Meke 115 - AI VOLA TABU（FIJ1864）

Sa lewa na Kalou, 1-3, ka sa ka wale na matakau, 4-8, o koya o qo me da vakararavi vua na Kalou, 9-11, ka vakavinavinaka, 12-18.

1ME kakua vei keimami, Jiova, me kakua vei keimami, me ia ki na yacamu ga na vakavinavinaka, e na vuku ni nomu loloma, kei na nomu yalodina.

2Me ra kaya e na vuku ni cava na veimatanitu, Sa evei mada na nodra Kalou?

3Ia na noda Kalou sa tiko mai lomalagi: sa cakava oti na ka kecega sa vinakata ko koya.

4A nodra matakau na siliva kei na koula, na cakacaka ni liga ni tamata.

5Era sa vakagusuna, a ra sa sega ni vosa rawa: era sa vakamatana, a ra sa sega ni rai rawa:

6era sa vakadaligana, a ra sa sega ni rogo rawa: era sa vakaucuna, a ra sa sega ni boi rawa:

7era sa vakaligana, a ra sa sega ni tara ka rawa: era sa vakayavana, a ra sega ni lako rawa: a ra sa sega talega ni tagi rawa e na nodrai tagitagi.

8O ira era cakava era na tautauvata kei ira; o ira kece talega era sa vakararavi vei ira.

9I Isireli, mo vakararavi vei Jiova: o koya ga na nodrai vukevuke kei na nodrai sasabai.

10Na mataqali i Eroni, dou vakararavi vei Jiova: o koya ga na nodrai vukevuke kei na nodrai sasabai.

11Oi kemudou sa rerevaki Jiova, dou vakararavi vei Jiova: o koya ga na nodrai vukevuke kei na nodrai sasabai.

12Sa daunanumi keda ko Jiova: ena vakalougatataki keda: ena vakalougatataka na mataqali i Isireli; ena vakalougatataka na mataqali i Eroni.

13Ena vakalougatataki ira era sa rerevaki Jiova, ko ira na lalai kei ira na lelevu.

14Ena vakalevutaki kemudou tiko ko Jiova, oi kemudou kei ira na luvemudou.

15Sa vakalougatataki kemudou ko Jiova o koya ka cakavi lomalagi kei vuravura.

16Sa lomalagi nei Jiova na lomalagi: a sa soli vuravura ko koya me nodra na luve ni tamata.

17Sa sega ni ira na mate me vakavinavinaka vei Jiova, sei ira kecega era lako sobu ki tiko lo.

18Ia koi keda ga, eda na vakavinavinaka vei Jiova mai na gauna o qo ka tawa mudu. Dou ia vei Jiova na vakavinavinaka.