Ai Vola I Jeremaia Na Parofita 35 - AI VOLA TABU（FIJ1864）

Ni sa talairawarawa ko ira na luve i Rekapi vua na tamadra ko Jonatapi, 1-11; sa vakacalai ira kina na kai Jutia ko Jeremaia e na vuku ni nodra talaidredre vua na Kalou, 12-17. Sa vosaveivakalougatataki ira na luve i Rekapi na Kalou e na vuku ni nodra talairawarawa, 18, 19.

1A VOSA sa yaco vei Jeremaia maivei Jiova e na gauna i Jioiakimi na luve i Josaia na tui Juta, ka vaka,

2Mo lako ki na nodra vale na luve i Rekapi, ka vosa vei ira, ka kauti ira ki na vale i Jiova, ki na dua na tiki ni vale, ka vagunuvi ira e na waini.

3Au a qai kauti Yeesaniya na luve i Jeremaia, na luve i Epasiniya, kei ira na wekana, kei na luvena kecega, kei na mataqali kece ni luve i Rekapi;

4ka kauti ira ki na vale i Jiova, ki na nodra tikina na luve i Enani, na luve i Yikitaliya, e dua na tamata ni Kalou, ka voleka ki na nodra tikina na turaga, a sa toka ecake ka toka era na tikina i Meeseya na luve i Salumi, nai vakatawa ni katuba:

5ia kaʼu sa tauca e matadra na gone ni mataqali ni luve i Rekapi e so na saqa waini, kei na bilo, ka sa kaya vei ira, Dou gunu waini.

6A ra sa kaya, Keitou na sega ni gunu waini: ia ko Jonatapi na tama i keitou na luve i Rekapi sa vakaroti keitou, ka kaya, Dou kakua ni gunu waini, se koi kemudou, se ko ira na luvemudou, ka tawa mudu:

7na vale talega, dou kakua ni tara; kei na sila, dou kakua ni kaburaka; kei na veivaini, dou kakua ni tea, se taukena: ia e na vale malo ga mo dou tiko kina e na veisiga kece ni nomudou bula; mo dou bula tikoga ka bogi vuqa e dela ni vanua dou sa vulagi kina.

8Ia keitou sa vakarorogo tiko ki na domo i Jonatapi na tama i keitou na luve i Rekapi e na ka kecega ka vakarota vei keitou, me kakua ni gunu waini e na veisiga kece ni neitou bula, se koi keitou, se na wati i keitou, se na luve i keitou atagane, se na luve i keitou alewa;

9se tara vale me keitou tiko kina: ia na veivaini, kei na were, kei na sila, sa sega ga vei keitou:

10ia keitou sa tiko ga e na vale malo, ka sa vakarorogo, ka cakacaka me vaka na ka kece ka vakarota vei keitou ko Jonatapi na tama i keitou:

11ia ka sa yaco ni sa lako cake mai ko Nipukatiresari na tui Papiloni ki na vanua o qo, keitou sa kaya, Tou mai lako tani ki Jerusalemi mai na nodrai valu na kai Kalitea, mai na nodrai valu talega na kai Siria: ia keitou sa mai tiko kina e Jerusalemi.

12A sa yaco na vosa i Jiova vei Jeremaia, ka vaka,

13Sa vosa vakaoqo ko Jiova ni lewe vuqa, na Kalou nei Isireli; mo laʼki kaya vei ira na kai Juta kei na lewe i Jerusalemi, Dou na sega beka ni vakavulici me vakarorogo ki na noqu vosa? sa kaya ko Jiova.

14Sa vakayacori ga na vosa i Jonatapi na luve i Rekapi, ka vakarota vei ira na luvena me kakua ni gunu waini; ia era sa sega ni gunuva ka yacova na siga o qo, ni ra sa vakarorogo ki nai vakaro ni tamadra: ia koi au kaʼu a vosa tikoga vei kemudou, ka sou e na sabogibogi me vosa; ia dou a sega ga ni vakorogoci au.

15Au a talai ira talega vei kemudou na noqui talatala kecega na parofita, ka sou e na sabogibogi me tala, ka kaya, Dou dui saumaki mada na tamata yadua mai na nona sala ca, ka cakava me vinaka na nomudoui valavala, ia dou kakua ni muria na kalou tani me qaravi ira, dou na qai tiko ga e na vanua kaʼu sa solia vei ira na nomudou qase: ia dou sa sega ga ni vakatu daligamudou, se vakarorogo vei au.

16Ka ni ra sa vakayacora na luve i Jonatapi nai vakaro i tamadra, a ya ka vakarota vei ira; ia na tamata o qo era sa sega ni vakarorogo vei au:

17o koya o qo sa vosa vakaoqo kina ko Jiova ni lewe vuqa, na Kalou nei Isireli; Raica, au na vakayacora ki Juta kei ira kece na kai Jerusalemi na ca kecega kaʼu sa cavuta me kedra: e na vuku niʼu sa vosa vei ira, a ra sa sega ni rogoca; kaʼu sa kacivi ira, a ra sa sega ni rogo mai.

18Ia ki na mataqali ni luve i Rekapi sa kaya ko Jeremaia, Sa vosa vakaoqo ko Jiova ni lewe vuqa, na Kalou nei Isireli; E na vuku ni dou sa vakarorogo ki nai vakaro i Jonatapi na tamamudou, ka sa vakabauta na nona vunau kecega, ka sa cakacaka me vaka na ka kece sa vunautaka vei kemudou:

19o koya o qo sa vosa vakaoqo kina ko Jiova ni lewe vuqa, na Kalou nei Isireli; Ena sega ni yali na tagane e kawa i Jonatapi na luve i Rekapi me tu e mataqu ka tawa mudu.