Ai Vola I Jeremaia Na Parofita 16 - AI VOLA TABU（FIJ1864）

Sa ia na parofisai ko Jeremaia, me vakatakila vei ira na kai Jutia ni ra na ca sara, 1-9, e na vuku ni ra sa uasivi vei ira na nodra qase e na ca, 10-13. Ena ka levu na nodra vakabulai emuri mai Papiloni, ka ka lailai na nodra vakabulai eliu mai Ijipita, 14, 15. Ena cudruvi ira ko Jiova e na vuku ni ra qarava na kalou lasu, 16-21.

1A SA yaco vei au na vosa i Jiova, ka vaka,

2Mo kakua ni kauta vei iko e dua me watimu, ia me kakua e so na luvemu tagane, se na luvemu alewa e na yasana o qo.

3Ni sa vosa vakaoqo ko Jiova e na vuku ni goneatagane kei na vuku ni gonealewa era sa sucu e na yasana o qo, e na vuku ni tinadra talega sa vakasucumi ira, kei na vuku ni tamadra sa vakasikavi ira e na vanua o qo;

4Era na mate e na mate ca; era na sega ni tagicaki; era na sega talega ni buluti; era na vaka na de-ni-manumanu e dela ni soso: e nai seleiwau, kei na viakana, era na oti kina; ia na yagodra ena kedra na manumanu ni lomalagi, kei na manumanu ni vanua.

5Ni sa vosa vakaoqo ko Jiova, Kakua ni ko curu ki na vale ni tagi yaso, kakua talega ni laʼki tagicaki ira se vakacegui ira: niʼu sa vakasuka na noqu sautu maivei ira na tamata o qo, sa kaya ko Jiova, io na yalololoma kei nai valavala loloma.

6A ra na mate na turaga kei na kaisi e na vanua o qo: era na sega ni buluti, ena sega e tagicaki ira, se ia na veitava, se na veitasi e na vukudra:

7era na sega talega ni ia na dovi madrai e na vukudra e na somate, me vakacegui ira e na vuku ni mate; era na sega talega ni solia vei ira na bilo ni veivakacegui me gunuva e na vuku ni tamadra se na tinadra.

8Ia na vale ni solevu talega kakua ni ko curu kina, me tiko kei ira me kana ka gunu.

9Ni sa vosa vakaoqo ko Jiova ni lewe vuqa, na Kalou nei Isireli; Raica, au na muduka tani e na yasana o qo e na matamudou, io, e na nomudou gauna, na domo ni marau, kei na domo ni reki, na domo ni tagane kei na domo ni alewa, sa qai vakawati.

10Ia ena yaco, ni ko sa tukuna vei ira na tamata o qo na vosa kecega o qo, a ra sa kaya vei iko, A cava sa cavuta kina ko Jiova vei keimami na ka ca levu kece o qo? se cava beka na neimami caka cala? se cava na neimami valavala ca keimami sai valavala ca kina vei Jiova na neimami Kalou?

11ia mo kaya vei ira, E na vukudra na nomudou qase ni ra sa biuti au, sa kaya ko Jiova, ka ra sa muria na kalou tani, ka qaravi ira, ka sorovi ira, ia koi au era sa biuta, kei na noqu vunau era sa sega ni vakabauta;

12ia koi kemudou dou sa caka ca vakalevu ka vakalailai ko ira na nomudou qase; ka, raica, dou sa dui muria yadua na kaukauwa ni lomana ca, me kakua ni vakarorogo vei au:

13o koya o qo kaʼu na biuti kemudou tani kina e na vanua o qo ki na vanua dou sa sega ni kila, se koi kemudou se ko ira na nomudou qase; ia dou na qaravi ira maikea na kalou tani e na siga kei na bogi; kaʼu na sega ni lomani kemudou maikina.

14Ia ka sa vosa vakaoqo ko Jiova, Raica, ena yaco na gauna, ena tawa kainaki tale kina, Sa bula ko Jiova, o koya ka kauti ira cake na luve i Isireli mai na vanua ko Ijipita;

15ia me vakane, Sa bula ko Jiova, o koya ka kauti ira na luve i Isireli mai na vanua mai na tokalau, mai na veivanua talega ka dui vakasevi ira kina ko koya: ia kaʼu na kauti ira tale mai ki na nodra vanua kaʼu a solia ki na nodra qase.

16Raica, au na talaki taki ira e vuqa na dausiwa, sa kaya ko Jiova, a ra na siwati ira; ka oti, kaʼu na talakitaki ira e vuqa na dauvakasasa manumanu, a ra na vakasavi ira mai na veiulu-ni-vanua kecega, kei na veiulu-ni-koro kecega, kei na qaravatu.

17Ia na mataqu sa qarava na nodrai valavala kecega: sa sega ni tabonaki ki mataqu, a sa sega talega ni tabonaki na nodra caka cala, meʼu kakua ni kunea.

18Ia kaʼu na sauma eliu me vakarua na nodra caka cala kei na nodrai valavala ca; e na vuku ni ra sa vakadukadukalitaka na noqu vanua e na yago mate ni nodra ka velavela, io e na nodra ka vakasisila era sa vakasinaita kina na noqui tikotiko.

19I Jiova, na noqu kaukauwa, kei na noqu koro, kei na noqui vakaruru e na siga ni rarawa, sai iko era na lako mai kina na veimatanitu mai na veiyalayala kei vuravura, a ra na kaya, E dina, sa ka lasu, ka wale, ka sega na yagana, era taukena ko ira na neimami qase.

20Me dua beka na tamata me cakava na kalou me nona, ka ra sega ni kalou?

21O koya o qo, raica, kaʼu na vakatakila kina vei ira me vakadua o qo, kaʼu na vakatakila vei ira na ligaqu, kei na noqu kaukauwa; a ra na kila ni sa yacaqu ko Jiova.