Ai Vola I Jeremaia Na Parofita 36 - AI VOLA TABU（FIJ1864）

O Jeremaia, sa vakaroti Paruki me vola na kedra parofisai na kai Jutia, ka wilika vei ira na lewe ni vanua, 1-10. Ni ra rogoca na kenai rogo na turaga, era talai Yiuti me lakova, ka mai wilika, 11-18. Era sa qai vosa vei Paruki me rau laʼki vunitaki rau kei Jeremaia, 19. O Jioiakimi na tui, ni sa rogoca e so na tiki ni parofisai, ni sa wiliki vua, sa vakama nai vola, 20-26. Sa tukuna ko Jeremaia na lewa ni Kalou e na ruku i Jioiakimi, 27-31. A m vola tale ko Paruki na parofisai i Jeremaia, 32.

1IA e na kenai kava ni yabaki i Jioiakimi na luve i Josaia na tui Juta, sa yaco na vosa o qo vei Jeremaia maivei Jiova, ka vaka,

2Mo kauta vei iko e dua nai vola vivigi, ka vola kina na vosa kecega kaʼu sa tukuna vei iko e na vukudra na Isireli, kei na Juta, kei na veimatanitu kecega, mai na siga kaʼu a vosa kina vei iko, io mai na gauna i Josaia, ka yaco mai ki na siga o qo.

3Era na rogoca beka ko ira na mataqali i Juta na ca kecega kaʼu sa nakita me cakava vei ira; me ra dui lesu yadua mai na nona sala ca; ia meʼu kakua kina ni cudruva na nodra caka cala kei na nodrai valavala ca.

4Ia ko Jeremaia, sa kacivi Paruki na luve i Neriya: a sa vola ko Paruki mai na gusu i Jeremaia na vosa i Jiova kecega, sa vosataka vua, ki nai vola vivigi.

5A sa vakaroti Paruki ko Jeremaia, ka kaya, Au sa sogolati tu; au sa sega ni lako rawa ki na vale i Jiova:

6ia mo lako ko iko, ka wilika mai nai vola vivigi, ko sa vola mai na gusuqu, na vosa i Jiova e daligadra na tamata e na vale i Jiova e na siga ni lolo: ia mo wilika talega e daligadra na kai Juta kecega era sa lako mai na nodra veikoro.

7Eia na via tauca beka na nodra vakamamasu e na mata i Jiova, ka dui lesu yadua mai na nona sala ca: ni sa levu na cudru kei na lesa sa cavuta ko Jiova me kedra na tamata o qo.

8A sa cakava ko Paruki na luve i Neriya me vaka na ka kecega sa vakarota vua ko Jeremaia na parofita, a sa wilika mai nai vola na vosa ni Kalou e na vale i Jiova.

9A sa yaco e nai kalima ni yabaki i Jioiakimi na luve i Josaia na tui Juta, e nai kaciwa ni vula, era sa kacivaka na lolo e na mata i Jiova vei ira kece na tamata mai Jerusalemi, kei ira kece na tamata era lako mai na veikoro vaka-Juta ki Jerusalemi.

10A sa wilika ko Paruki mai nai vola na vosa i Jeremaia e na vale i Jiova, e na tiki ni vale ecake sa nei Kimariya na luve i Safani na vu-ni-vola, e na lomanibai ecake, e na mata ni katuba vou ni vale i Jiova, e daligadra na tamata kecega.

11Ia ni sa rogoca ko Mikaya na luve i Kimariya, na luve i Safani, na vosa i Jiova kecega mai nai vola,

12sa lako sobu ko koya ki na vale ni tui, ki na nona tikina na vu-ni-vola: ka, raica, sa tiko maikea ko ira kece na turaga, ko Ilisama na vu-ni-vola, kei Tilaya na luve i Simeaya, kei Elinacani na luve i Akipori, kei Kimariya na luve i Safani, kei Sitikiya na luve i Eneniya, kei ira kece na turaga.

13A sa tukuna vei ira ko Mikaya na vosa kecega sa rogoca ko koya, ni sa wilika mai nai vola ko Paruki e daligadra na tamata.

14Ia ko ira kece na turaga era sa talai Yiuti na luve i Nicaniya, na luve i Selemiya, na luve i Kusi, vei Paruki, me kaya, Nai vola vivigi ko sa wilika maikina e daligadra na tamata, mo taura ga e ligamu, ka mai lako yani. A sa taura ko Paruki na luve i Neriya nai vola vivigi e na ligana, a sa lako mai vei ira.

