ira na fokise sa lako voli e delana.

19Sai iko, Jiova, sa tiko ga ka tawa mudu; kei na nomui tikotiko vakaturaga mai nai tabatamata e dua ki nai tabatamata e dua.

20A kawa ni cava ko sa guilecavi keimami kina ka tawa mudu, ka sa vakalaivi keimami me vakadede sara?

21Mo saumaki keimami vei iko, Jiova, keimami na qai saumaki mai; vakayacora tale na neimami tiko me vaka eliu.

22Ni ko sa biuti keimami vakaidina sara; ko sa cudruvi keimami vakalevu.