1SA kalougata ko ira e dodonu sara na nodra sala, era muria na vunau i Jiova.
2Sa kalougata ko ira era vakabau ta na nona vosa, era qarai koya e na lomadra taucoko.
3Era sa sega talega ni caka cala: era lako ga e nona sala.
4O sa vakaroti keimami me vakabauta sara na nomui vakaro.
5Me vakadodonutaki mada na noqu sala me vakabauta na ka ko a lesia me caka!
6Au na qai sega ni madua, niʼu sa qarava na nomu vunau kecega.
7Au na vakavinavinaka vei iko e na yalododonu, niʼu sa vulica oti na nomu lewa dodonu.
8Au na vakabauta na nomui lesilesi: mo kakua mada ni biuti au laivi yani.
PECA.9Ena vakasavasavataka vakaevei na nona sala na cauravou? ni sa qarauna ga me vaka na nomu vosa.
10E na yaloqu taucoko kaʼu sa qarai iko: meʼu kakua mada ni lako sese tani mai na nomu vunau.
11Au sa vunia oti na nomu vosa e lomaqu, meʼu kakua kina ni valavala ca vei iko.
12O sa kalougata, Jiova: mo vakavulica vei au na nomui lesilesi.
13Au sa tukuna oti e na tebenigusuqu na ka kecega sa lewa na gusumu.
14Au sa reki e nai valavala ni nomu vosa, me vaka e nai yau kecega.
15Au na vakanananu ki na nomui vakaro, ka goleva tiko na nomu sala.
16Au na rekitaki au e na vuku ni nomu vunau: au na sega ni guilecava na nomu vosa.
KIMELA.17Mo caka vinaka vua na nomu tamata, meʼu bula, ka vakabauta na nomu vosa.
18Mo vakamataraitaki au, meʼu kunea na ka veivakidacalataki e na nomu vunau.
19Au sa vulagi e vuravura: mo kakua ni vunia vei au na nomu vunau.
20Sa kacabote na yaloqu e na vuku ni sa domona e na veisiga kecega na nomu lewa.
21O sa vunauci ira na viavialevu era sa cudruvi, ko ira era sa lako sese tani mai na nomu vunau.
22Mo vaqiqica tani vei au na veivakalialiai kei na veibeci; niʼu sa qarava oti na nomu vunau.
23Ka ra tiko talega na turaga, ka vosacataki au: ia na nomu tamata, sa vakanananu tiko ki na nomui lesilesi.
24A nomu vosa talega na ka kaʼu marautaka, ka bose vata kaya.
TELECA.25Sa kabita na soso na yaloqu: mo vakabulai au me vaka na nomu vosa.
26Au a tukuna na noqu sala, ia ko a vakarorogo vei au: mo vakavulica vei au na nomui lesilesi.
27Mo vakavukui au meʼu kila nai valavala ni nomui vakaro: au na tukuna kina na nomu cakacaka vakurabui.
28Sa waicala na yaloqu ni sa bitaki: mo vakaukauwataki au me vaka na nomu vosa.
29Mo kauta tani vei au nai valavala lasu: ka solia walega vei au na nomu vunau.
30Au sa digitaka oti nai valavala dina: au sa tauca e mataqu na nomu lewa.
31Au sa kabita na nomu vosa: mo kakua ni laivi au, Jiova, me vakamaduataki.
32Au na cici e na sala ni nomu vunau, ni ko na vakalevutaka na yaloqu.
HI.33Mo vakavulica vei au, Jiova, nai valavala ni nomui lesilesi; kaʼu na qai vakabauta ka yacova nai vakataotioti.
34Mo vakavukui au kina, kaʼu na qai cakava na nomu vunau; io, kaʼu na vakabauta e na lomaqu kece.
35Mo kauti au e na sala ni nomu vunau; niʼu sa rekitaka.
36Mo vaqara na lomaqu ki na nomu vosa, ia me kakua ki nai yau.
37Mo tarova na mataqu me kakua ni raica na ka lasu; mo vakaukauwataki au e na nomu sala.
38Mo vakayacora na nomu vosa vua na nomu tamata, o koya sa rerevaki iko tikoga.
