1E NA gauna ko ya, sa kaya ko Jiova, kaʼu na qai nodra Kalou na veimataqali kecega nei Isireli, ia era na yaco ko ira me noqu tamata.
2Sa vosa vakaoqo ko Jiova, Era sa kune loloma mai na veikau ko ira na tamata era vakavoci mai nai seleiwau, niʼu a laʼki vakacegui ira na Isireli.
3Sa eliu ka rairai kina vei au ko Jiova; Io, sa loloma tawa mudu ga kaʼu sa lomani iko kina: o koya o qo kaʼu sa vakabalavutaka kina na loloma vei iko:
4au na baki tarai iko tale, ia ko na tara, o iko na gonealewa ni Isireli; o na baki vakaiukuukutaki tale e na nomu lali, ia, ko na bau yani e na nodra meke era ia na marau:
5o na baki tea tale na veivaini e na ulu-ni-vanua mai Samaria: era na tea ko ira na dauteitei, tea kana loa kina.
6Ni na yaco e dua na siga, era na kacivaka kina nai vakatawa mai na ulu-ni-vanua ko Ifireimi, Dou tu cake, me da lako cake ki Saioni vei Jiova na noda Kalou.
7Ni sa vosa vakaoqo ko Jiova; Dou meke e na vuku i Jekope e na marau, ka kaila e na vuku i koya sa liu e na veimatanitu: dou vakarogotaka, dou vakavinavinaka, ka kaya, Mo vakabulai ira, Jiova, na nomu tamata, na Isireli sa vo.
8Raica, au na kauti ira mai na vanua mai na tokalau, ka vakasoqoni ira mai nai yalayala kei vuravura, o ira vata kei na mataboko kei na lokiloki, kei na alewa sa bukete kei koya sa taratara: e dua nai vavakoso levu ena lesu mai kike.
9Era na lako mai ka tagi tu, ia kaʼu na tuberi ira mai ka ra vakamamasu tu: au na vakalakovi ira mai e na bati ni wai drodro e na sala dodonu, era na tawa toqi kina: ni keirau sa veitamani kei Isireli, ia ko Ifireimi, sa noqu ulumatua ko koya.
10Dou rogoca na vosa i Jiova, na veimatanitu, ka tukuna yani ki na veiyanuyanu vakayawa, ka kaya, O koya sa vakasevi Isireli ena vakasoqoni koya tale, ka maroroi koya, me vaka nai vakatawa na nona qele ni sipi.
11Ni sa vakabulai Jekope ko Jiova, ka sa kaliraki koya mai na liga i koya sa kaukauwa vei rau.
120 koya o qo era na lako mai kina ka meke e na dela-ni-koro ko Saioni, ka drodro vata mai ki na loloma i Jiova, e na vuku ni witi, kei na waini, kei na waiwai, kei na luve ni sipi kei na karavau: ia na yalodra, ena vaka na were sa levu na kena wai; a ra na sega sara ni waicala tale.
13Ena qai marau na gonealewa e na meke, o ira vata talega na cauravou kei na qase: ia kaʼu na vukica na nodra tagi me reki, ka vakacegui ira, ka vakamarautaki ira mai na nodra rarawa.
14Ia kaʼu na vakamamautaka na yalodra na bete e na uro, ia na noqu tamata era na mamau e na noqu loloma, sa kaya ko Jiova.
15Sa vosa vakaoqo ko Jiova; Sa dua na domo sa rogo mai Rama, na qoqolou, kei na tagi levu; o Rejeli, sa tagicaka na luvena, a sa bese ni vakacegui e na vuku ni luvena, ni ra sa yali.
16Sa vosa vakaoqo ko Jiova; Mo kinoca na domomu, me kakua ni tagi; kei na matamu, me kakua ni vakawai: ni na voli ga na nomu cakacaka, sa kaya ko Jiova; ia era na lesu tale mai na vanua ni meca:
17ia sa dua na ka mo vakanananu kina e na kenai vakataotioti, sa kaya ko Jiova, ni na lesu tale mai ko ira na luvemu ki na nodrai yalayala.
18Au a rogoci Ifireimi vakaidina ni sa tagicaki koya, ka kaya, O sa vakanakuitataki au, ia kaʼu sa vakanakuitataki, me vaka na karavau sa tawa kila yarayara: saumaki au mai, kaʼu na qai saumaki; ni sai iko Jiova na noqu Kalou.
19E dina niʼu sa saumaki mai, kaʼu sa qai veivutuni; ia niʼu sa qai kila, kaʼu sa yavita na sagaqu: au sa madua, io kaʼu sa taqaya, e na vuku niʼu sa colata na ka kaʼu sa rogorogo vakaca kina niʼu a cauravou.
20Sa noqu gone ni toko ko Ifireimi, se segai? sa gone daulomani, se segai? niʼu a sa vosataki koya vakaca, kaʼu sa vakananumi koya matua tikoga: o koya o qo sa yavala kina na ketequ e na vukuna; kaʼu na yalolomani koya sara, sa kaya ko Jiova.
