Ai Vola I Jeremaia Na Parofita 17 - AI VOLA TABU（FIJ1864）

Era sa cudruvi na kai Jutia e na vuku ni nodrai valavala ca, 1-4. Sa ka ca me vakararavi vua na tamata, a sa ka vinaka me vakararavi vua na Kalou, 5-8. A yalo ni tamata na ka daulawaki, ia ko Jiova sa dikeva deivaka ga, 9-11. Sai koya ga na vu ni bula, 12, 13. Sa masu ko Jeremaia, 14-18. A sa qai talai vei ira na lewe ni vanua me ia na veiyalayalati kei ira e na vuku ni siga tabu, 19-27.

1A NODRAI valavala ca na Juta sa ceuti tu e nai ceu aironi, e na mata ni taiamodi: sa ceuti tu ki na dela ni lomadra, kei na bati ni nomudoui cabocabo-ni-soro;

2ni ra sa nanuma tiko ko ira na luvedra na nodrai cabocabo-ni-soro kei na nodra kalou alewa e ruku ni kau bulabula mai na veiulu-ni-vanua.

3Noqu ulu-ni-vanua mai lekutu, na nomui yau, kei na nomu ka talei kece kaʼu na solia me tokitaki ga, ia na nomu veiyasana cecere mei valavala ca kina, e na nomui yalayala kecega.

4Ia ko iko talega, ko na kua so ni tiko e na nomui tikotiko kaʼu a solia vei iko, ia kaʼu na cakavi iko mo qaravi ira na nomu meca e na vanua ko sa lecava: ni sa dua na buka dou sa tutuvaka e na noqu cudru, ena waqa ka tawa mudu.

5Sa vosa vakaoqo ko Jiova; Ena ca na tamata sa vakararavi ki na tamata, ka sa cakava na ka vakalewe me ligana, a sai Jiova sa lako tani maikina na lomana:

6ni na vaka na karuka ni talasiga ko koya, ena sega talega ni kunea na vinaka ni sa yaco; ena tikora ga na vanua dravuisiga mai veikau, e na vanua masima sa sega ni tawa.

7Sa kalougata na tamata sa vakararavi vei Jiova, ka sai Jiova sa vakanananu ga kina:

8ni na vaka na kau sa tei e na bati ni wai, ia ki na bati ni uciwai sa vakatala kina na wakana, ena sega ni kila ni sa yaco mai na katakata, a drauna talega ena drokadroka tu; ia e na yabaki ni dausiga ena tawa nuiqawaqawa kina, ena sega talega ni mudu ni vuavua.

9Sa ka dauveivakaisini duaduaga na loma ni tamata, ka dredre ni vinaka: o cei me kila rawa?

10Oi au ko Jiova kaʼu sa dikeva na loma ni tamata, kaʼu sa vakatovolea na kenai ivi, meʼu solia ki na tamata yadua me vaka na nonai valavala, me vaka na vua ni nona cakacaka.

11 Me vaka na toa ni veikau sa saulaka na yaloka sa sega ni vakasucuma; sa vakakina ko koya sa kumuna nai yau, ka sega e nai valavala dodonu, e na veimama ni nona bula ena laiva ga, ia e na kenai otioti ena tamata lialia.

12Sai tikotiko vakaiukuuku ka cecere mai nai vakatekivu na yasana ni neimami vale tabu.

13O iko Jiova, era dauvakararavi kina na Isireli, o ira kece era biuti iko era na madua ga, o ira era lako tani vei au era na volai ga e na qele, e na vuku ni ra sa biuti Jiova na mata-ni-wai bula.

14Mo tara qau vue, Jiova, ena qai mavo; vakabulai au, kaʼu na qai bula: ni sai iko kaʼu sa vakacaucautaka.

15Raica, era sa kaya vei au, Sa evei na vosa i Jiova? me yaco mada ga.

16Ia koi au, kaʼu a sega ni gumatua meʼu sega ni vakatawa me muri iko; ia na siga ca kaʼu a sega ni gadreva; ko sa kila ga: na ka sa lako tani mai na gusuqu sa dodonu ga e matamu.

17Mo kakua ni vakadomobulataki au: o iko ga kaʼu sa vakararavi kina e na siga ca.

18Me ra vakamaduataki era vakacacani au, ia meʼu kakua ni vakamaduataki koi au: me ra taqaya ko ira, ia meʼu kakua ni taqaya koi au: vakayacora vei ira na siga ca, ia e na rusa vakarua mo vakarusai ira kina.

19SA vosa vakaoqo vei au ko Jiova,

Mo laʼki tu e na matamata-ni-koro ni luvedra na noqu tamata, eratou dauveicuru-yaki kina na tui Juta, e na matamata-ni-koro kece talega kei Jerusalemi;

20ka kaya vei ira, Dou rogoca na vosa i Jiova, oi kemudou na tui Juta, kei na kai Jerusalemi kecega, sa daucuruma na veimatamata-ni-koro o qo:

21Sa vosa vakaoqo ko Jiova; Dou qarauni kemudou, mo dou kakua ni colata nai kaukau e na siga tabu, se kauta mai e na veimatamata-ni-koro ki Jerusalemi;

22dou kakua talega ni colata yani nai kaukau mai na nomudou vale e na siga tabu, se cakava e dua na cakacaka, ia dou vakatabuya ga na siga tabu, me vaka kaʼu a vakarota vei ira na nomudou qase:

23ia ka ra sega ni talairawarawa, se vakatu daligadra, era sa vakadomoqataki ira ga, me ra kakua ni vakarorogo, se vakavulici.

24Ia ena yaco, kevaka dou na vakarorogo sara vei au, sa kaya ko Jiova, me kakua ni colata mai nai kaukau ki na veimatamata-ni-koro o qo e na siga tabu, ka sa vakatabuya ga na siga tabu, me kakua ni cakava kina e dua na cakacaka;

25ena qai curu mai ki na veimatamata-ni-koro o qo ko ira na tui kei na turaga era sa tiko e nai tikotiko i Tevita, ka sa vodo lako e na vale-vodoki kei na ose, o ira, kei na luvedra, kei na kai Juta, kei na lewe i Jerusalemi: ia ena tu dei ga na koro o qo ka tawa mudu:

26a ra na lako mai na Veikoro vaka-Juta, kei na yasayasa vaka-Jerusalemi, kei na vanua i Penijamini, kei na buca, kei na veiulu-ni-vanua, kei na mata ni ceva, ka kauta mai nai soro kama, kei nai cabocabo, kei nai madrali laukana, kei na ka boi vinaka, ka kauta mai nai madrali ni vakavinavinaka, ki na vale i Jiova.

27Ia kevaka dou na sega ni vakarorogo vei au me vakatabuya na siga tabu, ka me kakua ni colata mai nai kaukau, me curu ki na veimatamata-ni-koro ki Jerusalemi e na siga tabu; kaʼu na qai tutuvaka na buka e na kena matamata-ni-koro, ena katia na veivale vakaturaga mai Jerusalemi, ena sega talega ni bokoci.