39Mo kauta tani na qaui rogo ca, a ya kaʼu sa rerevaka: ni sa vinaka na ka ko sa lewa.
40Raica, kaʼu sa daudomona na nomui vakaro: mo vakaukauwataki au e na nomu yalododonu.
VAU.41Ia me yacovi au, Jiova, na nomu yalololoma; na bula ko sa solia, me vaka na nomu vosa.
42Ena qai dua na vosa meʼu tauca vua sa vosacataki au: niʼu sa vakararavi e na nomu vosa.
43Ia mo kakua ni kauta laivi na vosa dina mai na gusuqu; niʼu a namaka tiko na nomu lewa.
44Ia kaʼu na vakabauta tikoga kina na nomu vunau ka tawa mudu.
45Au na lako lalaga voli: niʼu sa qarava na nomui vakaro.
46Ia kaʼu na vosataka talega ua nomu vunau e na matadra na tui, ia kaʼu na tawa madua kina.
47Ia kaʼu na marautaki au e na nomu vunau, a ya kaʼu sa daulomana.
48Ia kaʼu na laveta talega na ligaqu ki na nomu vunau, a ya kaʼu sa daulomana; ia kaʼu na vakanananu ki na nomui lesilesi.
SAYINI.49Mo nanuma na nomu vosa vua na nomu tamata, a ya ko sa cakavi au meʼu namaka kina.
50O qo na ka kaʼu vakacegu kina e na noqu rarawa: ni sa vakaukauwataki au na nomu vosa.
51Era sa vakalialiai au vakalevu na viavialevu: ia kaʼu sa sega ni lako tani e na nomu vunau.
52Au sa nanuma na nomu lewa eliu, Jiova; a sa vakalecataki au.
53Sa tauvi au na rise ni kete, e na vukudra nai valavala ca era sa biuta na nomu vunau.
54A nomui lesilesi na ka kaʼu sa meketaka tiko, e na noqu vale kaʼu vulagi kina.
55Au sa daunanuma na yacamu, Jiova, e na bogi, ia kaʼu sa vakabauta na nomu vunau.
56O qo na noqu ka ni marau, niʼu a cakava na nomui vakaro.
KECA.57 O iko na noqui votavota, Jiova: au sa kaya oti niʼu na vakabauta na nomu vosa.
58Au a masuta na nomu loloma e na yaloqu kecega: mo lomani au me vaka na nomu vosa.
59Au a vakanananu ki na noqui valavala, ka vakalesuya na yavaqu ki na nomu vosa.
60Au a vakusakusa, ka sega ni vakaberabera ni vakabauta na nomu vunau.
61A nodrai vau nai valavala ca sa voliti au: ia kaʼu sa sega ni guilecava na nomu vunau.
62E na veimama ni bogi kaʼu na tu cake ka ia na vakavinavinaka vei iko e na vuku ni nomu lewa dodonu.
63Au sa nodrai tokani kecega era sa rerevaki iko, kei na nodra era sa vakabauta na nomui vakaro.
64Sa roboti vuravura, Jiova, na nomu yalololoma: mo vakavulica vei au na nomui lesilesi.
TECA.65O sa caka vinaka, Jiova, vua na nomu tamata, me vaka na nomu vosa.
66Mo vakavulici au e na lewa vinaka kei na vuku: niʼu sa vakabauta na nomu vunau.
67Eliu, niʼu a sega ni tauvi mate, kaʼu a lako sese: ia o qo, kaʼu sa qai vakabauta na nomu vosa.
68Ko sa yalovinaka, ka caka vinaka; mo vakavulica vei au na nomui lesilesi.
69O ira na viavialevu, era sa tulia na lasu vei au: ia kaʼu na cakava ga na nomui vakaro e na lomaqu kece.
70Sa vaka dina na uro na yalodra; ia koi au kaʼu sa marautaka na nomu vunau.
71Sa yaga vei au niʼu a tauvi mate; meʼu vulica kina na nomui lesilesi.
72Sa vinaka vei au na vunau ni gusumu ka ca na tiki ni siliva kei na koula e vakaudolu.
YOTA.73Sa cakavi au na ligamu, ka buli au: mo vakavukui au meʼu vulica na nomu vunau.