21Mo vakaduria na nomui vakatakilakila ni sala, mo cakava na nomui tuvatuva cecere: mo vakasara na lomamu ki na salatu, na sala ko a lako yani kina: mo lesu mai, na gonealewa ni Isireli, mo lesu mai ki na nomu veikoro o qo.
22Me cava na kena dede ni nomu dauveilakoyaki tu, o iko na gonealewa dauvuki? ni sa bulia ko Jiova e dua na ka vou e vuravura, Ena rawa na tagane e dua na alewa.
23Sa vosa vakaoqo ko Jiova ni lewe vuqa, na Kalou nei Isireli; Era na ia tiko tale na vosa o qo e na vanua ko Juta kei na kena veikoro, niʼu na sa kauti ira tale mai era veivakabobulataki; Me vakalougatataki iko ko Jiova, nai tikotiko ni lewa dodonu, na ulu-ni-vanua tabu.
24Ia ena tiko ga e Juta dina, kei na kena veikoro kece talega, ko ira sa daucaka were, kei ira era veitokiyaki kei na qele ni sipi.
25Niʼu sa vakaceguya na yalo i koya sa oca, ia na yalodra kecega sa rarawa kaʼu sa vakamamautaka.
26Ni sa oti na ka o qo kaʼu a qai yadra, ka vakaraica; ia na noqu moce sa kamikamica vei au.
27Raica, ena yaco na gauna, sa kaya ko Jiova, kaʼu na kaburaka kina na mataqali nei Isireli kei na mataqali nei Juta e na kawa ni tamata, kei na kawa ni manumanu.
28Ia ena yaco, me vaka niʼu a yadravi ira, meʼu cavuta, ka basuka sobu, ka talaraka, ka vakarusa, ka vakararawataka; kaʼu na yadravi ira vakakina meʼu tara, ka tea, sa kaya ko Jiova.
29E na gauna ko ya era na sega ni kaya tale, O ira na qase era sa kania na vua-ni-vaini wiwi, ia na batidra na luvedra sa rara kina.
30Ni sai ira yadua, era na dui mate ga e na vuku ni dui nona caka cala: na tamata yadua sa kania na vua-ni-vaini wiwi, ena rara ga kina na batina ko koya.
31Raica, ena yaco na gauna, sa kaya ko Jiova, kaʼu na cakava kina kei na mataqali nei Isireli kei na mataqali nei Juta e dua na veiyalayalati vou:
32ena sega ni vaka na veiyalayalati kaʼu a cakava kei ira na nodra qase e na siga kaʼu a taura kina na ligadra me tuberi ira mai na vanua ko Ijipita; ni ra sa vakacacataka na noqu veiyalayalati ko ya, ia koi au kaʼu sa watidra ga, sa kaya ko Jiova:
33ia ka sa vakaoqo na veiyalayalati kaʼu na cakava kei ira na mataqali nei Isireli; Ni sa oti na gauna ko ya, sa kaya ko Jiova, kaʼu na tugana na noqu vunau ki na lomadra, e na yalodra talega kaʼu na vola kina: ia kaʼu na yaco me nodra Kalou, a ra na yaco ko ira me noqu tamata:
34a ra na sega ni dui veivakavulici tale na tamata kei na kai nona, kei na wekana, ka kaya, Mo kilai Jiova: ni sai ira kece, era na kilai au ga, ko ira sa kaisi kei ira talega sa turaga, sa kaya ko Jiova: niʼu na bokoca na nodra caka cala, ia na nodrai valavala ca kaʼu na sega ni nanuma tale.
35Sa vosa vakaoqo ko Jiova, o koya sa solia na mata-ni-siga me rarama kei na siga, ka lesia na vula kei na kalokalo me rarama kei na bogi, o koya sa vakaceguya na wasawasa ni sa vadugu na kena biau: o Jiova ni lewe vuqa na yacana:
36Ke na yali e mataqu nai lesilesi o qo, sa kaya ko Jiova, ke sa qai kawa i Isireli talega me na cegu ni matanitu tiko e mataqu ka tawa mudu.
37Sa vosa vakaoqo ko Jiova, Ke na vakarauti rawa na lomalagi maicake, ka vakadikevi rawa nai yavu kei vuravura era, ke sai au talega kaʼu na qai biuta tani na kawa i Isireli kecega e na vuku ni ka kece era sa cakava, sa kaya ko Jiova.
38Raica, ena yaco na gauna, sa kaya ko Jiova, ena tara kina na koro me nei Jiova, mai na vale-cecere i Enaneli ka yacova na matamata-ni-koro mai na tutu-ni-koro.
39Ia ena yaco tale yani na dali i vakarau me vakadodonu ki na dela-ni-koro ko Karepi, ka yaco voli yani ki Koa.
40Ia na buca kecega ni mate, kei na dravusa, kei na veiwere kecega ka yaco ki na soniwai ko Kitironi, ka yaco sara ki na tutu ni matamata-ni-koro ni ose kivakaki cake, ena tabu me nei Jiova; ena sega ni cavuti cake, se talaraki sobu tale e na dua na gauna.
Who We AreWhat We EelieveWhat We Do
2025 by iamachristian.org,Inc All rights reserved.
