1NA nona tabonaka e na o na gonealewa ni Saioni e na nona cudru na Turaga, sa biuta sobu mai lomalagi ki vuravura na nodrai ukuuku na Isireli, a sa tawa nanuma nai tutu-ni-yavana e na siga ni nona cudru!
2Sa tiloma kecega ko koya na Turaga, ka tawa lomana, na nodrai tikotiko na Jekope: sa talaraka sobu ko koya e nona cudru na bai ni valu ni gonealewa ni Juta; sa biuta sobu ki na qele: sa vakacacana na matanitu kei ira na kena turaga.
3Sa muduka laivi sara ko koya e nona cudru waqawaqa na nodra kaukamea na Isireli: a ra sa vakasuka na ligadra i matau mai na mata ni meca, a sa waqa na nona cudru vei ira na Jekope me vaka na buka caucaudre, sa katikati voli.
4Sa loqata ko koya na nona dakai me vaka e dua na meca: sa tu mai ko koya ka sa dodo tu na ligana i matau me vaka e dua na dauvakacaca, a sa vakamatea kece na ka matalau e nona vale malo na gonealewa ni Saioni: sa sovaraka, me vaka na buka, na nona cudru,
5Sa vaka na meca na Turaga: sa tilomi ira oti na Isireli, sa tiloma kecega ko koya na nona vale vakaturaga na gonealewa ni Saioni: sa vakarusa na nodra bai ni valu kecega, a sa vakalevutaka vua na gonealewa ni Juta na lomabibi kei na tagi yaso.
6A sa vakacacana, me vaka ni sa dua na were, na nona vale malo: sa vakarusa na nona vale ni soqosoqo tabu: sa cakava ko Jiova na solevu kei na siga tabu me guilecavi mai Saioni, ia ni sa katakata sara na nona cudru, sa beci rau na tui kei na bete.
7Sa biuta na Turaga na nonai cabocabo-ni-soro, sa cata na nona vale tabu, sa solia ki na liga ni meca na bai ni kena veivale vakaturaga; a domodra, era sa tabalaka e na vale i Jiova, me vaka e na siga ni solevu tabu.
8Sa nakita ko Jiova me vakarusa na nona bai na gonealewa ni Saioni; sa dreta na kena dali i vakarau, sa tawa vakasuka tani ko koya na ligana mai na veivakarusai: ia sa cakava nai keli kei na bai me tagi, sa ceguoca vata.
9Sa lutu dromu ki na qele nai sogo ni nona matamata-ni-koro; sa vakacataka ka musuka na kenai vakadei: a kena tui kei ira na kena turaga, era sa tiko ga e na veivanua: a vunau, sa sega; o ira talega na nona parofita, era sa sega ni kunea e dua na raivotu maivei Jiova.
10Era sa tiko e na qele, era sa galu toka na qase kei koya na gonealewa ni Saioni: era sa kabua na uludra e na kuvu-ni-soso; era sa vauci ira e nai sulu taqarotu: era sa vakacuva na uludra ki na qele ko ira na gonealewa ni Jerusalemi.
11Sa malumalumu na mataqu ni sa wai, sa rise na bati ni ketequ, sa sova ki na qele na yatequ, e na vuku ni nona rusa na gonealewa ni kai noqu; ni ra sa matabuto mai e na sala ni koro ko ira na gone lalai kei na gone sa sucu tiko.
12Vei ira na tinadra era sa kaya, Sa evei na sila kei na waini? ni ra sa matabuto mai me vaka e dua sa vuetaki e na sala ni koro, ni sa sova yani na nodra bula ki na lomasere i tinadra.
13A cava meʼu tukuna vei iko? a cava meʼu vakatautauvatataki iko kina, na gonealewa ni Jerusalemi? a cava meʼu vakarauvatana kei iko, meʼu vakacegui iko, na gonealewa na luve ni Saioni? ni sa levu me vaka na ualuvu na nomu vakacacani: o cei me na vakabulai iko?
14A nomu parofita, era sa raica na ka lasu ka sesewa me nomu: a ra sa sega ni vakarairaitaka na nomu caka cala, me ra saumaka tani kina na kemu veivakabobulataki; era sa raica nai colacola vakailasu ga me nomu me sa vuna ni nomu vakasevi.
15Era cobo ni ra rekitaka na kemu ca ko ira kece era sa lako voli yani; era sa vakasiusiu ka kurea na uludra vua na gonealewa ni Jerusalemi, ka vaka, Sa koro beka o qo era vakatoka me Lagilagi sara, Na nodra marau na kai vuravura kece?
16Era sa dalaga na gusudra vei iko ko ira kece na nomu meca: era sa vakasiusiu ka katia na batidra: era kaya, Eda sa tiloma sara: e dina ni sa siga ga o qo eda a namaka tiko; eda sa kunea, eda sa raica.
17Sa cakava ko Jiova na ka sa bukia; sa vakayacora na nona vosa ka rotaka e na gauna eliu: sa talaraka sobu, ka sega ni lomana: a sa cakava na meca me marautaka na kemu ca, sa laveta kicake ko koya na nodra kaukamea era vakacacani iko.
18Sa tagi na lomadra vua na Turaga, ka kaya, O iko na bai ni gonealewa ni Saioni, me dave sobu, me vaka na uciwai, na wai ni matamu e na siga kei na bogi: mo kakua ni cegu; me kakua ni vakacegu na loa ni matamu.
19Tu cake, mo tagi qoqolou e na bogi: ni sa vakatekivu na veivuke yadra e na bogi, mo qai sovaraka na lomamu, me vaka na wai, e na mata ni Turaga: laveta cake vua na ligamu me ra bula na luvemu lalai, era mate e na viakana e na mua ni sala ni koro kecega.
20Mo raica, Jiova, ka nanuma se vei cei ko sa cakava kina na ka o qo. Me ra kania li na alewa na luvedra, na gone era caga e dua bau? me vakamatei li e na vale tabu ni Turaga koi rau na bete kei na parofita?
21Era davo tu yani e na qele e na sala ni koro ko ira na gone kei na qase: o ira na noqu gonealewa kei na noqu cauravou, era sa bale e nai seleiwau; o sa vakamatei ira e na siga ni nomu cudru; o sa vakamatea, ka sega ni lomana.
22O sa kaci yani, me vaka sa siga ni solevu tabu, me mai vakavolivoliti au na veika kaʼu sa rerevaka, a sa sega kina e na siga ni cudru i Jiova e dua sa dro bula se vo: o ira kaʼu sa viviraka vei ira nai sulu ka susuga, sa vakawabokotaki ira ko koya na noqu meca.
Who We AreWhat We EelieveWhat We Do
2025 by iamachristian.org,Inc All rights reserved.
