1A KENA ko Moapi, sa vosa vakaoqo ko Jiova ni lewe vuqa, na Kalou nei Isireli; Ena ca ko Nipo! ni sa vakacacani: sa madua ko Kiriyaceimi ka kabai: sa madua ko Misikapi ka waicala.
2Ena sega tale ni vakacaucautaki Esiponi ko Moapi: era sa bukia vua na ka ca, ka kaya, Me da mai laʼki muduka tani me kakua ni matanitu. O iko talega, Matimeni, ko na vagalui; ena cicimuri iko nai seleiwau.
3A domo ni tagi sa rogo mai Oroneimi, na veivakacacani kei na rusa levu.
4Sa rusa ko Moapi; era sa vakarogotaka yani na tagi na nona gone lalai.
5Ia ni sa lako cake ki Luici sa lako cake tiko na tagi levu; ni sa lako sobu ki Oroneimi ko ira na meca, sa dua na tagi ni veivakarusai era sa rogoca.
6Dou dro, drotaka na nomudou bula, mo dou vaka na kau vuca mai veikau.
7E na vuku ni nomu vakararavi e na nomu cakacaka kei na nomui yau, sai iko talega ko na bobulataki: ena lako tani yani ko Kimosi ni sa bobulataki, ko ira vata na nona bete kei ira na nona turaga.
8Ia ena yaco na dauvakacaca ki na veikoro kecega, ena sega na koro e bula: ena ca talega na buca ka rusa na cecelevu, me vakai koya sa kaya ko Jiova.
9Soli taba vei Moapi me vuka sara tani yani: ia na kena veikoro, sa lala, me sega e tiko kina.
10Me vosacati ko koya sa cakava na cakacaka i Jiova me vakailasu, ia me vosacati ko koya sa tarova na nonai seleiwau mai na dra.
11Sa dautiko vakacegu ko Moapi mai na gauna sa gone kina, a sa dautiko wale e na kena soko, a sa sega ni veisovayaki mai na saqa ki na saqa, ia e na veivakabobulataki e sa sega ni lako tani yani kina: o koya o qo sa tiko ga vua na kena velavela, ia na kenai boiboi sa sega ni dua tani mai.
12O koya o qo raica, ena yaco na gauna, sa kaya ko Jiova, kaʼu na talai ira kina vua na daulako sese voli era na vakasesei koya, ia na nona saqa era na sovadiva, kei na nodra tavaya era na vorolaka.
13Ia ena maduataki Kimosi ko Moapi, me vaka na mataqali nei Isireli ni sa maduataki Peceli era a vakararavi kina.
14Dou sa kaya vakacava, Sa kaukauwa koi keimami ka tamata qaqa e nai valu?
15Sa vakacacani ko Moapi, ia na nona Veikoro sa lako cake tani maikina, ia ko ira na nona cauravou digitaki era sa lako sobu me vakamatei, sa kaya na Tui, ko Jiova ni lewe vuqa na yacana.
16Na ka rarawa kei Moapi sa toro voleka mai, ia na kena ca sa kusarawa sara mai.
17Dou yasovaki koya, oi kemudou kece sa tiko vakavolivoliti koya; kei kemudou kece sa kila na yacana, dou kaya, Na kena ramusu nai titoko kaukauwa, nai titoko vakaiukuuku!
18Mo lako sobu mai na nomu lagilagi, ka tiko sobu ni ko sa viagunu, o iko na gonealewa sa tiko mai Tiponi; ni sai koya sa vakacacani Moapi ena lako cake mai vei iko, ena vakarusa ko koya na nomu bai kaukauwa.
19Mo tutu ga e na sala, ka vakararai tu, o iko na kai Aroeri; tarogi koya na tagane sa dro mai, kei koya na alewa sa se mai, mo kaya, A cava na ka sa yaco?
20Sa madua ko Moapi; ni sa basuki sobu: qoqolou ka tagi; tukuna yani ki Erinoni, ni sa vakacacani ko Moapi,
21ia na ka ka lewai sa yacova na vanua bucabuca; kei Oloni, kei Yasa, kei Mefeaci,
22kei Tiponi, kei Nipo, kei Peci-tipilacaimi,
23kei Kiriaceimi, kei Peci-kamuli, kei Peci-mioni,
24kei Kirioci, kei Posira, kei na Veikoro kece ni vanua vaka-Moapi, se vakayawa se voleka.
25Sa tamusuki na kaukamea ni Moapi, ia na ligana sa ramusu, sa kaya ko Jiova.
26Dou vakamatenitaki koya: ni sai Jiova ka vakalevulevui koya kina, ia ena qiqi tu ko Moapi e na nona lua, ia ena dredrevaki talega ko koya.
