Ai Vola I Jeremaia Na Parofita 37 - AI VOLA TABU（FIJ1864）

Sa lako yani nai valu ni kai Kalitea, ni ra rogoca, ni sa lako mai nai valu mai Ijipita, a sa qai talaki ko Sitikiya ki Jeremaia me masulaka na lewe ni vanua, 1-5, parofisaitaka ko Jeremaia na nodra lako tale mai nai valu ni kai Kalitea, me kabai Jerusalemi, ka raica, 6-10. Ni dro ko Jeremaia, sa tauri, ka yaviti, ka vakacurumi ki na vale ni veivesu, 11-15. Sa vakadinadina rei Sitikiya ni na vakabobulataki koya ko tui Papiloni, 16, 17. Ni sa vakamamasu ko Jeremaia vua na tui, sa vakarorogo vua e na ka e so e masuta, 18-21.

1A SA buli me tui ko Sitikiya na luve i Josaia nai sosomi kei Koniya na luve i Jioiakimi, o koya ka lesia ko Nipukatinesari me tui e na vanua ko Juta.

2Ia era sa sega ni vakarorogo, se ko koya, se ko ira na nona tamata, se ko ira na lewe ni vanua, ki na vosa i Jiova, a ya sa vosataka e na gusu i Jeremaia na parofita.

3Ia ko Sitikiya na tui sa talai Yiukali na luve i Selemiya kei Sifaniya na luve i Meeseya na bote vei Jeremaia na parofita, me kaya, Mo masulaki keda mada vei Jiova na noda Kalou.

4Ia ko Jeremaia sa veicuruyaki tiko kei ira na tamata: ni ra sa sega ni vakacurumi koya ki na vale ni veivesu.

5Ia nai valu i Fero sa qai lako tu mai Ijipita: a sa rogoca ko ira na kai Kalitea era buku na druadrua ni koro mai Jerusalemi na kedrai rogorogo, a ra sa lako cake tani e Jerusalemi.

6Sa qai yaco mai na vosa i Jiova vei Jeremaia na parofita, ka vaka,

7Sa vosa vakaoqo ko Jiova, na Kalou nei Isireli; Dou vosa vakaoqo vei tui Juta, o koya ka talai kemudou vei au me mai tarogi au; Raica, nai valu i Fero e sa lako mai me vukei kemudou, ena lesu tale ki Ijipita ki na nodra vanua.

8A ra na lesu mai na kai Kalitea, ka veivala kei na koro o qo, ka rawa, ka vakama e na buka.

9Sa vosa vakaoqo ko Jiova; Dou kakua ni vakacalai kemudou, ka kaya, Era na lako vakaidina tani vei keda ko ira na kai Kalitea: ni ra na sega ni lako tani.

10Ia ke dou sa yavita nai valu kecega ni kai Kalitea era veivala kei kemudou, me kedra vo ga na tamata e vuetaki, ke ra na dui tu cake ga na tamata yadua mai na nona vale malo, ka vakama na koro o qo e na buka.

11A SA yaco, ni sa cavu tani nai valu ni kai Kalitea mai Jerusalemi e na vuku ni valu i Fero,

12sa qai lako tani mai Jerusalemi ko Jeremaia me lako ki na vanua ko Penijamini, me takali tani ko koya maivei ira na tamata.

13Ia ni sa yaco ko koya ki na matamata-ni-koro i Penijamini, sa tiko maikea e dua na turaga ni valu ei vakatawa, na yacana ko Iriyai, na luve i Selemiya, na luve i Eneniya; a sa tauri Jeremaia na parofita, ka kaya, O sa vuki vei ira na kai Kalitea.

14A sa kaya ko Jeremaia, Sa lasu; au sa sega ni vuki vei ira na kai Kalitea. A sa sega ni vakadinati koya: a sa tauri Jeremaia ko Iriyai, ka kauti koya vei ira na turaga.

15A ra sa cudru na turaga vei Jeremaia, ka yaviti koya, ka vakacurumi koya ki ni vale ni veivesu e na vale i Jonacani na vu-ni-vola: ni sa ka ko ya era sa cakava me vale ni veivesu.

16Ia ni sa curu ko Jeremaia ki na vale ni keli, kei na veiqara, ka sa tiko maikina ko Jeremaia ka bogi vuqa:

17sa qai talaki ko Sitikiya na tui, ka kauti koya tani mai: a sa tarogi koya vakavuni na tui e nona vale, ka kaya, Sa dua li na vosa maivei Jiova? A sa kaya ko Jeremaia, Sa dua kina: a sa vaka, O na soli ki na liga i tui Papiloni.

18A sa baki kaya tale ko Jeremaia vei Sitikiya na tui, A cava na ka kaʼu sa cala kina vei iko, se vei ira na nomui talatala, se vei ira na tamata o qo, ni dou sa vakacurumi au ki na vale ni veivesu?

19Ia sa qai evei na nomudou parofita era sa ia na parofisai vei kemudou, ka kaya, Ena sega ni lako mai na tui Papiloni me veivala kei kemudou, kei na vanua o qo?

20Ia o qo mo rogoca mada, noqu turaga na tui; me donu mada na noqu vakamamasu e matamu; mo kakua ni vakasukataki au ki na vale i Jonacani na vu-ni-vola, deʼu mate maikina.

21Sa qai vosa ko Sitikiya na tui me ra kauti Jeremaia ki na lomanibai ni vale ni veivesu, ka solia vua e dua nai buli madrai e na veisiga mai nodra tiki ni koro na dauvavi-madrai, ka me oti sara mada na madrai e na koro. A sa tiko ga ko Jeremaia e na lomanibai ni vale ni veivesu.