Ai Vola I Jeremaia Na Parofita 39 - AI VOLA TABU（FIJ1864）

Sa kabai ko Jerusalemi, 1-3. O ira na luve i Sitikiya, kei ira na turaga ni Juta, era sa moku; o Sitikiya, sa leuti na matana, a sa kau ki Papiloni ko koya; sa vakamai na koro, a ra sa vakabobulataki na tamata, 4-10. O tui Papiloni, sa vakaroti Nipusaretani me raici Jeremaia vakavinaka, 11-14. Sa yalataka ko Jiova na bula vei Epeti-meleki, 15-18.

1E NAI kaciwa ni yabaki i Sitikiya na tui Juta, e nai katini ni vula, sa lako mai ko Nipukatiresari na tui Papiloni kei na nonai valu kecega ki Jerusalemi, a ra sa buku na druadrua ni koro.

2E nai katini kadua ni yabaki i Sitikiya, e nai kava ni vula, e nai kaciwa ni siga ni vula, sa kabai na koro.

3A ra sa curu mai na turaga kecega kei tui Papiloni, ka tiko e na matamata-ni-koro eloma, io ko Nerikali-sareseri, kei Samikari-nipu, kei Sarisikimi, kei Rapi-sarisi, kei Nerikali-sareseri, kei Rapi-maki, kei ira kece na kena vo ni turaga kei tui Papiloni.

4A sa yaco, ni sa raici ira ko Sitikiya na tui Juta, kei ira na tamatai valu, era sa qai dro, ka lako tani e na koro kei na bogi, e na sala ni nona were na tui, ki na matamata-ni-koro e na tadrua ni bai e rua: a sa curu yani ko koya e na sala sa kau ki na buca.

5A sa vakasavi ira nai valu ni kai Kalitea, ka vauci Sitikiya e na buca mai Jeriko: ia ni ra sa tauri koya, era sa kauti koya cake vei Nipukatinesari na tui Papiloni ki Ripila e na vanua ko Emaci, a sa lewai koya maikea ko koya.

6Ia ko tui Papiloni sa qai vakamatei iratou na luve i Sitikiya mai Ripila e na matana: o ira kece talega na turaga ni Juta sa vakamatea ko tui Papiloni.

7Ia na mata i Sitikiya sa leuta ko koya, a sa vauci koya e na sinucodo, me kauti koya ki Papiloni.

8Ia na vale ni tui, kei na nodra vale na tamata, era sa vakama ko ira na kai Kalitea e na buka, kei na bai ni Jerusalemi era sa basuka sobu.

9Ia na kena vo ni tamata era tiko e na koro, kei ira sa vuki, era vuki vua, kei ira na vo ni tamata era vo tiko, sa kauti ira ko Nipusaretani na turaga ni valu ei vakatawa, ki Papiloni.

10Ia e so vei ira na kaisi, sa sega na nodra ka, sa vakalaiva tu yani ko Nipusaretani na turaga ni valu ei vakatawa, ki na vanua ko Juta, a sa solia vei ira na veivainivaini kei na veiwere e na gauna ko ya.

11Ia ko Nipukatiresari na tui Papiloni sa vakaroti Nipusaretani na turaga ni valu ei vakatawa e navuku i Jeremaia, ka kaya,

12Mo kauti koya, ka vakaraici koya, ka kakua ni cakava vua e dua na ka ca; ia me vaka na ka sa kaya vei iko ko koya mo cakava ga vua.

13A ra sa talaki ko Nipusaretani na turaga ni valu ei vakatawa, kei Nipusasipani, kei Rapi-sarisi, kei Nerikali-sareseri, kei Rapi-maki, kei ira kece na turaga kei tui Papiloni;

14io era sa talaki, ka kauti Jeremaia mai na lomanibai ni vale ni veivesu, ka soli koya vei Kitaliya na luve i Eiikami, na luve i Safani, me kauti koya ki na nona vale dina: a sa tiko ga ko koya kei ira na tamata.

15Ia vei Jeremaia sa yaco na vosa i Jiova ni sa sogoti tiko ko koya e na lomanibai ni vale ni veivesu, ka vaka,

16Mo laʼki vosa vei Epeti-meleki na kai Kusi, ka kaya,

Sa vosa vakaoqo ko Jiova ni lewe vuqa, na Kalou nei Isireli; Raica, au na vakayacora na noqu vosa ki na koro o qo me ca, me sega ni vinaka; ia ena yaco ga e matamu e na siga ko ya:

17ia kaʼu na vakabulai iko e na siga ko ya, sa kaya ko Jiova: io ko na sega ni soli ki na ligadra na tamata ko sa rerevaka:

18niʼu na vakabulai iko vakaidina, ia e nai seleiwau ko na sega ni bale kina, ena yaco ga na nomu bula me nomui toki ni valu: e na vuku ni ko sa vakararavi vei au, sa kaya ko Jiova.