Ai Vola I Jeremaia Na Parofita 33 - AI VOLA TABU（FIJ1864）

Sa yalataka na Kalou vei ira era vakabobulataki na lesu tale mai, kei na tiko dei e na nodra vanua, 1-14. Sa tukuni koya na Mesaia, na Coke ni yalododonu; kei na nona matanitu, kei na nona lesi me bete tawa mudu; kei na lewe ni nona matanitu, ni ra na kalougata sara, 15-26.

1A SA yaco tale na vosa i Jiova vei Jeremaia ka vakarua, ia sa sogoti tiko ko koya e na lomanibai ni vale ni veivesu, a sa vaka,

2Sa vosa vakaoqo ko Jiova o koya sa cakava na koro o qo, io ko Jiova o koya sa bulia, me vakataudeitaka; o Jiova na yacana;

3Mo kaci mai vei au, kaʼu na rogo yani vei iko, ka vakatakila vei iko na ka levu ka dredre ni kilai, a ya ko sa sega ni kila.

4Ni sa vosa vakaoqo ko Jiova, na Kalou nei Isireli, e na vuku ni veivale ni koro o qo, kei na veivale i tui Juta, a ya sa basuki sobu e na suva kei na matau;

5Era sa curu yani me veivaluti kei ira na kai Kalitea, ka me ra vakasinaita na veivale o qo e na yago ni tamata, o ira kaʼu sa vakamatea e na noqu cudru kei na noqu lesa, e na vuku ni ka kaʼu sa vunia kina na mataqu mai na koro o qo, io na nodrai valavala ca kecega.

6Raica, au na vakayacora vua na mavomavo kei na bula, ia kaʼu na vakabulai ira, ka vakaraitaka vei ira na vutu ni sautu kei na dina.

7Ia kaʼu na kauti ira tale mai na Juta era vakabobulataki kei ira na Isireli era vakabobulataki, ia kaʼu na tarai ira, me vaka eliu:

8kaʼu na vakasavasavataki ira talega mai na nodra caka cala kecega, era sai valavala ca kina vei au; ia kaʼu na bokoca na nodra caka cala kecega, erai valavala ca ka talaidredre kina vei au.

9Ia ena yaco me noqu kina na yaca rogo e marautaki, ka vakavinavinakataki, ka vakarokorokotaki, e na veimatanitu kece e vuravura, era na rogoca na ka vinaka kece kaʼu sa cakava vei ira: a ra na rere ka sautaninini e na vuku ni ka vinaka kecega kei na vuku ni sautu kecega kaʼu sa vakayacora kina.

10Sa vosa vakaoqo ko Jiova; Ena rogoci tale e na yasana o qo, a ya dou sa kaya e na vukuna, Sa lala ga ka sega na tamata se na manumanu, io e na veikoro vaka-Juta, kei na sala ni koro ko Jerusalemi, e sa lala ga, ka sega na tamata, se na manumanu,

11na domo ni reki, kei na domo ni marau, na domo ni tagane kei na domo ni alewa, sa qai vakawati; na domodra era sa kaya, Dou vakavinavinaka vei Jiova ni lewe vuqa: ni sa yalovinaka ko Jiova; ni sa tawa mudu na nona loloma: kei na domodra talega era sa kauta mai nai madrali ni vakavinavinaka ki na vale i Jiova. Niʼu na kauta tale mai na lewe ni vanua sa vakabobulataki, me sa vaka eliu, sa kaya ko Jiova.

12Sa vosa vakaoqo ko Jiova ni lewe vuqa; Ena dua tale e na yasana o qo, e sa lala ga ka sega na tamata se na manumanu, e na kena veikoro kece talega, io e dua na nodrai tikotiko nai vakatawa era na vakotora kina na qele ni sipi.

13E na Veikoro mai na veiulu-ni-vanua, kei na veikoro mai na buca, kei na veikoro mai na mata ni ceva, kei na vanua i Penijamini, kei na yasayasa vaka-Jerusalemi, kei na Veikoro vaka-Juta, ena lako voli tale yani kina na qele ni sipi e na ruku ni liga i koya sa wilika, sa kaya ko Jiova.

14Raica, ena yaco na gauna, sa kaya ko Jiova, kaʼu na vakayacora kina na ka vinaka ko ya kaʼu sa yalata ki na mataqali i Isireli, kei na mataqali i Juta.

15E na veisiga ko ya, kei na gauna ko ya, kaʼu na vakatubura kina vei Tevita na Coke yalododonu; ia ena cakava ko koya na lewa dodonu kei na cakacaka dodonu e na vanua.

16E na veisiga ko ya, ena vakabulai ko Juta, ia ko Jerusalemi, ena tiko vinaka ga: ia o qo na yacana ena vakatokai kina, Ko Jiova na noda yalododonu.

17Ni sa vosa vakaoqo ko Jiova; Ena sega ni yali vei Tevita e dua na tagane me tiko e nai tikotiko vakaturaga ni mataqali i Isireli;

18o ira talega na bete na luve i Levi, ena sega ni yali vei ira e dua na tagane me tiko e mataqu me vakacabora nai soro kama, ka vakacaudreva nai madrali laukana, ka cakava tiko nai soro e na veisiga.

19A sa yaco na vosa i Jiova vei Jeremaia, ka vaka,

20Sa vosa vakaoqo ko Jiova; Kevaka dou sa vakacacataka rawa na noqu veiyalayalati e na vuku ni siga, kei na noqu veiyalayalati e na vuku ni bogi, me kakua kina na siga kei na bogi e na kena gauna;

21ena qai vakacacataki rawa na veiyalayalati kaʼu sa ia kei Tevita na noqu tamata, me na sega kina na luvena tagane me lewa tiko e nonai tikotiko vakaturaga; kei ira talega na bete na luve i Levi, na noqui talatala.

22Me vaka sa tawa wiliki rawa na kalokalo kei lomalagi, se vakarauti rawa na nuku ni wasawasa: kaʼu na vakalevutaka vakakina na kawa i Tevita na noqu tamata, kei ira na luve i Levi era sa qaravi au.

23A sa yaco talega na vosa i Jiova vei Jeremaia, ka vaka,

24O sa vakananuma, se segai, na ka era vosataka na tamata o qo, ka kaya, Na mataqali e rua ka digitaka ko Jiova, sa biuta tani ga ko koya? a ra sa beci ira kina na noqu tamata, me ra kakua ni matanitu tiko e matadra.

25Sa vosa vakaoqo ko Jiova; Ke sa sega na noqu veiyalayalati e na vuku ni siga kei na bogi, ia nai valavala kei lomalagi kei vuravura, keʼu sa sega ni lesia:

26ke sa qai kawa i Jekope, kei Tevita na noqu tamata, kaʼu na qai biuta tani, meʼu kakua ni kauta na nona kawa me lewai ira na kawa i Eparaama, kei Aisake, kei Jekope: niʼu na kauti ira tale mai era vakabobulataki, ka lomani ira.