Ai Vola I Jeremaia Na Parofita 32 - AI VOLA TABU（FIJ1864）

O Jeremaia, ni sa vakacuruma ko Sitikiya ki na vale ni veivesu, sa volia e dua na tiki ni vanua, ia ni sa volai na kenai vakadinadina, sa solia vei Paruki me maroroya, mei vakatakilakila ni ra na lesu tale mai na kai Jutia ki na nodra vanua, 1-15. Sa ia na masu rua na Kalou, ka sa tukuni koya vua, 16-25. Sa vakadinadinataka na Kalou na nodra vakabobulataki e na vuku ni nodrai valavala ca, 26-35; ka sa yalataka na nodra lesu tale mai, me tiko vinaka, 36-44.

1A VOSA sa yaco vei Jeremaia maivei Jiova e nai katini ni yabaki i Sitikiya na tui Juta, o qori nai katinikawalu ni yabaki i Nipukatiresari.

2Ni sa qai buku na druadrua ni koro mai Jerusalemi e nai valu i tui Papiloni: ia ko Jeremaia na parofita sa sogoti tiko e na lomanibai ni vale ni veivesu mai na vale i tui Juta.

3Ni sa sogoti koya kina ko Sitikiya na tui Juta, ka sa kaya, A cava ko sa ia kina na parofisai, ka vaka, Sa vosa vakaoqo ko Jiova, Raica, au na solia na koro o qo ki na liga i tui Papiloni, ena rawa talega ko koya;

4ia ko Sitikiya na tui Juta ena tawa dro rawa tani mai na ligadra na kai Kalitea, ena soli dina ga ki na liga i tui Papiloni, a rau na veivosaki kaya na gusuna ki na gusuna, na matana talega ena raica na matana;

5ia ki Papiloni, ena kauti Sitikiya ko koya, ka maikea, ena tiko ga kina ko koya ka yacova na siga kaʼu na talevi koya kina, sa kaya ko Jiova: ke dou sa veivala kei ira na kai Kalitea, ke dou na sega ga ni gumatua?

6A sa kaya ko Jeremaia, Sa yaco mai na vosa i Jiova vei au, ka vaka,

7Raica, o Enameli na luve i Salumi na tamamu lailai ena lako mai vei iko, ka kaya, Mo volia me nomu na noqu tiki ni vanua mai Anacoci: ni sa dodonu mo volia me veitaravi kei au.

8A sa lako mai vei au ko Enameli na luve i tamaqu lailai ki na lomanibai ni vale ni veivesu me vaka na vosa i Jiova, a sa kaya vei au, Mo volia mada na noqu tiki ni vanua mai Anacoci e na vanua i Penijamini: ni sa dodonu mo taukena, ni sa dodonu mo volia me veitaravi kei au; mo volia mada me nomu. Au sa qai kila ni sa vosa i Jiova o qo.

9Au sa qai volia na tiki ni vanua i Enameli na luve i tamaqu lailai mai Anacoci, ka sa vakatovolea nai lavo me nona, io e tinikavitu na sikeli siliva.

10Ia kaʼu a vola na kenai vola, ka dregata, ka kauta e so na tamata me vakadinadinataka, ka sa vakatovolea nai lavo e nai vakarau ni bibi.

11Au sa qai kauta nai vola ni veivoli, o koya sa dregati me vaka nai valavala ni vunau, kei koya talega sa tawa dregati:

12ka sa solia nai vola ni veivoli vei Paruki na luve i Neriya, na luve i Meeseya, e na mata i Enameli na luve i tamaqu lailai, kei na matadra na dauvakadinadina era vola na yacadra e nai vola ni veivoli, e na matadra kece talega na kai Jutia era sa tiko e na lomanibai ni vale ni veivesu.

13Au sa qai vakaroti Paruki e na matadra, ka kaya,

14Sa vosa vakaoqo ko Jiova ni lewe vuqa, na Kalou nei Isireli; Mo kauta nai vola o qo, nai vola ni veivoli o qo sa dregati, kei nai vola o qo sa tawa dregati; ka tugana ki na dua na kuro qele, me toka kina ka bogi vuqa.

15Ni sa vosa vakaoqo ko Jiova ni lewe vuqa, na Kalou nei Isireli; Ena taukeni tale na vale, kei na tiki ni vanua, kei na veivainivaini e na vanua o qo.

16Ia niʼu sa solia oti nai vola ni veivoli vei Paruki na luve i Neriya, kaʼu sa qai masu vei Jiova, ka kaya,

17I Turaga Jiova! raica, o iko ko sa cakavi lomalagi kei vuravura e na nomu kaukauwa levu kei na ligamu e dodo yani, a sa sega ni dredre vei iko e dua na ka:

18o sa vakatakila na loloma vei ira nai tabatamata e udolu, ka sauma na nodra caka cala na qase ki na lomasere i luvedra era veitaravi: na Kalou Levu, ka Kaukauwa, o Jiova ni lewe vuqa na yacana,

19sa vutu ni vuku, ka kaukauwa e na cakacaka: ia na matamu, sa yadrava na nodrai lakolako kecega na luve ni tamata, me solia vei ira yadua me vaka na nonai lakolako, ka vaka na vua ni nonai valavala:

20o sa cakava nai vakatakilakila kei na cakacaka mana mai na vanua ko Ijipita, ka yacova na siga o qo, vei ira talega na Isireli, kei ira na tamata tani; o sa cakava na yacamu me rogo, me vaka e na siga o qo;

21o sa kauti ira tani na nomu tamata na Isireli mai na vanua ko Ijipita, e nai vakatakilakila, kei na cakacaka mana, kei na liga kaukauwa, kei na liga e dodo yani, kei na ka rerevaki levu;

22ka sa solia vei ira na vanua o qo, o koya ko a vosavavakini kina ki na nodra qase me solia vei ira, na vanua sa dave kina na wai-ni-sucu kei na oni;

23a ra sa curu mai kina, ka taukena; a ra sa sega ni vakarorogo ki na domomu, ia na nomu vunau era sa tawa muria; na ka kece ko sa vunautaka vei ira me cakava era sa sega ga ni cakava: ia ko sa vakayacora kina vei ira na ca kecega o qo:

24raica na suva, era sa mai cakava ki na koro me kaba; ia na koro o qo sa soli ga ki na ligadra na kai Kalitea erai valu mai, e na vuku ni seleiwau, kei na viakana, kei na mate dauveitauvi: ia na ka ko sa vosataka, sa yaco ga: ka, raica, ko sa kunea.

