Meke 107 - AI VOLA TABU（FIJ1864）

Me vakavinavinaka vua na Turaga, ni sa lewai ira vinaka na nona tamata, 1-3, ni ra veilakoyaki, 4-9; ni ra sa bobula, 10-16; ni ra sa tauvi mate, 17-22; ni ra sa soko, 23-32: ka sa solia na veika e yaga, 33-43.

1DOU ia vei Jiova na vakavinavinaka, ni sa yalovinaka: ni sa tawa mudu na nona loloma.

2Me ra kaya vakakina ko ira sa vakabulai ira oti ko Jiova, o ira sa vakabula oti ko koya mai na liga ni meca;

3a sa soqoni ira vata mai na veivanua, mai cake, mai ra talega, mai pa mata ni tokalau, kei na mata ni ceva.

4Era a lako sese voli mai na lekutu e na sala e tawa lakovi; era sega ni kunea na koro me tiko kina.

5A ra sa viakana ka viagunu, a sa waicala e lomadra na yalodra.

6Era sa qai tagi vei Jiova e na nodra rarawa, a sa vakabulai ira mai na nodra mosi.

7A sa kauti ira e na sala dodonu, me ra lako ki na koro me ra tiko kina.

8Me ra ia mada na vakavinavinaka vei Jiova e na vuku ni nona yalololoma, kei na nona cakacaka mana vei ira na luve ni tamata!

9Ni sa vakamamautaka na tamata sa garogaro, ka vakamamautaka na tamata e viakana e na ka vinaka.

10O ira era sa tiko e na butobuto kei na yaloyalo ni mate, ni sa vesuki e na rarawa kei na kaukamea;

11ni ra sa talaidredre ki na vosa ni Kalou, ka beca nai vakavuvuli i Koya na Cecere:

12o koya sa vakamalumalumutaka kina na lomadra e na ocaoca; era bale sobu, ka sa sega e dua me vukei ira.

13Era sa qai tagi vei Jiova e na nodra rarawa, a sa vakabulai ira mai na nodra mosi.

14Sa kauti ira tani mai na butobuto kei na yaloyalo ni mate, ka musulaka na nodrai vesu.

15Me ra ia mada na vakavinavinaka vei Jiova e na vuku ni nona yalololoma, kei na nona cakacaka mana vei ira na luve ni tamata!

16Ni sa musulaka nai sogo ni matamata-ni-koro parasa, ka tamusuka laivi na samugakagaka aironi.

17Na tamata lialia, e na vuku ni nodra talaidredre, kei na nodrai valavala ca, era sa tauvi mate.

18Sa cata na kakana kecega na lomadra; a ra sa torova na matamata-ni-koro ni mate.

19Era sa qai tagi vei Jiova e na nodra rarawa, a sa vakabulai ira mai na nodra mosi.

20Sa tala na nona vosa, ka vakabulai ira, ka kauti ira tani mai na ka era rusa kina.

21Me ra ia mada na vakavinavinaka vei Jiova e na vuku ni nona yalololoma, kei na nona cakacaka mana vei ira na luve ni tamata!

22Ia me ra cabora nai madrali ni vakamolimoli, ka marau ni ra tukuna na nona cakacaka.

23O ira sa lako sobu ki na wasawasa e na waqa vanua, ka kitaka na nodra cakacaka e na wai levu;

24o ira o qo era kunea na cakacaka i Jiova, kei na nona ka e veivakidacalataki e na wai titobu.

25Ni sa vosa ko koya, ka vakayacora na cagi me cava, ka sa tubu kina na kena biau.

26Era sa lako cake ki lomalagi, era sa lako sobu vakatitobu sara: sa waicala na lomadra e na nodra ca.

27Era suaigelegele ka yatayata me vaka na tamata sa mateni, a sa luvu na nodra vuku.

28Era sa qai tagi vei Jiova e na nodra rarawa, a sa kauti ira tani mai na nodra ca.

29Sa tarova na cava me maravu mai, a sa cegu na kena biau.

30Era sa qai marau ni ra sa cegu rawa; a sa kauti ira ko koya ki na toba era domona.

31Me ra ia mada na vakavinavinaka vei Jiova e na vuku ni nona yalololoma, kei na nona cakacaka mana vei ira na luve ni tamata!

32Me ra vakalevulevui koya talega e na nodrai soqosoqo na tamata, ka vakavinavinaka vua e na nodra tiko vata na qase.

33Sa vukica ko koya na uciwai me vanua talasiga, kei na vanua vakavure vure wai me vanua wai maca;

34a vanua bulabula me vanua dravuisiga, e na vuku ni nodra ca era tiko kina.

35Sa vukica na vanua dravuisiga me vanua vakadranodra-no, kei na vanua wai maca me vanua vaka-vurevure wai.

36A sa cakava me ra tiko kina era dausiga, me ra tara kina na koro me tiko kina;

37ka kaburaka na sila e na veiwere, ka tea na veivainivaini, me vuataka rawa na kena vuata.

38A sa vakalougatataki ira, ka ra sa vakaikuritaki vakalevu; a sa sega ni vakalailaitaka na nodra manumanu:

39ia era a lewe lailai ga, ka vakamalumalumutaki e na veivakasaurarataki, kei na tauvi mate, kei na ka rarawa.

40Sa beci ira vakalevu na turaga ko koya, a sa vakasesei ira me ra lako sese e na vanua lala, sa sega kina na sala.

41A sa laveta cake na kaisi mai na ka rarawa, a sa cakava me vakamataqali me vaka na qele ni sipi.

42Ena kunea, ka reki, ko ira na yalododonu: ia ena galu nai valavala ca kecega.

43O koya sa vuku, ka vakanananu ki na ka o qo, o koya ga ena kila na yalololoma i Jiova.