Ai Vola I Jeremaia Na Parofita 47 - AI VOLA TABU（FIJ1864）

A nodra vakacacani na kai Filisitia, 1-7.

1SAI koya o qo na vosa i Jiova vei Jeremaia na parofita na kedra na kai Filisitia, a sa yaco mai eliu a sa yaviti Kesa emuri ko Fero.

2Sa vosa vakaoqo ko Jiova;

Raica, na wai sa tubu cake mai na mata ni tokalau, ia ena dobui luvu, ena luvuca na vanua, kei na ka kecega sa tu kina; na koro, kei ira sa tiko kina: era na qai tagi na tamata, ka qoqolou kecega na lewe ni vanua.

3E na vuku ni domo ni butubutu ni yavadra na nona ose kaukauwa, kei na rorogo ni nona vale-vodoki, kei na kurukuru ni yava ni nona vale-vodoki, era na sega ni rai kimuri na qase ki na luvedra ni sa wadamele na ligadra;

4e na vuku ni siga sa yaco mai me vakacacani ira kece kina na kai Filisitia, ka muduka tani mai Teiri kei Saitoni nai vukevuke kecega sa vo: ni na vakacacana ko Jiova na kai Filisitia, na kedra vo ni vanua ko Kafitori.

5Sa yaco ko Kesa me drika; sa muduki laivi ko Esikiloni kei ira sa vo e na nodra buca: me bogi vica mada mo tavai iko tiko?

6O iko nai seleiwau i Jiova, me bogi vica mada mo qai vakacegu? darama na nomu taga, mo rere, ka tiko lo.

7Me vakacegu vakaevei, ni sai Jiova sa vakarota vua me ia kei Esikiloni, kei na baravi? sa kikea sa lesia ko koya.