Meke 105 - AI VOLA TABU（FIJ1864）

Sa vakarota na vakavinavinaka vua na Kalou, e na vuku ni nona lewa, kei na nona cakacaka mana eliu.

1DOU ia na vakamolimoli vei Jiova; dou masuta na yacana: dou tukuna voli na nona cakacaka vei ira na tamata.

2Dou meke vua, dou seretaka vua na meke: dou veitukutukunitaka na nona cakacaka mana kecega.

3Dou vakacaucautaka na yacana tabu: me marau na lomadra era sa qaravi Jiova.

4Dou vakasaqarai Jiova, kei na nona kaukauwa: dou vakasaqara tikoga na matana.

5Dou nanuma na nona cakacaka vakidacala sa cakava ko koya; ia na nona ka mana, kei na lewa ni gusuna;

6oi kemudou na kawa i Eparaama na nona tamata, kei na luve i Jekope sa digitaka ko koya.

7O koya ga ko Jiova na noda Kalou: sa tiko na nona lewa e vuravura kecega.

8Sa tawa mudu ko koya ni nanuma na nona veiyalayalati, na vosa ka vunautaka me yacova nai tabatamata e udolu:

9na veiyalayalati o qori ka cakava kei Eparaama, kei na nona vosavavakini vei Aisake;

10a sa vakadeitaka vei Jekope me vunau, ia vei Isireli me veiyalayalati e sega ni oti:

11a sa kaya, Au na solia vei iko na vanua ko Kenani, nai yalayala ni nomui votavota:

12Ni ra sa tamata lewe lailai; io, ni ra lewe lailai sara, ka vulagi kina.

13Ni ra lako voli mai na vanua e dua ki na vanua e dua, mai na matanitu e dua ki na mataqali e dua;

14sa sega ni laivi ira ko koya me vakasaurarataki ira na tamata e dua: io, sa vunauci ira na tui e na vukudra;

15a sa kaya, Dou kakua ni tarai ira kaʼu sa lumuta, ia dou kakua ni vakacacani ira na noqu parofita.

16Sa kaciva talega na dausiga me kania na vanua: sa muduka kecega na kakana sa tokoni ira.

17Sa tala e dua na tamata ko koya me liutaki ira, io ko Josefa, o koya sa volitaki me bobula:

18era vakararawataka na yavana e nai vesu: sa lau ki yalona na kaukamea:

19a sa yaco mada na siga sa lako maikina na nona vosa: sa vakatovolei koya na vosa i Jiova.

20Sa talaki na tui ka sereki koya; io ko koya sa lewai ira na veimataqali, a sa laivi koya me lalaga.

21Sa lesi koya me turaga ni nona vale, me lewa na nonai yau kecega:

22me veitalia ga ni sa vesuki ira na nona tamata turaga; a me vakavukutaki ira na nona qase.

23A sa lako mai ko Isireli ki Ijipita; a sa tiko vulagi ko Jekope e na vanua i Ami.

24A sa vakalevutaki ira sara na nona tamata; a sa vakaukauwataki ira ka sa malumalumu na nodra meca.

25Sa saumaka na yalodra me cati ira na nona tamata, me vakaisini ira na nona tamata.

26Sa talai Mosese ko koya na nonai talatala; kei Eroni ka digitaka ko koya.

27Erau a vakatakila na nonai vakadinadina vei ira, kei na ka mana e na vanua i Ami.

28Sa tala ko koya na butobuto ka vakabutobutotaka; a ra sa sega ni talaidredre ki na nona vosa.

29Sa vukica na nodra wai me dra, ka vakamatea na nodra ika.

30Sa vakatubura vakalevu na boto na nodra vanua, e na nodra vale ni moce na nodra tui.

31Sa vosa ko koya, a sa lako mai na lago tani, kei na kutu e na nodra veiyasana kecega.

32Sa solia na uca-cevata mei sosomi ni uca, kei na yameyame ni buka e nodra vanua.

33Sa yavita talega na vaini kei na lolo; ka bola na kau ni nodra vanua.

34Sa vosa, a sa lako mai na vodre, kei na nuve, a sa tawa wiliki rawa,

35a sa kania kecega na co ni nodra vanua, a sa kania na vuata ni nodra were.

36Sa yavita kece talega na nodra ulumatua e na nodra vanua, o ya nai matai ni nodra kaukauwa kecega.

37A sa kauti ira yani na nona tamata a ra sa vakasiliva ka vakakoula: a sa sega e malumalumu e na nodra veimataqali:

38sa reki ko Ijipita ni ra lako tani: ni sa lutuki ira na rerevaki ira.

39Sa tevuka ko koya e dua na o me nodrai vakaruru; kei na buka me vakararamataki ira e na bogi.

40Era sa kerea, a sa kauta mai ko koya na toa ni veikau, ka vakamamautaki ira e na madrai ni lomalagi.

41Sa basia na uluvatu ko koya, a sa vure maikina na wai; sa dave e na vanua dravuisiga me vaka na uciwai.

42Ni sa nanuma ko koya na nona vosa tabu vei Eparaama na nona tamata.

43A sa kauti ira yani na nona tamata ka ra sa reki, ia na nona digitaki ka ra sa marau;

44a sa solia vei ira na nodra vanua na veimatanitu: a ra sa taukena na nodra cakacaka na tamata;

45me ra vakabauta kina na nona vunau, ka kitaka tiko na nona vosa. Dou ia vei Jiova na vakavinavinaka.