Ai Vola I Jeremaia Na Parofita 18 - AI VOLA TABU（FIJ1864）

Me vaka na dautuli bilo sa veitaliataka na tete, sa veitalia vakakina ko Jiova ki na veimatanitu, 1-10. Era na cudruvi na kai Jutia e na vuku ni ra sa vuki tani vakalialia, 11-17. Sa masulaki koya ko Jeremaia vua na Kalou ni ra sa vakacacani koya ko ira na kai Jutia, 18-23.

1A VOSA sa yaco vei Jeremaia maivei Jiova, ka vaka,

2Mo tu cake, ka lako sobu ki na nona vale na dautuli bilo, ia maikea kaʼu na vakarogotaka vei iko na noqu vosa.

3Au a qai lako sobu ki na nona vale na dautuli bilo, ka, raica, sa ia tiko e dua na cakacaka e na kenai tutu-wiri.

4A sa ca-taki na bilo sa cakava, ni sa tete tu, e na liga i koya na dautuli bilo: a sa baki cakava tale me bilo tani, me vaka sa vinaka vua na dautuli bilo me cakava.

5Sa qai yaco vei au na vosa i Jiova, ka vaka,

6Meʼu sa sega beka ni rawata me cakavi kemudou, na mataqali i Isireli, me vaka na dautuli bilo o qo? sa kaya ko Jiova, Raica, me vaka na tete e na liga i koya na dautuli bilo, sa vakakina koi kemudou e na ligaqu, na mataqali i Isireli.

7A tiki-ni-siga kaʼu na vosa e na vuku ni dua na vanua, se dua na matanitu, me cavuta, ka basuka, ka vakarusa;

8kevaka ena lesu na vanua ko ya mai na nodra ca, kaʼu sa vosa oti me ra ca kina, kaʼu na qai veivutunitaka na ca kaʼu a nanuma me cakava vei ira.

9Ia na tiki-ni-siga kaʼu na vosa e na vuku ni dua na vanua, se dua na matanitu, me tara, ka tea;

10kevaka ena caka ca e mataqu, me sega ni vakarorogo ki domoqu, kaʼu na qai veivutunitaka na vinaka, kaʼu,, a vosa meʼu cakava me ra vinaka kina.

11Ia o qo, mo mani vosa vei ira na kai Juta, kei na lewe i Jerusalemi, ka kaya, Sa vosa vakaoqo ko Jiova; Raica, au sa tulia na ca kei kemudou, ia kaʼu sa vakananuma e dua na lewa e na vukumudou: dou dui lesu mada mai na nomudou sala ca, ka vakavinakataka na nomudou sala kei na nomudoui valavala.

12A ra sa kaya, Sa sega sara ni yaga: keimami na muria ga na neimami lewa, ia na nanuma ni dui lomaimami ca keimami na dui cakava.

13O koya o qo sa vosa vakaoqo kina ko Jiova; Dou tarotaroga mada vei ira na veimatanitu, se ko cei sa rogoca na ka vakaoqo: sa dua na ka rerevaki sara sa cakava ko koya na gonealewa ni Isireli.

14E dua beka me vakalaiva na uca-vulavula ni Lipanoni me kenai sosomi na wai mai na uluvatu ni vanua? se me biu beka na wai liliwa sa drodro tu me kenai sosomi na wai ni dua na tikina tani?

15ka ni ra sa guilecavi au na noqu tamata, ia ki na ka lasu era sa vakacaudreva kina na ka boi vinaka, a ra sa cakavi ira me tarabe e na nodra sala, ka sa biu ga nai lakolako makawa, me muria na gau-ni-sala sa sega ni buluti;

16me cakava kina na nodra vanua me lala, me vakalialiai ka tawa mudu; o ira kece era lako voli yani era na kidacalataka, ka kurea na uludra.

17Me vaka e na cagi mai cake kaʼu na vakatolosevi ira kina e na mata ni meca; kaʼu na vakanadaku, ka tawa vakanamata vei ira e na siga ni nodra rarawa.

18Era sa qai kaya, Me da mai bukia na vere kei Jeremaia; ni na sega ni yali na vunau mai vua na bete, se nai vakavuvuli mai vua na vuku, se na vosa mai vua na parofita. Me da mai yaviti koya e na vuku ni yamena, ia me da kakua ni vakarorogo ki na dua na nona vosa.

19Golevi au mai, Jiova, ka rogoca na domodra era veileti kei au.

20Me saumi beka na vinaka e na ca? ka ni ra kelia nai keli meʼu mate kina. Mo nanuma niʼu a tu e matamu meʼu vosa vinaka e na vukudra, me saumaka tani na nomu cudru vei ira.

21O koya mo solia kina na luvedra me viakana, ka vakadavea na kedra dra e na kaukauwa ni seleiwau; ia na watidra, me yali vei ira na luvedra, me ra alewa dawai talega; ka ra vakamatei na nodra tagane; na nodra cauravou, me ra moku e nai seleiwau e nai valu.

22Me rogo na tagi mai na nodra vale, ni ko sa vakayacora nai valu vei ira me vakasauri: e na vuku ni ra sa kelia nai keli me rawai au; ia nai cori, era sa vunia me tacori kina na yavaqu.

23Io ko iko, Jiova, ko sa kila kece na nodra veretaki au meʼu mate: mo kakua ga ni buluta na nodra caka cala, ia na nodrai valavala ca mo kakua ni bokoca tani mai matamu, ia me ra vakabalei sobu ga e matamu; e na gauna ni nomu cudru mo qai ia vei ira.