74O ira sa rerevaki iko era na reki ni ra raici au; e na vuku niʼu sa namaka me yaco na nomu vosa.
75Au sa kila, Jiova, ni sa dodonu na nomu lewa, ni ko a caka dina talega ni ko a vakararawataki au.
76Me vakalecataki au na nomu yalololoma, me vaka na nomu vosa vua na nomu tamata.
77Me yacovi au na nomu loloma levu, meʼu bula: ni sa noqu vu ni reki na nomu vunau.
78Me ra vakamaduataki na viavialevu; ni ra sa cakacaka vakailasu walega: ia koi au kaʼu na vakanananu tiko ki na nomui vakaro.
79Me ra lesu mai vei au ko ira era rerevaki iko, kei ira era sa kila na nomu vosa.
80Me dodonu sara na lomaqu e na nomui lesilesi, meʼu kakua ni madua kina.
RAFA.81Sa ceguoca na yaloqu mo vakabulai au: ia kaʼu na namaka ga na nomu vosa me yaco.
82Sa oca na mataqu ni sa waraka na nomu vosa, ka kaya, Evei na siga ko na vakalecataki au kina?
83Niʼu sa vaka na tavaya kuli-ni-manumanu e na kubou; ia kaʼu sa sega ga ni guilecava na nomui lesilesi.
84E vica na nona siga na nomu tamata? o na cudruvi ira ninaica era sa vakacacani au?
85Era kelia nai keli meʼu lutu kina ko ira na viavialevu, a ya sa sega ni vaka na nomu vunau.
86Sa ka dina na nomui vakaro kecega: era sa vakacacani au tawa dodonu; mo vukei au.
87Era kolai vakaotia na noqu bula e vuravura; ia koi au kaʼu a sega ni biuta na nomui vakaro.
88Mo vakaukauwataki au me vaka na nomu yalololoma; au na vakabauta tiko kina na vosa ni gusumu.
LAMETA.89I Jiova, na nomu vosa sa vakataudeitaki mai lomalagi me tawa oti rawa.
90A nomu lomadina sa yacova nai tabatamata kecega: o a vakataudeitaki vuravura, a sa tu ga:
91sa tu ga edaidai me vaka na nomu lewa; ni sa nomui talatala na ka kecega.
92Kevaka kaʼu a sega ni marautaka na nomu vunau, kaʼu a rusa sara e na noqu rarawa.
93Au na tawa mudu ni nanuma na nomui vakaro: ni ko sa vakaukauwataki au kina.
94Kaʼu sa nomu, mo vakabulai au; niʼu sa qara na nomui vakaro.
95Era waraki au nai valavala ca me vakarusai au; ia kaʼu na vakanananu ki na nomu vosa.
96Au sa kunea nai otioti ni ka talei kecega: ia na nomu vunau ga sa rabailevu sara.
MEMI.97A ka vakaidina na noqu loloma ki na nomu vunau! au sa vakanananu kina e na siga kecega.
98E na nomu vunau ko sa cakavi au me vuku vei ira na noqu meca: ni sa tikotiko ga kei au.
99Au sa vuku a ra sa lialia kecega era vakavulici au: niʼu sa vakanananu ki na nomu vosa.
100Au sa vuku ka ra lialia na qase, e na vuku niʼu sa cakava na nomui vakaro.
101Au sa dauvakadaroya na yavaqu mai na sala ca kecega, meʼu vakabauta kina na nomu vosa.
102Au sa sega ni lako tani e na ka ko a lewa: ni ko sa vakavulici au.
103A kena kamikamica na nomu vosa ki na gusuqu! io, na oni sa tawa kamikamica e na gusuqu!
104E na vuku ni nomui vakaro kaʼu sa vuku mai: o koya kaʼu sa cata kina na sala lasu kecega.
NUNI.105A nomu vosa na cina ki na yavaqu, kei na rarama ki na noqu sala.
106Au sa vavakini oti, au na vakayacora talega, ka meʼu vakabauta na nomu lewa dodonu.
107Au sa rarawa vakalevu sara: mo vakaukauwataki au, Jiova, me vaka na nomu vosa.
