Meke 104 - AI VOLA TABU（FIJ1864）

Sa vakananuma na kaukauwa, 1-9, kei na lewa vinaka ni Kalou, 10-30. A sa vinakata me vakanananu tiko kina, 31-35.

1MO vakavinavinaka vei Jiova, na yaloqu. I Jiova na noqu Kalou, o sa levu vakaidina; o sa vakaisulu e na vakarokoroko kei na ka vakaturaga.

2O sa vakaisulutaki iko e na rarama me vaka e nai sulu: o sa birika na lomalagi me vaka na gatu:

3o sa kotora nai kaso ni nomu vale e na dela ni wai: o sa cakava na o mo nomu vale-vodoki: o sa lako voli e na taba ni cagi:

4o sa cakava na nomu agilose me ra vaka na cagi; na nomui talatala me yameyame ni buka.

5Sa vakataudeitaki vuravura ko koya e na kena yavu, me kakua ni yavala rawa ka tawa mudu.

6O a ubia e na wai titobu me vaka e nai tutuvi: sa cecere na wai ka lolovira na veiulu-ni-vanua.

7Ni ko a vunauca sa dro na wai; e na domo ni nomu kurukuru sa kusarawa ni lako tani:

8sa cabeta na veiulu-ni-vanua; sa lako sobu ki na qakilo ki na yasana ko a cakava me nodra.

9O a lesia na kenai yalayala me kakua ni sivia, me kakua ni lesu tale mo ubi vuravura.

10Sa vakatala ko koya na mata-ni-wai ki na buca, a sa lako voli e na tadrua ni veiulu-ni-koro.

11Sa vagunuvi kina na manumanu kecega ni vanua; sa gunu ka cegu na asa kila.

12Na batina, sa tiko kina na manumanu ni lomalagi, sa tagi tiko e na basaga ni kau.

13Sa vagunuva ko koya na veiulu-ni-vanua mai na nona vale ecake: sa vakamamautaki ko vuravura e na vua ni nomu cakacaka.

14Sa vakatubura ko koya na co me kedra na manumanu, kei na co e so me wereca na tamata: me vakatubura na kakana mai na qele;

15kei na waini, sa vakamarautaka na loma ni tamata, kei na votea sa lumilumisa kina na matana, kei na kakana sa kaukauwa kina na loma ni tamata.

16Na kau i Jiova, sa mamau e na kedra dra: ia na sitari mai Lipanoni, sa tea ko koya;

17era vakaisu kina na manumanu: ia na belo, sa nona vale na paini.

18Na veiulu-ni-vanua cecere sa nodrai drodro na koti kila; kei na nodra na kalavo na veiuluvatu.

19Sa lesia ko koya na vula ma wasewase kina na yabaki: a sa kila na kenai dromudromu na siga.

20O sa cakava na butobuto, a sa bogi kina; a sa yaqa voli kina na manumanu kecega ni veikau:

21sa tagica na kedra kakana na laioni cauravou, ka qara mai vua na Kalou na kedra kakana.

22Sa cadra na siga, era sa qai soqoni vata, ka laʼki koto e na nodra qara:

23sa lako yani na tamata ki na nona cakacaka, kei na ka e qarava, a sa kitaka tiko me yakavi mada.

24I Jiova, na ka tani na nomu cakacaka! o sa cakava vakavuku kecega: sa sinai ko vuravura e nomui yau.

25Sa vakakina na wasawasa levu o qo sa rabailevu, sa yaqa kina na ka e tawa wiliki rawa, na ka lalai kei na ka lelevu.

26Sa lako voli kina na waqa vanua: na livaiacani talega o qo, o koya ko a bulia me qito maikina.

27Era sa qaravi iko na ka kecega o qori, mo solia na kedra e na kena gauna.

28A ka ko sa solia vei ira era sa tomika: o sa sereka na ligamu, era sa mamau e na ka vinaka.

29O sa vunia na matamu, era sa kidroa: o sa kauta tani na nodra cegu, era sa mate, ka lesu tale me kuvu-ni-soso.

30O sa tala yani na Yalomu, era sa buli: ia ko sa vakavouya tale na dela i vuravura.

31Ena tawa mudu rawa nai rogo i Jiova: ena rekitaka na nona cakacaka ko Jiova.

32Sa raici vuravura ko koya, a sa tavuki: sa tara na veiulu-ni-vanua, a sa kubou mai.

33Au na meke vei Jiova niʼu sa bula tiko: au na vakavinavinaka ki na noqu Kalou e na noqu gauna sa vo.

34Ena kamikamica na noqu vakanananu vua: au na rekitaki Jiova.

35Me oti tani e vuravura na daucaka cala, ia me kakua ni vo tiko nai valavala ca. Mo vakavinavinaka vei Jiova, na yaloqu. Dou ia vei Jiova na vakavinavinaka.