Meke 111 - AI VOLA TABU（FIJ1864）

Me vakavinavinaka vua na Kalou sa vakaiukuuku ka dauloloma, 1-9. Sa tubu na vuku e na rere, 10.

1DOU ia vei Jiova na vakavinavinaka. Au na vakavinavinaka vei Jiova e na yalomu taucoko, e na nodrai soqosoqo na yalododonu, kei nai vavakoso lewe ni soro.

2A cakacaka i Jiova na ka levu, era qara me ra kila ko ira kecega era dauvinakata.

3A ka vakaturaga ka vakaiukuuku na nona cakacaka; a sa tawa mudu na nona yalododonu.

4Sa cakava me nanumi na nona cakacaka mana: sa daulomasoli ko Jiova ka yalololoma.

5Sa solia na kedra era sa rerevaki koya: ena nanuma tikoga na nona veiyalayalati.

6Sa vakatakila oti na kaukauwa ni nona cakacaka vei ira na nona tamata, me solia vei ira na veimatanitu me nodrai votavota.

7Sa dina ka dodonu na cakacaka ni ligana; sa vakadinadinataki na nonai vakaro kecega.

8Sa vakataudeitaki me tawa mudu rawa, a sa caka e na yalodina kei na yalododonu.

9Sa tala na bula ko koya vei ira na nona tamata: sa lesia na nona veiyalayalati me tawa mudu rawa: sa ka savasava ka rerevaki na yacana.

10Ai vakatekivu ni vuku na rerevaki Jiova: era sa yalomatua kecega era sa cakava na nona vunau: sa na tawa mudu rawa na ka me vakavinavinakataki kina ko koya.