Meke 109 - AI VOLA TABU（FIJ1864）

Sa tukuna ko Tevita na nona meca, 1-20; ka masu vua na Turaga, 21-31.Vua na Domo-ni-meke. A Meke i Tevita.

1MO kakua ni galu, na Kalou kaʼu dauvakavinavinaka kina;

2ni sa dalaga vei au na gusudra nai valavala ca kei na gusudra na dauveivakaisini: era sa vosataki au e na yame lasu;

3Era sa voliti au e na vosa veicati; ka veivala walega kei au.

4Era sa noqu meca mei sau ni noqu loloma: ia koi au, kaʼu masu ga.

5Era sa vakasuka mai na ka ca mei sau ni ka vinaka, kei na yaloca mei sau ni noqu loloma.

6Mo lesia na tamata ca me lewai koya: ia me tu mai na ligana i matau ko Setani.

7Ni sa lewai ko koya, me vakacalai ga: ia mei valavala ca ga na nona masu.

8Me kakua ni vuqa na nona siga; ia me dua tani me taura na nona cakacaka.

9Me kakua ni vakatamani na luvena, me alewa dawai talega na watina.

10Me luveniyali voli na luvena ka vosai kedra: me ra qara kedra mai na nodra vanua dausiga.

11Me kauta tani na nona ka kecega na daukove; ia me ra betiraka na nona cakacaka na kai tani.

12Me kakua e dua me yalololoma vua: ia me kakua e dua me lomana na luvena sa luveniyali.

13Me kawaboko na nona kawa; ia e nai tabatamata emuri me bokoci laivi na yacadra.

14Me nanuma ko Jiova na nodra tawa dodonu na tamana; ia me kakua ni bokoci nai valavala ca i tinana.

15Me tu ga e na mata i Jiova e na veisiga, me muduka tani mai vuravura na ka era nanumi kina.

16E na vuku ni sa tawa nanuma ko koya me ia na cakacaka loloma, a sa vakacacana ga na tamata sa rarawa ka dravudravua, me mokuta sara na tamata sa kavoro na yalona.

17Ni sa vinakata na ruru, sa yaco ga vua: ni sa sega ni vinakata na vosa vinaka, sa yawa sara vakakina vua.

18Ni sa vakasulumi koya e na ruru me vaka e nai sulu, sa curuma na ketena me vaka na wai, kei na suina me vaka na waiwai.

19Me vaka vua nai sulu sa ubi kina, kei nai vau ni sulu sa vauci tiko kina ko koya.

20Me cakacaka vakaoqo ko Jiova vei ira na noqu meca, kei ira era vosacataka na yaloqu.

21Ia ko iko, Jiova na Kalou, mo cakacaka e na vukuqu, e na vuku ni yacamu: ni sa yaga na nomu yalololoma, mo vakabulai au.

22Niʼu sa malumalumu ka dravudravua, a sa vuetaki e lomaqu na yaloqu.

23Au sa lako yani me vaka na yaloyalo ni sa kala na siga: au sa veikauyaki me vaka na vodre.

24Sa malumalumu na duruqu e na daulolo; a sa uru na yagoqu.

25Au a vosacataki talega vei ira: ni ra raici au era kurea na uludra.

26Mo vukei au, Jiova na noqu Kalou; mo vakabulai au me vaka na nomu yalololoma:

27me ra kila ni sa ligamu ga o qo; ni sai iko, Jiova, sa cakava.

28Me ra ruru ko ira, ia mo vosa vinaka: ni ra tu cake, me ra vakamaduataki; ia me reki ga na nomu tamata.

29Me ra vakaisulutaki e na madua na noqu meca, ia me ra solei tutuvi e na ka era madua kina, me vaka e nai sulu.

30Au na vakavinavinaka vakalevu vei Jiova e na gusuqu; io, kaʼu na meke vua e na kedra maliwa na lewe vuqa.

31Ni na tu ko koya mai na liga i matau ni dravudravua, me vakabulai koya maivei ira era sa cudruvi koya.