Ai Vola I Jeremaia Na Parofita 38 - AI VOLA TABU（FIJ1864）

O Jeremaia, ni sa beitaki koya vakailasu ko Malikiya, sa tukuci sobu ki nai keli, 1-6. O Epeti-meleki sa masulaki koya vua na tui, a sa vosa kina ko koya me vueti cake mai nai keli, 7-13. Ni rau sa veivosaki vakavuni kei na tui, sa vakavulici koya ko Jeremaia me soro, me bula kina, 14-23. Sa vakaroti Jeremaia me kakua ni tukuna na nodrau veivosaki, 24-28.

1IA ko Sifatiya na luve i Matani, kei Kitaliya na luve i Pasuri, kei Yukali na luve i Selemiya, kei Pasuri na luve i Malikiya, eratou sa rogoca na vosa sa tukuna ko Jeremaia vei ira kece na tamata, ka vaka,

2Sa vosa vakaoqo ko Jiova,

0koya sa tiko e na koro o qo ena mate ga e nai seleiwau, kei na viakana, kei na mate dauveitauvi: ia ko koya sa lako yani vei ira na kai Kalitea ena bula; ia na nona bula ena nonai toki ni valu, ena bula ga ko koya.

3Sa vosa vakaoqo ko Jiova, Ena soli vakaidina na koro o qo ki na liga ni valu i tui Papiloni, era na rawa ga.

4A ra sa kaya na turaga vua na tui, Me vakamatei mada na tamata o qo: ni sa vakamalumalumutaka vakaoqo ko koya na ligadra na tamatai valu era sa vo e na koro o qo, kei na ligadra na tamata kecega, ni sa cavuta vei ira na vosa vakaoqo: ni sa tamata o qo sa tawa qara na nodra vinaka na lewe ni vanua o qo, na nodra ca ga.

5A sa kaya ko Sitikiya na tui, Raica, sa tiko e na ligamudou ko koya: ni sa sega ni koya na tui sa cakava rawa e dua na ka vei kemudou.

6Era sa qai kauti Jeremaia, ka biuta ki na vale ni keli nei Malikiya na luve i Ameleki a ya mai na lomanibai ni vale ni veivesu: a ra sa tukuci Jeremaia sobu e na dali. Ia e nai keli sa sega kina na wai, na oruoru ga: a sa sikalutu ko Jeremaia ki na oruoru.

7Ia ni sa rogoca ko Epeti-meleki na kai Kusi, e dua vei ira na mata e na vale ni tui, ni ra sa tukuci Jeremaia ki nai keli; ia na tui sa tiko ga e na matamata-ni-koro i Penijamini;

8a sa lako yani ko Epeti-meleki mai na vale ni tui, ka vosa vua na tui, ka kaya,

9Noqu turaga na tui, sa caka ca ko ira na tamata o qo e na ka kece era sa cakava vei Jeremaia na parofita, o koya era sa biuta ki nai keli; ena sa mate ga maikea e na viakana: ni sa sega na madrai e na koro.

10Sa qai vosa na tui vei Epeti-meleki na kai Kusi, ka kaya, Mo kauti ira na tamata eke e lewe tolusagavulu, mo dou laʼki vueti Jeremaia na parofita mai nai keli, ni sa sega ni mate sara.

11A sa kauti ira kaya na tamata ko Epeti-meleki, a sa curu ki na vale ni tui ki ruku ni tutu-ni-yau, ka kauta maikina nai sulu madra e kadresu kei nai sulu madra ca, ka tukuca sobu e na dali ki nai keli vei Jeremaia.

12A sa kaya ko Epeti-meleki na kai Kusi vei Jeremaia, Mo kiriwana mada nai sulu madra e kadresu kei nai sulu madra ca e na kirikiriwamu mei kakabo ni dali. A sa kitaka ko Jeremaia me vakakina.

13A ra sa yavi Jeremaia e na dali, ka vueti koya cake mai nai keli: a sa tiko ga ko Jeremaia e na lomanibai ni vale ni veivesu.

