Meke 118 - AI VOLA TABU（FIJ1864）

Me vakavinavinaka vua na Kalou e na vuku ni nona loloma, 1-4. A ka vinaka na vakararavi vei Jiova, 5-18. Sa tukuni na lako mai i Jisu, kei na nona matanitu, 19-29.

1DOU vakavinavinaka vei Jiova; ni sa yalovinaka: ni sa tawa mudu na nona loloma.

2Me kaya ga ko ira na Isireli, ni sa tawa mudu na nona loloma.

3Me kaya ga na mataqali i Eroni, ni sa tawa mudu na nona loloma.

4Me ra kaya ko ira era rerevaki Jiova, ni sa tawa mudu na nona loloma.

5Au a masuti Jiova niʼu a rarawa: a sa vakarorogo vei au ko Jiova, ka sa vakalalagataki au.

6Sa totaki au ko Jiova; kaʼu na tawa rere: a cava beka me ra kitaka vei au na tamata?

7Sa totaki au vata ko Jiova kei ira era vukei au: o koya kaʼu na kunea kina ni ra ca era sa cati au.

8Sa vinaka na vakararavi vei Jiova ka ca na vakararavi ki na tamata:

9sa vinaka na vakararavi vei Jiova ka ca na vakararavi vei ira na turaga.

10Era vakavolivoliti au na lewe ni veivanua: ia e na yaca i Jiova kaʼu na vakarusai ira.

11Era vakavolivoliti au; io era sa voliti au: ia e na yaca i Jiova kaʼu na vakarusai ira.

12Era sa vakavolivoliti au me vaka na lagotavuivui ka ta; era sa bokoci me vaka na buka dolou: ia e na yaca i Jiova kaʼu na vakarusai ira.

13O sa biliraki au vakaukauwa meʼu bale kina: a sa vukei au ko Jiova.

14Sa noqu kaukauwa kei na noqu meke ko Jiova, a sa yaco me noqui vakabula.

15A domo ni reki kei na veivakabulai sa tiko e nodra veivale na yalododonu: sa gumatua na liga i matau i Jiova.

16A liga i matau i Jiova sa cecere: a liga i matau i Jiova sa gumatua.

17Au na sega ni mate, au na bula ga, ka tukuna tiko na cakacaka i Jiova.

18Sa vakanakuitataki au vakalevu ko Jiova: a sa sega ni laivi au meʼu mate.

19Dou dolava vei au na matamata-ni-koro ni yalododonu: au na curu kina, ka ia na vakavinavinaka vei Jiova:

20o qo na matamata-ni-koro i Jiova, era daucuru kina na yalododonu.

21Au na vakavinavinaka vei iko; ni ko a vakarorogo vei au, a sa yaco me noqui vakabula.

22A vatu era sa cata ko ira na matai ni vale sa yaco mei teteki e na tutu ni vale.

23O qori na cakacaka i Jiova: a sa ka e veivakidacalataki e na matada.

24O qo na siga sa lesia ko Jiova; eda na reki ka marau kina.

25Au masuti iko, Jiova, mo ia mada na veivakabulai: au masuti iko, Jiova, mo ia mada na veivakalougatataki.

26Sa kalougata ko koya sa lako mai e na yaca i Jiova: keimami sa vakalougatataki kemudou mai na vale i Jiova.

27O Jiova na Kalou, o koya sa vakararamataki keda: dou vauca nai soro e na dali ki nai tautauri ni cabocabo-ni-soro.

28O iko na noqu Kalou, kaʼu na vakavinavinaka vei iko: o iko na noqu Kalou, kaʼu na vakacaucautaki iko.

29Dou ia na vakavinavinaka vei Jiova, ni sa yalovinaka: ni sa tawa mudu na nona loloma.