Ai Vola I Jeremaia Na Parofita 15 - AI VOLA TABU（FIJ1864）

Era sa biuti, ka lewai me cudruvi ga ko ira na kai Jutia, 1-9. O Jeremaia, ni sa vosavakacacani, sa tagi vua na Kalou, a sa vakaceguya ko koya e na vosa loloma vua, kei na vosa veivakararawataki vei ira, 10-14. Sa masu ko koya, a sa rogoci na nona masu, 15-21.

1A SA kaya vei au ko Jiova, Ke rau tu ko Mosese kei Samueli e mataqu, ke na sega ga ni gole na lomaqu vei ira na tamata o qo: biuti ira tani e mataqu, me ra lako tani ga.

2Ia ena yaco, kevaka era kaya vei iko, Me keimami lako yani kivei? mo qai kaya vei ira, Sa vosa vakaoqo ko Jiova; O ira sa lako ki na mate, ki na mate ga; kei ira sa lako ki nai seleiwau, ki nai seleiwau ga; kei ira sa lako ki na viakana, ki na viakana ga; kei ira sa laʼki bobulataki, ki na veivakabobulataki ga.

3Ia na yavusa e va kaʼu na lesia me rawai ira, sa kaya ko Jiova: nai seleiwau me ia na veivakamatei, kei na koli me ia na veidresulaki, kei na manumanu ni lomalagi, kei na manumanu ni vanua, me kania ka vakarusai ira.

4Ia kaʼu na soli ira me veikauyaki ki na veimatanitu kecega e vuravura, e na vuku i Manase na luve i Isikiya na tui Juta, e na vuku ni ka sa cakava e Jerusalemi.

5Ia ko cei ena lomani iko, Jerusalemi? se ko cei me na tagicaki iko? se ko cei me na lesu tani me laʼki taroga, se vakaevei na nomu tiko?

6O iko ko sa biuti au, sa kaya ko Jiova, o sa lako kimuri: o koya o qo kaʼu na dodoka kina na ligaqu vei iko, ka vakarusai iko; au sa oca e na veivutuni.

7Ia kaʼu na irivi ira e nai iri e na matamata-ni-koro ni vanua; kaʼu na vakawayalitaki ira, kaʼu na vakarusai ira na noqu tamata, ni ra sa sega ni saumaki mai na nodrai valavala.

8Sa ka levu mai vei au na nodra alewa dawai, ka lailai na mata ni nuku ni wasawasa; au sa vakayacora vei ira, io, vua na tinadra na cauravou e dua na dauvakacaca e na siga levu: au sa cakava me vakidacala na nona lutuki koya, ia na ka veivakarerei ki na koro.

9Sa malumalumu mai ko koya sa vakasucuma e lewe vitu: sa ciba ko koya: sa dromu na nona mata-ni-siga ni sa siga toka: sa madua ka taqaya ko koya: ia na kedra vo kaʼu na solia ki nai seleiwau e matadra na nodra meca, sa kaya ko Jiova.

10Ule koi au, tinaqu, ni ko sa vakasucumi au me tamata dauveileti ka tamata dauveivala kei vuravura kecega! au a sega ni soli lavo meʼu vakaisausaumi tawa dodonu kina, a sa sega e so era vakaisausaumi tawa dodonu vakakina vei au; ia ko ira kece era sa rukaki au ga.

11Sa kaya ko Jiova, E dina, na vo ni nomu bula ena vinaka ga; e dina, kaʼu na cakava na meca me ia na veisorosorovi kei iko e na gauna ni ca kei na gauna ni rarawa.

12Me dua li na aironi me vorota na aironi vaka-tokalau kei na parasa?

13na nomui yau kei na nomu ka talei kaʼu na solia ga me tokitaki wale, me sega na kenai voli, io e na vuku ni nomui valavala ca kecega e na nomui yalayala kecega:

14ia kaʼu na vakalakovi kemudou kei na nomu meca ki na vanua ko sa sega ni kila: ni sa dua na buka sa tutuvaki e na noqu cudru, ena kati kemudou.

15O iko, Jiova, ko sa kila ga: mo nanumi au, ka mai raici au, ka cudruvaki au vei ira era vakacacani au; kakua ga, e na vuku ni nomu dauvosota, ni ko kauti au tani: kila ga, ni sai iko kaʼu sa vakarogocataki kina.

16Sa kune na nomu vosa, ia kaʼu a kania; a sa yaco na nomu vosa me ka ni rereki kei na marau ni lomaqu: ni sa vakatokai vei au na yacamu, Jiova na Kalou ni lewe vuqa:

17kaʼu a sega ni tiko e na nodrai soqosoqo na dauveivakalialiai, seʼu mamarau; e na vuku ni ligamu kaʼu a tiko duaduaga: ni ko sa vakasinaiti au e na cudru levu.

18A cava sa dei kina na noqu rarawa me tawa mudu, kei na noqu vue me tawa bula rawa, a sa bese ni bula? mo sa vaka dina sara beka e dua na daulasu vei au, ka vaka na wai yaliyali?

19O koya o qo sa vosa vakaoqo kina ko Jiova, Kevaka ko na saumaki mai, kaʼu na qai vakayacori iko tale, mo tu ga e mataqu: ia kevaka ko na wasea tani na ka talei mai na ka tawa yaga, ko na qai vaka na gusuqu: me ra saumaki mai vei iko ko ira; ia ko iko mo kakua ni saumaki vei ira.

20Ia kaʼu na cakavi iko mo kedra bai parasa e vakaivalu na tamata o qo: era na veivala kei iko, a ra na sega ni gumatua vei iko: niʼu sa tiko kei iko me vakabulai iko ka kaliraki iko, sa kaya ko Jiova:

21ia kaʼu na kaliraki iko mai na ligadra na tamata ca, ka vakabulai iko mai na ligadra na daurerevaki.