14A sa talaki ko Sifaniya na tui, ka kauti Jeremaia na parofita vua ki nai katolu ni curucuru mai na vale i Jiova: a sa kaya na tui vei Jeremaia, Au na taroga vei iko e dua na ka; mo kakua ni vunia vei au na ka e dua.

15A sa kaya vei Sitikiya ko Jeremaia, Kevaka kaʼu sa tukuna vei iko, ko na vakamatei au vakaidina beka ga? ia kevaka kaʼu sa vakavulici iko, ko na sega ga ni vakarorogo vei au.

16Sa qai vosavavakini vakavuni vei Jeremaia ko Sitikiya na tui, ka kaya, Me vaka sa bula dina ko Jiova, o koya sa cakava na yolodaru o qo, au na sega ni vakamatei iko, au na sega talega ni soli iko ki na ligadra na tamata o qo era qarai iko me vakamatea.

17Sa qai kaya ko Jeremaia vei Sitikiya, Sa vosa vakaoqo ko Jiova, na Kalou ni lewe vuqa, na Kalou nei Isireli; Kevaka ko na lako dina yani vei ira na turaga kei tui Papiloni, ena qai bula na yalomu, ia na koro o qo ena sega ni vakamai e na buka; ia ena bula ko iko, kei na nomu mataqali:

18ia kevaka ko na sega ni lako yani vei ira na turaga kei tui Papiloni, ena qai soli na koro o qo ki na ligadra na kai Kalitea, a ra na vakama e na buka, ia ko iko, ko na sega ni dro tani rawa mai na ligadra.

19A sa kaya ko Sitikiya na tui vei Jeremaia, Au sa rerevaki ira na kai Jutia era sa vuki vei ira na kai Kalitea, de ra soli au ki na ligadra, ka ra vakalialiai au.

20A sa kaya ko Jeremaia, Era na sega ni soli iko. Mo vakarorogo mada ki na vosa i Jiova, a ya kaʼu sa tukuna vei iko: o na qai vinaka kina, ia ena bula kina na yalomu.

21Ia kevaka ko sa bese ga ni lako yani, sa vakaoqo na vosa sa vakatakila vei au ko Jiova:

22Ia, raica, o ira kece na alewa era tiko e na vale i tui Juta, ni ra na sa kauti yani vei ira na turaga kei tui Papiloni, era na qai kaya na alewa ko ya, Era sa kitaki iko, ka gumatua vei iko ko ira na wekamu: sa lutu dromu ki na oruoru na yavamu, sa ra qai vuki vakanadaku.

23Ia ko ira kece na watimu kei na luvemu, era na kauti ira yani vei ira na kai Kalitea: o iko talega, ko na sega ni dro tani rawa mai na ligadra, e na liga i tui Papiloni ko na tauri ga kina: ia na koro o qo, ko na cakava me vakamai e na buka.

24Sa qai kaya ko Sitikiya vei Jeremaia, Me kakua e dua na tamata e kila na vosa o qo, o na qai sega ni mate.

25Ia kevaka era rogoca na turaga ni daru sa veivosaki kei iko, ka ra lako mai vei iko, ka kaya vei iko, Tukuna mada vei keitou na ka ko sa kaya vua na tui, kakua ni ko vunia vei keitou, ia keitou na sega ni vakamatei iko; kei na ka talega sa kaya vei iko na tui:

26mo qai kaya vei ira, Sa tauca koi au na noqu vakamamasu e na mata ni tui, me kakua ni vakasukataki au ki na vale i Jonacani, meʼu mate maikina.

27A ra sa lako kece mai na turaga vei Jeremaia, ka tarogi koya: a sa tukuna vei ira me vaka na vosa kecega o qori sa vakarota na tui. A ra sa kua so ni vosa vua; ni sa tawa kilai na ka o qori.

28A sa tiko ga ko Jeremaia e na lomanibai ni vale ni veivesu ka yacova na siga sa kabai kina ko Jerusalemi: a sa tiko kina ni sa kabai ko Jerusalemi.