Ai Vola I Jeremaia Na Parofita 52 - AI VOLA TABU（FIJ1864）

O Sitikiya, sa tawa vakarorogo vei tui Papiloni, 1-3. Sa kabai ko Jerusalemi, ka rawa; sa moku ko iratou na luvena tagane ko Sitikiya, a sa vakamatabokotaki ko koya, 4-11. O Nipusaretani, sa vakama ka vakacacana na koro, 12-23, a sa kauti ira ki Papiloni era bobulataki, 24-30. Sa yalovinaka tale ko Ivili-mirotaki vei Jioiakini, 31-34.

1SA ruasagavulu ka dua na yabaki i Sitikiya ni sa buli ko koya me tui, a sa tini ka dua na nona yabaki ni sa lewa tiko mai Jerusalemi. Ia na yaca i tinana ko Emutali, na luve i Jeremaia na kai Lipina.

2A sa caka ca ko koya e na mata i Jiova, me vaka na ka kecega sa cakava ko Jioiakimi.

3Ia ni sa cudru ko Jiova sa vaka tu o qo mai Jerusalemi kei Juta, ka yacova na gauna sa biuti ira tani kina e matana, ia sa talaidredre tiko ko Sitikiya vua na tui Papiloni.

4A sa yaco e nai kaciwa ni yabaki ni nona lewa, e nai katini ni vula, e nai katini ni siga ni vula, sa lako mai ko Nipukatiresari na tui Papiloni, o koya kei na nonai valu kecega, ki Jerusalemi, a ra mai tiko kina me kaba, a ra tara na kena vale-kau vakaivalu me vakavolivolita.

5A sa buku na druadrua ni koro ka yacova nai katini kadua ni yabaki i Sitikiya.

6Ia e nai kava ni vula, e nai kaciva ni siga ni vula, sa levu sara na viakana e na koro, a sa sega na kedra madrai na lewe ni vanua.

7Sa qai basuki na koro, ia ko ira kece na tamatai valu era sa dro, ka lako tani mai na koro kei na bogi e na sala mai na matamata-ni-koro e na tadrua ni bai o rua, mai nona were na tui; (ia ko ira na kai Kalitea, era sa tiko vakavolivolita na koro:) a ra sa muria na sala kivakaki na buca.

8Ia na nodrai valu na kai Kalitea era sa cicimuri koya na tui, ka vauci Sitikiya e na buca mai Jeriko; a ra veiseyaki tani vua na nonai valu kecega.

9A ra sa taura na tui, ka kauti koya cake vei tui Papiloni ki Ripila e na vanua ko Emaci; a sa lewai koya maikea ko koya.

10Ia ko tui Papiloni, sa vakamatei iratou na luve i Sitikiya e matana: o ira kece talega na turaga ni Juta sa vakamatea ko koya mai Ripila.

11Ia na mata i Sitikiya sa leuta ko koya; ia ko tui Papiloni sa vesuki koya e na sinucodo, ka kauti koya ki Papiloni, ka vakacurumi koya ki na vale ni veivesu ka yacova na siga ni nona mate.

12Ia e nai kalima ni vula, e nai katini ni siga ni vula, a ya nai katinikaciwa ni yabaki ni lewa i Nipukatiresari na tui Papiloni, sa qai lako mai ko Nipusaretani, na turaga ni valu ei vakatawa, sa qaravi tui Papiloni, ki Jerusalemi,

13a sa vakama na vale i Jiova, kei na vale ni tui; ia na vale kece mai Jerusalemi, kei na nodra vale kece na turaga, sa vakama ko koya o na buka:

14ia na nodrai valu kece na kai Kalitea, era tiko kaya na turaga ni valu ei vakatawa, era sa basuka sobu na bai ni Jerusalemi kecega e na veiyasana.

15Ia e so na tamata kaisi, kei na vo ni tamata era vakavoci e na koro, kei ira sa vuki, era vuki ki tui Papiloni, kei na kena vo ni lewe vuqa, sa kauti ira vakabobula ko Nipusaretani na turaga ni valu ei vakatawa.

16Ia e so na kaisi ni vanua sa vakavoca ga ko Nipusaretani na turaga ni valu ei vakatawa, me ra daucaka vaini ka daucaka were.