108Mo donuya mada, Jiova, nai madrali ni gusuqu kaʼu sa cabora, ka vakavulica vei au na nomu lewa.
109Sa tutu ga e ligaqu na noqu bula: ia kaʼu sa sega ni guilecava na nomu vunau.
110Era sa kitaka vei au na tudai ko ira nai valavala ca: ia kaʼu a sega ni lako sese mai na nomui vakaro.
111Au sa taura na nomu vosa me noqui votavota e tawa mudu: ni sa ka e rekitaka na lomaqu.
112Au sa vaqara na lomaqu me cakava tiko na nomui lesilesi, ka yacova nai vakataotioti.
SAMEKI.113Au sa cata na vakanananu wale: ia na nomu vunau kaʼu sa lomana.
114O iko na noqui vunivuni kei na noqui vakaruru: au sa vakararavi ki na nomu vosa.
115Bou lako tani vei au, nai valavala ca: niʼu na vakabauta na vunau ni noqu Kalou.
116Mo tokoni au me vaka na nomu vosa, meʼu bula: ia meʼu kakua ni vakamaduataki e na ka kaʼu sa vakararavi kina.
117Mo tauri au tiko, kaʼu na qai vinaka: ia kaʼu na vakaraica tikoga na nomui lesilesi.
118O sa buturaki ira kecega era sa lako tani e na nomui lesilesi: ni sa ka lasu na nodra dauveivakaisini.
119O sa biuti ira tani nai valavala ca kecega e vuravura me vaka na de ni kaukamea: o koya kaʼu sa lomana kina na nomu vosa.
120Sa sautaninini na lewequ e na rere vei iko; ia kaʼu sa rerevaka na nomu lewa.
AYINI.121Au sa kitaka na lewa dodonu kei na cakacaka dodonu: mo kakua ni laivi au vei ira era vakasaurarataki au.
122Mo totaki koya na nomu tamata meʼu vinaka: me kakua ni vakasaurarataki au ko ira na viavialevu.
123Sa oca na mataqu ni sa waraka na bula sa maivei iko: kei na vosa ni nomu caka dodonu.
124Mo cakacaka vua na nomu tamata me vaka na nomu yalololoma, ka vakavulica vei au na nomui lesilesi.
125Kaʼu sa nomu tamata; mo vakavukui au meʼu kila na nomu vosa.
126A gauna o qo, Jiova, e dodonu mo cakacaka kina: ni ra sa vakacataka na nomu vunau.
127O koya kaʼu sa lomana kina na nomu vunau ka cata na koula; io, na koula dina sara.
128Niʼu sa vakadonuya na nomui vakaro kecega e na vuku ni ka kecega; ia kaʼu sa cata nai valavala lasu kecega.
PE.129A ka vakurabui na nomu vosa, o koya sa vakabauta kina na yaloqu.
130Ni sa vakamacalataki na nomu vosa sa qai rarama mai; sa vakavukui kina ko ira era tawa vuku.
131Au a dalaga na gusuqu, ka ceguoca: niʼu a domona na nomu vunau.
132Mo golevi au mai, ka lomani au, me vaka na nomui valavala vei ira era daulomana na yacamu.
133Mo vakarautaka na noqui lakolako e na nomu vosa: ia me kakua ni gumatua vei au e dua na ka ca.
134Mo vakabulai au mai nai valavala kaukauwa ni tamata: au na vakabauta kina na nomui vakaro.
135Me cilavi koya na nomu tamata na matamu; ka vakavulica vei au na nomui lesilesi.
136Na uciwai sa dave mai na mataqu, e na vuku ni ra sa sega ni vakabauta na nomu vunau.
SATI.137O sa yalododonu, Jiova, a sa dodonu na nomu lewa.
138A vunau ko sa rotaka sa dodonu ka dina sara.
139Sai kani au na noqu lomakatakata, ni ra sa guilecava na nomu vosa ko ira na noqu meca.
140Sa savasava sara na nomu vosa: o koya sa lomana kina na nomu tamata.
141Au sa ka lailai ka beci: ia kaʼu sa sega ni guilecava na nomui vakaro.
