Meke 106 - AI VOLA TABU（FIJ1864）

Me ia na vakavinavinaka vua na Turaga, 1-3. Sa masu, 4-5. A nodra ca na qase i eliu, kei na loloma ni Kalou, 6-46. Sa masu ka vakavinavinaka, 47, 48.

1DOU ia vei Jiova na vakavinavinaka. Dou vakamolimoli vei Jiova; ni sa yalovinaka; ni sa tawa mudu na nona loloma.

2O cei sa cavuta rawa na cakacaka kaukauwa i Jiova? o cei sa rogotaka rawa na nona vinaka kecega?

3Sa kalougata ko ira era vakabauta na lewa dodonu, kei koya sai valavala dodonu e na gauna kecega.

4Mo nanumi au, Jiova, e na loloma ko sa daulomani ira kina na nomu tamata: mo lako mai vei au ka vakabulai au;

5meʼu kunea na kedra vinaka na tamata ko sa digitaka, meʼu marau e na nodra marau na nomu matanitu, meʼu lagilagi vata kei ira na nomui votavota.

6Keimami sa caka cala vata kei ira na neimami qase, keimami sa caka ka tawa dodonu, keimami sai valavala ca.

7Era a sega ni kila na nomu cakacaka mana na neimami qase mai Ijipita; era sega ni nanuma na kena levu ni nomu loloma; a ra sa vakacudrui koya mai na wasawasa, ia mai na Wasa Damudamu.

8Ia ka sa vakabulai ira ga ko koya e na vuku ni yacana, me vakatakila kina ko koya na nona kaukauwa.

9A sa vunauca na Wasa Damudamu ko koya, a sa maca mai: a sa tuberi ira ko koya e loma ni wai titobu, me vaka mai lekutu.

10A sa vakabulai ira mai na liga i koya sa cati ira, ia ka vakabulai ira mai na liga ni meca.

11A sa luvuca na nodra meca na wai: sa sega e dua vei ira sa vo.

12Era sa qai vakabauta na nona vosa; era meketaka vua na vakavinavinaka.

13Era sa guilecava vakasauri na nona cakacaka; era sega ni waraka na nona vosa:

14ka ra garogaro vakalevu ga mai na lekutu, ka vakatovolea vakaca na Kalou mai na veikau,

15A sa solia vei ira ko koya na ka era kerea; a sa tala na tutue ki na yalodra.

16A ra sa vuvutaki Mosese e nodrai tikotiko, kei Eroni na tamata yalododonu i Jiova.

17Sa kasei na vanua ka tilomi Tacani, ka ubia na mataqali i Epirami.

18A sa waqa mai e dua na buka e na nodrai soqosoqo; sa vakamai ira nai valavala ca na yameyame ni buka.

19Era sa cakava e dua na luve ni karavau mai Orepi, ka soro ki na matakau sa waicalataki me buli.

20A ra sa vukica na nodrai ukuuku, me tautauvata kei na karavau sa daukana co.

21A ra guilecava na Kalou na nodrai vakabula, o koya ka kitaka na ka levu mai Ijipita;

22na ka mana e na vanua i Ami, kei na ka rerevaki mai na Wasa Damudamu.

23A sa kaya kina me vakarusai ira, kevaka e sega ni tu e matana e na kedra maliwa ko Mosese na nona digitaki, me saumaka tani na nona cudru, me kakua ni vakarusai ira.

24Io, era a vakasisilataka na vanua domoni, era sega ni vakabauta na nona vosa:

25a ra sa didi e nodra veivale, ka sega ni vakarorogo ki na domo i Jiova.

26O koya sa dodoka kina na ligana vei ira, me vakabalei ira mai lekutu:

27me vakabalea talega na nodra kawa e na veimatanitu, ka dui vakasevi ira e na veivanua.

28Era sa vakabauti Peali-Piori talega, ka kania nai madrali vei ira na mate.

29A ra sa vakararawataki koya e na nodrai valavala: a sa tauvi ira na mate dauveiveitauvi.

30Sa qai tu cake ko Finiasi, ka cudruvi ira: a sa mudu kina na mate vei-veitauvi.

31A sa nanumi me nonai valavala dodonu ki nai tabatamata kecega e tawa mudu.

32Era sa vakacudrui koya talega mai na wai ni dauvere, a sa ca kina ko Mosese e na vukudra:

33ka ni ra sa vagagataka na yalona, a sa vosa cala kina na tebenigusuna.

34Era sa sega ni vakarusa na veimatanitu, ka vosa kina vei ira ko Jiova:

35a ra sa laʼki tiko vata kei ira na lewe ni vanua, ka vulica na nodrai valavala.

36A ra sa qarava na nodra matakau: a ra sa tacori kina.

37Io, era a cabora na luvedra tagane kei na luvedra alewa ki na tevoro,

38ka liviraka na dra tawa cala, io na kedra dra na luvedra tagane kei na luvedra alewa, o ya era cabora ki na matakau ni Kenani: a sa vakasisilataki na vanua e na vuku ni dra.

39Era sa dukadukali vakaoqo e na nodra cakacaka, ka laʼki dauyalewa e na nodrai valavala ca.

40A sa waqa kina na cudru i Jiova vei ira na nona tamata, a sa cata kina na nonai votavota.

41A sa soli ira ki na ligadra na veimatanitu; a sa lewai ira ko ira sa cati ira.

42A sa vakasaurarataki ira ko ira na nodra meca, a ra sa vakamalumalumutaki ki na ligadra.

43Sa vakabulai ira vakavuqa ko koya; ia ko ira, era sa dauvakacudrui koya e na ka era bosea, a ra sa vakamalumalumutaki e na vuku ni nodrai valavala ca.

44Ia ka sa raica ga ko koya na nodra rarawa, ni sa rogoca na nodra tagi:

45a sa nanuma e na vukudra na nona veiyalayalati, ka veivutuni me vaka na kena levu ni nona yalololoma:

46a sa cakava me ra lomani vei ira kecega era sa vakabobulataki ira.

47Mo vakabulai keimami, Jiova na neimami Kalou, ka soqoni keimami vata maivei ira na veimatanitu, me keimami ia kina na vakavinavinaka ki na yacamu tabu, me daureki talega e na vakavinavinaka vei iko.

48Me vakarokorokotaki ko Jiova; na nodra Kalou na Isireli mailiu sara ka yacova na gauna ena tawa mudu: ia me ra vakaemeni na tamata kecega. Dou ia vei Jiova na vakavinavinaka.