25Ia ko iko, Turaga Jiova, ko sa kaya vei au, Mo volia na tiki ni vanua e nai lavo; ka kauta na tamata e so me vakadinadinataka; ia na koro o qo sa soli ga ki na ligadra na kai Kalitea.

26Sa qai yaco na vosa i Jiova vei Jeremaia, ka vaka,

27Raica, oi au ko Jiova, na nodra Kalou na tamata kecega: me dredre beka vei au e dua na ka?

280 koya o qo sa vosa vakaoqo kina ko Jiova; Raica, au na solia na koro o qo ki ni ligadra na kai Kalitea, kei na liga i Nipukatiresari na tui Papiloni, ia ena rawa ko koya:

29a ra na lako mai na kai Kalitea erai valu mai ki na koro o qo, ka visa na koro o qo e na buka, ka vakama kei na kena veivale, era sa cabora kina e dela ni vale nai madrali boi vinaka ki Peali, ka livia nai sevu vei ira na kalou tani, me vakacudrui au.

30Ni sai ira na luve i Isireli kei na luve i Juta era sa cakava tikoga na ka ca e mataqu mai na gauna era sa gone kina: ni sai ira na luve i Isireli era sa vakacudrui au tikoga e na cakacaka ni ligadra, sa kaya ko Jiova.

31Ni sa ka veivakararawataki vei au, ka ka veivakacudrui vei au na koro o qo mai na siga era sa tara ka yacova na siga o qo; meʼu sa kauta tani ga e mataqu,

32e navuku ni nodra ca kece na luve i Isireli kei na luve i Juta, era sa cakava me vakacudrui au, o ira, kei ira na nodra tui, kei na nodra turaga, kei na nodra bete, kei na nodra parofita, kei na kai Juta, kei na lewe i Jerusalemi.

33A ra sa vakanadaku vei au, ka sega ni vakanamata: ia kaʼu a vakavulici ira, ka sou e na sabogibogi me vakavulica, a ra sa sega ga ni vakarorogo me vakavulici kina:

34ia era sa viritura na nodra ka vakasisila e na vale sa vakatokai e na yacaqu, me ra vakadukadukalitaka:

35a ra sa tara na veiyasana cecere i Peali mai na buca ni luve i Inomi, me vakalakovi ira na luvedra tagane kei na luvedra alewa ki loma ni buka vei Moleki; na ka kaʼu sa tawa vakarota, ka sa tawa tubu e lomaqu, me ra cakava na ka vakasisila o qo, me vakacalai ira kina na Juta.

36Ia ka sa qai vosa vakaoqo kina ko Jiova, na Kalou nei Isireli, e na vuku ni koro o qo, dou sa kaya kina, Ena soli ga ki na liga i tui Papiloni e nai seleiwau, kei na viakana, kei na mate dauveitauvi:

37Raica, au na vakasoqoni ira mai na veivanua kecega, kaʼu sa dui vakasevi ira kina e na noqu cudru, kei na noqu lesa, kei na cudru levu; ia kaʼu na kauti ira tale mai ki na yasana o qo, ka cakavi ira me tiko vinaka:

38a ra na yaco me noqu tamata, ia koi au, kaʼu na yaco me nodra Kalou:

39ia kaʼu na solia vei ira na yalo e dua bau, kei na sala e dua bau, me ra rerevaki au ka tawa mudu, me vinaka kina ko ira kei na luvedra era veitaravi:

40kaʼu na cakava talega kei ira na veiyalayalati tawa mudu, meʼu kakua ni lesu tani vei ira, mai na caka vinaka vei ira; ia na rerevaki au kaʼu na tugana ga ki na lomadra, me ra kakua ni lako tani vei au.

41Ia kaʼu na rekitaki ira meʼu caka vinaka vei ira, ka tei ira e na vanua o qo me vakaidina ga, e na vu ni lomaqu, kei na vu ni yaloqu.

42Ni sa vosa vakaoqo ko Jiova; Me vaka kaʼu sa vakayacora vei ira na tamata o qo na ca levu kecega o qo, kaʼu na vakayacora vakakina vei ira na ka vinaka kecega kaʼu sa yalataka vei ira.

43Ia ena voli tale na veitiki ni vanua e na vanua o qo, a ya dou sa kaya e na vukuna, Sa lala ga ka sega na tamata se na manumanu; sa soli ga ki na ligadra na kai Kalitea:

44na veitiki ni vanua era na volia na tamata e nai lavo, ka vola na kenai vola, ka dregata, ka vakadinadinataka e na vanua i Penijamini, kei na yasayasa vaka-Jerusalemi, kei na veikoro vaka-Juta, kei na veikoro mai na ulu-ni-vanua, kei na veikoro mai na buca, kei na veikoro mai na mata ni ceva: niʼu na kauti ira tale mai era sa vakabobulataki, sa kaya ko Jiova.