27Ia ko a daudredrevaki Isireli, se segai? se kei ira na daubutako ka kune beka kina ko koya? ni sa kawa ni nomu vosataki koya, ko sa ladelade kina.
28Dou laiva na Veikoro, ka laʼki tiko ga ki na uluvatu, oi kemudou sa tiko mai Moapi, ia mo dou vaka ga na ruve sa cakava na nona sova e na bati ni gusu ni qara.
29Eda sa rogoca na viavialevu i Moapi, (sa viavialevu sara) na nona lagilagi, kei na nona viaviaturaga, kei na nona viavia-qaqa, kei na nona yaloqaciqacia.
30Oi au kaʼu sa kila, sa kaya ko Jiova, na nona cudru levu; ia ena tawa yaco ga; a nona dauvosa, ena sega so na ka e rawa kina.
31O koya o qo e na vuku i Moapi kaʼu na qoqolou kina, ia e na vuku i Moapi kece kaʼu na tagi ga kina; e na vukudra na kai Kiri-erese ena vutugu kina na yaloqu.
32E na tagi vaka-Yaseri kaʼu na tagicaki iko kina, o iko na vaini ni Sipima: a kemu kasa sa salava na wasawasa, ka yacova sara na wasa vaka-Yaseri: a nomu vuata matua kei na vua ni nomu vaini sa tokia ko koya na dauvakacaca.
33A sa kauti tani na marau kei na rereki mai na were vakalewe, kei na vanua vaka-Moapi; ia na waini e nai keli-ni-waini kaʼu sa vakaotia: ena sega e kaikaila ni sa sikaraka; ni sa kaila, sa sega ni kaila tawa.
34Sa ia na tagi mai Esiponi, a sa yacovi Elale kei Yeasi na nodra tabalaka na domodra, a sa ia mai Soeri, a sa yacovi Oroneimi, me vaka na luve ni karavau sa tolu na kena yabaki: ni sa wai talega mai Nimirimi ena biu laivi yani.
35Ia kaʼu na muduki koya tani talega mai Moapi, sa kaya ko Jiova, e sa dausoro e na veiyasana cecere, ka vakacaudreva nai madrali boi vinaka vei ira na nona kalou.
36Ia na lomaqu vei Moapi ena rorogo me vaka na bitu, kei na lomaqu vei ira na kai Kiri-erese ena rorogo me vaka na bitu: e na vuku ni ka levu sa rawata ni sa yali ga.
37Ia na uludra kece, ena drika ga; kei na kumidra kece, ena koti ga; e ligadra kece, ena tu na tava; kei nai sulu taqarotu e tolodra.
38E dela ni veivale kece ni Moapi, e na kenai saqata ni koro talega, ena dua vata kina na tagi yaso: niʼu sa vorolaki Moapi me vaka na bilo sa tawa vinakati, sa kaya ko Jiova.
39Na kena ramusu! era na qolouvaka; na nona vuki vakanadaku ko Moapi, ni sa madua! ia ena yaco ko Moapi me ka e dredrevaki ka taqayataki vei ira kece era tiko vakavolivoliti koya.
40Ni sa vosa vakaoqo ko Jiova; Raica, me vaka na ikeli, ena vuka mai ko koya ka vakate tabana mai ki Moapi.
41Sa kabai na Veikoro, ia na bai ni valu kaukauwa sa rawa sara, ia na yalodra na qaqa ni Moapi e na siga ko ya ena vaka na yalo ni alewa sa taratara.
42Ia ena rusa ko Moapi me kakua ni matanitu, ni sai Jiova sa vakalevui koya kina.
43A ka rerevaki, kei nai keli, kei na tudai, ena yadravi iko na kai Moapi, sa kaya ko Jiova.
44O koya sa drotaka na ka rerevaki, ena lutu ki nai keli; o koya sa cabe mai nai keli, ena coriti e nai cori: niʼu na vakayacora vei koya, io vei Moapi, na yabaki ni nodra cudruvi, sa kaya ko Jiova.
45O ira era dro era sa mai tu ga e ruku ni yaloyalo i Esiponi ni sa kaukauwa: ia na buka ena lako tani mai Esiponi, kei na yameyame ni buka mai na loma ni koro ko Sioni, ka kania nai yalayala kei Moapi, kei na buradeladra na gone dauue.
46Ule ko iko, Moapi! sa ra rusa na tamata i Kimosi: ni ra sa tauri na luvemu tagane me bobula, kei ira na luvemu alewa talega, me bobula.
47Ia e na gauna maimuri kaʼu na kauti ira tale mai na luve i Moapi era vakabobulataki, sa kaya ko Jiova. Sa tini na veilewai kei Moapi.
Who We AreWhat We EelieveWhat We Do
2025 by iamachristian.org,Inc All rights reserved.
