1SAI au na tamata sa kune ka rarawa e na kuita ni nona cudru.
2Sai au sa tubera ko koya, ka kauta ki na butobuto, ka sega ki na rarama.
3Sai au dina sa vuki tani mai kina ko koya; sa vagolea mai na ligana e na siga ka bogi.
4Sa vakavucataka ko koya na lewequ kei na kuliqu; sa musuka na suiqu.
5Sa viria na kequ bai, ka vakavolivoliti au e na ka gaga kei na oca.
6E na veitikina butobuto sa vakatikori au kina ko koya, meʼu vakataki ira sa mate makawa.
7Sa viribaiti au ko koya, meʼu sega ni lako tani rawa: sa vakabibitaka na kequ sinucodo.
8Io niʼu sa tagi ka qoqolou, sa sogota tani na noqu masumasu.
9Sa vakalatia na noqu sala e na vatu sa ta; a noqui lakolako sa vakavevetaka ko koya.
10 Sa vaka na pera, sa lawavaki au ko koya, ka vaka na laioni e na yasana vuni.
11A noqui lakolako sa vukica ko koya, a sa dresudresuki au: sa cakavi au meʼu luveniyali.
12Sa loqata ko koya na nona dakai, a sa vakaturi au meʼu nona ka me vanataka kina na gasau.
13Sa vakacoba ki na noqui ivi na gasau ni nona taga gasau.
14Au a nodra ka dredrevaki na kai noqu kecega; na nodra ka era meketaka e na siga ka bogi.
15Sa vakamamautaki au ko koya e na duva gaga, sa vakamatenitaki au e na wai gaga sara.
16Sa vorota talega e na laqere na batiqu, sa buluti au e na dravusa.
17Ia ko sa biuta vakayawa tani na sautu mai na yaloqu: au sa guilecava na vinaka.
18Ia kaʼu a kaya, Sa takali na noqu kaukauwa kei na ka kaʼu namaka maivei Jiova.
19Mo nanuma na noqu rarawa kei na noqu tiko sese, na duva gaga kei na wai gaga.
20Sa daunanuma tiko kina, ka sa malumalumu e lomaqu na yaloqu.
21A ka o qo kaʼu sa vakananuma e lomaqu, o koya o qo kaʼu sa namaka kina na vinaka.
22A loloma ga i Jiova eda sa sega ni oti kina, e na vuku ni sa tawa di rawa na nona yalololoma.
23Sa vou tu e na vei-mataka, sa ka levu na nomu yalodina.
24Sa noqui votavota ko Jiova, sa kaya na yaloqu, o koya o qo kaʼu na namaki koya kina.
25Sa yalovinaka ko Jiova vei ira sa waraki koya, ki na yalo sa qaravi koya.
26Sa kili kaya na tamata me namaka, me waraka vakayalomatua talega na veivakabulai maivei Jiova.
27Sa kili kaya na tamata me colata nai vua ni sa cauravou tiko ko koya.
28Me sa tiko duadua ko koya ka galu toka, e na vuku ni sa virikotora vua ko Koya:
29me vunia na gusuna e na qele; de dua beka na ka me vakanananu kina:
30me vagolea na baluna vua sa yaviti koya: me sa mamau sara ko koya e na veivakalialiai.
31Ni sa sega ni biuta ko koya na Turaga me tawa mudu:
32ia ke sa ia na veivakararawataki ko koya, ke na ia talega na loloma me vaka na kena levu ni nona yalololoma.
33Ni sa sega ni vu mai lomana ni sa yavita, ni sa vakararawataka na lomadra na luve ni tamata.
34Na buturaki ira kece e ruku ni yavana era vesuki e vuravura,
35na lewai koya vakatani na tamata e nona ka sa dodonu, e na mata i Koya sa Cecere sara,
36na vakaucacataka na tamata ni sa lewai, sa sega ni vinakata na ka o qori na Turaga.
37O cei ko koya sa vosa, ka mana na nona vosa, ni sai koya na Turaga sa sega ni vakarota?
38Mai na gusu i Koya sa Cecere sara, sa sega beka ni lako tani maikina na ca kei na vinaka?
39A cava sa didi kina e dua na tamata sa bula, e dua na tamata sa cudruvi e na vuku ni nonai valavala ca?
40Me da vakasaqara na nodai valavala, ka vakataroga, ka lesu tale vei Jiova.
41Me da laveta vata na lomada kei na ligada ki na Kalou mai lomalagi.
42Oi keimami, keimami a talaidredre ka yalovakatani: o iko, ko a sega ni ia na veivakadonui.
43O sa tabonaka e na cudru, ka sa vakasavi keimami: o sa ia na veivakamatei, ka sega ni yalololoma.
44O sa tabonaki iko e na o, me kakua ni basika yani na neimami masu.
45Mei soqosoqo ga ka benu ko sa cakavi keimami e na kedra maliwa na veimataqali.
46Era sa dalaga na gusudra vei keimami na neimami meca kecega.
47A rere kei nai cori sa yacovi keimami; na veivakalalataki kei na veivakarusai.
48A uciwai levu, sa dave tu mai mataqu e na vuku ni kena rusa na gonealewa ni kai noqu.
49A wai ni mataqu, sa tiri sobu tiko, ka sega ni mudu, sa tawa cegu vakalailai,
50ka me rai sobu mada mai ko Jiova, ka raica mai lomalagi.
51Sa mataqu sa yavalata na lomaqu e na vukudra kecega na gonealewa ni noqu koro.
52Era vakasavi au sara na noqu meca, me vaka na manumanu, ka sega na vuna.
53Era sa muduka tani e nai keli na noqu bula, ka viritaka mai na vatu vei au.
54Sa drodrova na uluqu na wai; au a qai kaya, Au sa muduki laivi.
55Au a kaciva na yacamu, Jiova, mai nai keli titobu.
56A domoqu ko a rogoca: kakua ni tabonaka na daligamu ki na noqu cegu, ki na noqu tagi.
57O sa toro voleka mai e na siga kaʼu a kacivi iko kina: o sa kaya, Mo kakua ni rere.
58O sa ia na veilewai, Turaga, e na vuku ni yaloqu; o sa vakabulai au.
59O sa raica, Jiova, na noqu vakacacani: mo ia na veilewai e na vukuqu.
60O sa raica kecega na nodra cudru, na nodra vere kecega era bukia vei au.
61O sa rogoca na nodra veivakalialiai, Jiova, na nodra vere kecega era bukia vei au;
62na tebenigusudra era tu cake me bolei au, kei na nodra bosei au tiko e na siga ka bogi.
63A nodra tiko sobu kei na nodra tu cake, mo vakaraica matua; sai au ga era meketaka.
64O na ia na veisaumi vei ira, Jiova, me vaka na cakacaka ni ligadra.
65O na soli ira me kaukauwa na lomadra, na nomu cudruvi ira.
66O na vakasavi ira e na nomu cudru, ka vakarusai ira tani mai na ruku ni lomalagi, Jiova.
Who We AreWhat We EelieveWhat We Do
2025 by iamachristian.org,Inc All rights reserved.