142A nomu yalododonu na ka dodonu sa tawa mudu, ia na nomu vunau na ka dina.
143Sa tauri au na rarawa kei na yaluma: ia kaʼu sa rekitaka ga na nomu vunau.
144A kena dodonu na nomu vosa sa tawa mudu rawa: mo, vakavukui au, kaʼu na bula kina.
KOFA.145Au a tagi e na yaloqu kece; mo rogoci au, Jiova: au na vakabauta na nomui lesilesi.
146Au a tagi vei iko; mo vakabulai au, meʼu vakabauta kina na nomu vosa.
147Au a souta na tagi vei iko ni sa bera ni kida na mataka: au a namaka na nomu vosa.
148Sa liu na mataqu a sa bera na veitiki ni bogi, meʼu vakanananu ki na nomu vosa.
149Mo rogoca na domoqu, me vaka na nomu yalololoma: i Jiova, mo vakaukauwataki au me vaka na nomu vosa.
150Era voleka mai ko ira era muria nai lawaki ca: era sa yawa ki na nomu vunau.
151Ko sa voleka, Jiova; a sa dina na nomu vunau kecega.
152E navuku ni nomu vunau, au sa kila makawa ni ko a vakataudeitaka me tawa oti rawa.
RESI.153Mo raica na noqu rarawa, ka vakabulai au: niʼu sa sega ni guilecava na nomu vunau.
154Mo vosa e na vukuqu, ka vakabulai au: mo vakaukauwataki au mo vaka na nomu vosa.
155Sa yawa vei ira nai valavala ca na bula: ni ra sa sega ni qara na nomui lesilesi.
156Sa vuqa na nomui valavala loloma, Jiova: mo vakaukauwataki au me vaka na nomu lewa.
157Era lewe vuqa era sa vakacacani au, a sa noqu meca; ia kaʼu sa sega ni lako vakatani ki na nomu vosa.
158Au a raici ira na daube, a sa rarawa; e na vuku ni ra sa sega ni vakabauta na nomu vosa.
159Mo raica na noqu loloma ki na nomui vakaro: mo vakaukauwataki au, Jiova, me vaka na nomu yalololoma.
160Sa dina mailiu sara na nomu vosa: a sa tawa mudu rawa e dua na nomu lewa dodonu.
SINI.161Era sa vakacacani au walega na turaga: ia ka sa rerevaka na nomu vosa na lomaqu.
162Kaʼu sa rekitaka na nomu vosa, me vaka e dua sa kunea nai yau levu.
163Au sa cata ka vakasisilataka na lasu: ia na nomu vunau kaʼu sa lomana.
164E vakavitu e na veisiga na noqu vakavinavinaka vei iko e na vuku ni nomu lewa dodonu.
165A ka levu na nodra vakacegu era lomana na nomu vunau: a sa sega na ka me ra bale kina.
166I Jiova, kaʼu sa namaka na bula maivei iko, a sa daucakava na nomu vunau.
167A sa vakabauta na nomu vosa na yaloqu; ia kaʼu sa lomana vakalevu.
168Au sa dauvakabauta na nomui vakaro kei na nomu vosa: ni sa tu e mataqu na nomu sala kecega.
TAU.169Me yaco ki na matamu na noqu tagi, Jiova: mo vakavukui au me vaka na nomu vosa.
170Me curu ki na matamu na noqu vakamamasu: mo vakabulai au me vaka na nomu vosa.
171Ena cavuta na vakavinavinaka na tebenigusuqu, ni ko sa vakavulici au oti e na nomui lesilesi.
172Ena vosataka na nomu vosa na yamequ: ni sa dodonu na nomu vunau kecega.
173Me vukei au na ligamu; niʼu sa digitaka oti na nomui vakaro.
174Au sa daudomona na bula maivei iko, Jiova; au sa rekitaka talega na nomu vunau.
175Me bula na yaloqu, me vakavinavinaka vei iko; ia me vukei au na nomu lewa.
176Au sa daulako sese me vaka na sipi sa yali; mo qara na nomu tamata; niʼu sa sega ni guilecava na nomu vunau.
Who We AreWhat We EelieveWhat We Do
2025 by iamachristian.org,Inc All rights reserved.