17Ia na duru parasa ka tu e na vale i Jiova, kei nai tutu kei na Wasawasa parasa sa tu e na vale i Jiova, sa vorota ga ko ira na kai Kalitea, ka kauta na kena parasa kecega ki Papiloni.

18Ia na kuro, kei nai sivi, kei nai koti ni cina, kei na sedre, kei nai taki, kei nai yaya parasa kecega, era sa daucakacaka kina, era sa kauta tani talega.

19Ia na bilo, kei na sedre ni dravu, kei na dari, kei na kuro, kei nai tutu-ni-cina, kei nai taki, kei na bilo; na ka koula na kena koula, kei na ka siliva na kena siliva, sa kauta tani ko koya na turaga ni valu ei vakatawa.

20A duru e rua, e dua na Wasawasa, ka tinikarua na karavau parasa sa toka e na vu ni tutuna, a ya ka cakava ko Solomoni e na vale i Jiova: ia na kena bibi ni parasa ni yaya kece o qo sa tawa kilai.

21Ia na duru, sa caga tolusagavulu ka ono na kena cecere e dua na duru; ia na wa caga ruasagavulu ka va sa kenai lako; ka caga dua na kena vavaku: a sa vakalomalomana.

22A sa dua na domodomo parasa e delana; ia na kena balavu e dua na domodomo sa caga tini, a sa vaka na lawa kei na vua ni karaniti sa ceuti vakavolivoliti, ia sa parasa wale kecega o qo. A sa vaka talega kina nai karua ni duru kei na kena vua ni karaniti.

23Ia na vua ni karaniti e na matana e va sa ciwasagavulu ka ono; na vua ni karaniti kecega e volita na daku ni lawa sa dua na drau.

24Ia na turaga ni valu ei vakatawa sa kauti Siraya na bete levu, kei Sifaniya nai karua ni bete, kei iratou nai vakatawa ni katuba e lewe tolu:

25ia mai na koro, sa kauta tani ko koya e dua na matanivanua sa lesi me vakaraici ira na tamatai valu; kei na tamata e lewe vitu vei ira nai tokani ni tui, eratou sa kune e na koro; kei na turaga sa dauvola ka ni valu, ka dauvakasoqona na lewe ni vanua; kei na tamata e lewe onosagavulu vei ira na lewe ni vanua, era kune e na loma ni koro.

26Ia ko ira o qo, sa kauta ko Nipusaretani na turaga ni valu ei vakatawa, a sa kauti ira kivei tui Papiloni ki Ripila.

27A sa yaviti ira ko tui Papiloni, ka vakamatei ira mai Ripila e na vanua ko Emaci. Sa kauti tani vakaoqo ko irana Juta mai na nodra vanua.

28Sa vakaoqo na tamata sa kauta vakabobula tani ko Nipukatiresari: e nai kavitu ni yabaki, na kai Jutia e lewe tolu na udolu ka ruasagavulu ka tolu:

29e nai katinikawalu ni yabaki i Nipukatiresari, sa kauta tani mai Jerusalemi ko koya e lewe walu na drau ka tolusagavulu ka rua:

30e nai karuasagavulu ka tolu ni yabaki i Nipukatiresari, sa kauta tani ko Nipusaretani na turaga ni valu ei vakatawa e lewe vitu na drau ka vasagavulu ka lima vei ira na kai Jutia: o ira na tamata kecega era lewe va na udolu ka ono na drau.

31A sa yaco e nai katolusagavulu ka vitu ni yabaki ni sa vakabobulataki ko Jioiakini na tui Juta, e nai katinikarua ni vula, e nai karuasagavulu ka lima ni siga ni vula, sa qai vueti Jioiakini na tui Juta ko Ivili-mirotaki na tui Papiloni, ka kauti koya mai na vale ni veivesu:

32a sa vosa vinaka vua, ka vakatikora na nonai tikotiko me liu e na nodrai tikotiko na tui era tiko kaya mai Papiloni,

33a sa vakaisosomitaka na nonai sulu ni vale ni veivesu: a sa kana, madrai e matana e na veisiga kece ni nona bula.

34Ia na kena kakana, sa dua na kenai votavota e na veisiga sa solia ko tui Papiloni, e dua na kenai votavota e na veisiga kece ka yacova na siga sa mate kina, io e na veisiga kecega ni nona bula.