Ai Vola I Jeremaia Na Parofita 14 - AI VOLA TABU（FIJ1864）

Ni sa levu na dausiga, sa masulaka na vanua ko Jeremaia, 1-9; a sa sega ni vinakata ko Jiova ni ra masulaki na lewe ni vanua, 10-12. Sa tawa yaga me nodra ulubale ko ira na parofita vakailasu era sa vakasesei kina, 13-18. Sa tagicaki ira ko Jeremaia vua na Kalou, 19-22.

1A VOSA i Jiova sa yaco vei Jeremaia e na vuku ni dausiga.

2Sa tagi ko Juta, a kena veimatamata-ni-koro sa malumalumu; sa loaloa tu e na qele; ia na tagi i Jerusalemi sa lako cake:

3o ira talega na nodra turaga era sa talaki ira na nodra gone lalai ki na wai: era sa yaco ki nai keli, ka sega ni kunea na wai; era sa lesu ka lala wale na medra bilo; era sa madua ka taqaya, a ra sa tabonaka na uludra:

4e na vuku ni qele ni sa kaca, ni sa sega na uca e na vanua, era madua nai vakatau-ni-were, era sa tabonaka na uludra.

5Io, na teiri talega sa vakasucu e na were, ka vakalaiva, ni sa sega na co:

6na asa kila talega, era sa tu mai na talasiga, era dramica na cagi me vaka na gata lelevu; sa malumalumu na matadra, ni sa sega na co.

7A neimami caka cala, Jiova, sa tukuni keimami dina me ca, ia mo cakacaka e na vuku ni yacamu ga: ni sa ka levu na neimami dauvuki; keimami sai valavala ca vei iko.

8O iko era dauvakararavi kina na Isireli, na nodrai Vakabula e na gauna ni rarawa, mo sa vaka na vulagi e na vanua e na vuku ni cava, ka vaka na tamata daulako sa lesu tani me moce e na bogi?

9mo sa vaka na tamata e taqaya, ka vaka na qaqa sa sega ni ia rawa na veivakabulai e na vuku ni cava? ia ko iko, Jiova, ko sa tiko kei keimami, na yacamu talega sa vakatokai vei keimami; kakua ga ni ko vakalaivi keimami.

10Sa vosa vakaoqo ko Jiova vei ira na tamata o qo, Sa vaka ga o qo na nodra vinakata na lako sese, na yavadra era sa sega ni tarova, ia ko Jiova sa sega ni vinakati ira kina; ena nanuma o qo na nodra caka cala, ka cudruva na nodrai valavala ca.

11Sa qai kaya vei au ko Jiova, Mo kakua ni masulaki ira na tamata o qo me ra vinaka.

12Ni ra sa lolo, kaʼu na sega ni rogoca na nodra tagi; ni ra sa cabora nai soro kama kei nai madrali, kaʼu na sega ni vinakati ira: ia e nai seleiwau, kei na viakana, kei na mate dauveitauvi, kaʼu na vakarusai ira ga kina.

13Au sa qai kaya, Ule, Turaga Jiova! raica, o ira na parofita era sa kaya vei ira, Dou na sega ni raica nai seleiwau, na viakana talega ena sega vei kemudou; ni sa sautu dina ga kaʼu na solia vei kemudou e na yasana o qo.

14A sa kaya vei au ko Jiova, Sa ka lasu ga era parofisaitaka e na yacaqu ko ira na parofita: au sa sega ni talai ira, au sa sega ni vakaroti ira, au sa sega talega ni vosa vei ira; na raivotu lasu, kei na vosa mana lasu, kei na ka wale, kei nai lawaki ni lomadra ga era sa parofisaitaka vei kemudou.

15O koya o qo sa vosa vakaoqo kina ko Jiova e na vukudra na parofita era sa ia na parofisai e na yacaqu, ia koi au kaʼu a sega ni talai ira, ka ra sa kaya ga, Nai seleiwau kei na dausiga ena sega ni yaco ki na vanua o qo; E nai seleiwau kei na dausiga era na vakarusai ga kina na parofita ko ya.

16Ia ko ira na tamata era ia kina na parofisai era na biu tu ki nai saqata ni koro ko Jerusalemi e na vuku ni dausiga kei nai seleiwau; ena sega talega e dua me buluti ira, sei ira, se na watidra, se na luvedra tagane, se na luvedra alewa: ia kaʼu na sovaraka ga vei ira na nodra ca.

17Ia mo kaya vei ira na vosa o qo; Me dave sobu na wai mai na mataqu e na siga kei na bogi, ia me kakua ni cegu: ni sa dua na rusa levu sa ramusu kina na gonealewa ni noqu tamata, ni sa yaviti vakaca sara.

18Kevaka kaʼu sa lako yani ki na were, raica, na vuetaki e nai seleiwau ka ra sa no! kevaka kaʼu sa curu yani ki na koro, raica, na mate e na viakana ka ra sa no! io, ko ira vata na parofita kei na bete era sa laʼki vosai voli ga ki na vanua era sa lecava.

19Se ko sa biuti ira na Juta sara beka? ia ko ira na Saioni, sa vakasisilataka beka na yalomu? a cava ko sa yaviti keimami, me keimami sega ni vakabulai tale kina? keimami a yadrava na vakacegu, ka sa sega e dua na ka vinaka; kei na gauna ni veivakabulai, ka, raica, sa ka rarawa ga!

20Keimami sa vakatusa, Jiova, na neimami ca, kei na caka cala ni neimami qase: ni keimami sai valavala ca vei iko.

21Mo kakua ga, e na vuku ni yacamu, ni ko cati keimami, mo kakua ni vakarogocataka na nomui tikotiko vakaiukuuku: mo nanuma, kakua ni vakatawayagataka na nomu veiyalayalati kei keimami.

22Se dua beka e na nodra ka lasu na veimatanitu me vakatauca na uca? se na lomalagi, sa solia rawa beka na uca? se ko iko duaduaga, Jiova, na neimami Kalou? ia keimami na vakararavi kina vei iko: ni sai iko ga sa cakava na ka kece o qo.