15A ra sa kaya vua, Mo tiko sobu mada, ka wilika e daliga i keitou. A sa wilika ko Paruki e daligadra.

16A sa yaco, ni ra sa rogoca na vosa kecega, era sa dui rere na tamata yadua, ka kaya vei Paruki, Keitou na tukuna vakaidina ga vua na tui na vosa kece o qo.

17A ra sa tarogi Paruki, ka kaya, Tukuna mada vei keitou, Se ko sa vola vakaevei na vosa kece o qo mai na gusuna?

18A sa kaya vei ira ko Paruki, Sa cavuta vei au ko koya e gusuna na vosa kece o qo, ia kaʼu sa vola ki nai vola e na wai ni volavola.

19A ra sa kaya na turaga vei Paruki, Lako, mo drau laʼki vunitaki kemudrau mada kei Jeremaia; ia me kakua e dua na tamata e kila se kemudrau sa tiko maivei.

20A ra sa laʼki curu yani vua na tui ki na lomanibai, ia nai vola vivigi era sa maroroya ga e na tiki ni vale ecake nei Ilisama na vu-ni-vola, a ra sa tukuna e daligana na tui na vosa kecega o qori.

21A sa talai Yiuti na tui me laʼki kauta mai nai vola vivigi: a sa laʼki kauta mai ko koya mai na tiki ni vale nei Ilisama na vu-ni-vola. A sa wilika ko Yiuti e daligana na tui, e daligadra kece talega na turaga era tu e na mata ni tui.

22Ia na tui, sa tiko ga e na vale ni vula i liliwa e nai kaciwa ni vula: a sa dua na miqa e matana ka waqa tu.

23A sa yaco, ni sa wilika oti ko Yiuti e tolu se va na gauna, sa seleva ko koya na tui e nai sele ni dauvolavola, ka biuta ki na buka e na miqa sa waqa tu, ka me yavu saraʼni nai vola vivigi e na buka sa tu e na miqa.

24A ra sa tawa rere, se dresuka na nodrai sulu, se ko koya na tui, se dua vei ira na nonai talatala era rogoca na vosa o qo.

25Ia ko iratou ga ko Elinacani kei Tilaya kei Kimariya, eratou sa vakamasuta na tui me kakua ni vakama nai vola vivigi: a sa bese ni rogoci iratou.

26A sa vosa sara na tui vei iratou ko Yiramieli na luve i Ameleki, kei Siraya na luve i Asirieli, kei Selemiya na luve i Apitieli, me tauri Paruki na vu-ni-vola kei Jeremaia na parofita: a sa vunitaki rau ko Jiova.

27Sa qai yaco na vosa i Jiova vei Jeremaia, ni sa vakama oti na tui nai vola vivigi kei na vosa sa vola ko Paruki mai na gusu i Jeremaia, ka vaka,

28Mo baki kauta tale vei iko e dua tale nai vola vivigi, ka vola kina na vosa eliu kecega ka tu e nai vola vivigi eliu, o qori ka vakama ko Jioiakimi na tui Juta.

29Ia vei Jioiakimi na tui Juta mo kaya, Sa vosa vakaoqo ko Jiova; O iko, ko sa vakama nai vola o qori, ka sa kaya, A cava ko sa vola maikina, ka kaya, Ena lako vakaidina mai ko tui Papiloni ka vakarusa na vanua o qo, ka vakaotia tani maikina na tamata kei na manumanu?

30O koya o qo sa vosa vakaoqo kina ko Jiova e na vuku i Jioiakimi na tui Juta;

Ena sega e dua mai vua me tiko e nai tikotiko vakaturaga i Tevita: ia na yagona mate ena biu tu ga ki na katakata e na siga, kei na liliwa e na bogi.

31Ia kaʼu na sauma vua vei ira talega na nona kawa kei ira na nona tamata na nodrai valavala ca; ia kaʼu na vakayacora vei ira, kei ira na lewe i Jerusalemi, kei ira na kai Juta, na ca kecega kaʼu sa vosataka vei ira; a ra sa tawa vakarorogo.

32Ia ko Jeremaia sa taura e dua tani tale nai vola vivigi, a sa solia vei Paruki na vu-ni-vola, na luve i Neriya: a sa vola kina mai na gusu i Jeremaia na vosa ni vola kecega sa vakama ko Jioiakimi na tui Juta e na buka: a sa vakaikuritaki tale e na vosa e vuqa talega e vakakina.