Meke 108 - AI VOLA TABU（FIJ1864）

Sa vakavinavinaka ko Tevita, a sa masulaki koya kei na nona vanua.A Meke se Sere i Tevita.

1NA Kalou, sa dei na yaloqu; au na meke ka vakavinavinaka, ia kaʼu na vakaiukuukutaka.

2Drau yadra mai, nai qiriqiri kei na api: ia koi au kaʼu na souta e na sabogibogi.

3Au na vakavinavinaka vei iko, Jiova, e na veimatanitu: au na meke vei iko e na kedra maliwa na veimataqali:

4ni sa yacova na lomalagi na nomu loloma e na kena levu: a sa yacova na o na nomu dina.

5Mo cecere, na Kalou, ki lomalagi: kei na nomui ukuuku ki vuravura kecega;

6me vakabulai kina ko koya ko sa lomana: mo vakabulai au e na ligamu i matau, ka rogoci au.

7Sa vosa oti na Kalou e na nona yalosavasava; au na rekitaka; au na votai Sikemi, ka vakarauta na buca mai Sukoci.

8Sa noqu ko Kiliati; sa noqu ko Manase; ai vakaruru ni uluqu ko Ifireimi: a noqu tamata daulewa ko Juta;

9a noqui silisili ko Moapi; ko Itomi, kaʼu na viritaka vua na noqui vava: kaʼu na kailataki Filistia.

10O cei ena kauti au ki na koro kaukauwa? o cei ena tuberi au cake ki Itomi?

11O iko, Kalou, se segai, o iko ka sa biuti keimami? ia ko iko, Kalou, ka sa sega ni lako yani kei na neimami valu?

12Mo vukei keimami mai na ka rarawa: ni sa tawa yaga na nodra veivuke na tamata.

13E navuku ni Kalou eda na gugumatua: ni sai koya ga ena buturaka sobu na noda meca.