Meke 103 - AI VOLA TABU（FIJ1864）

Me da vakavinavinaka sara vua na Kalou ni sa vakabulai keda, 1-13, ka sa tawa mudu na nona loloma, 14-22.A Meke i Tevita.

1MO vakavinavinaka vei Jiova, na yaloqu; ia na ka kecega sa tu e lomaqu me vakavinavinaka ki na yacana tabu.

2Mo vakavinavinaka vei Jiova, na yaloqu, ia mo kakua ni guilecava na nona ka ni loloma kecega:

3O koya sa bokoca na nomui valavala ca kecega, o koya sa vakabulai iko mai na nomu mate kecega;

4o koya sa vakabulai iko mai na rusa; o koya sa vakaisalataki iko e na loloma kei nai valavala loloma sara;

5o koya sa vakamamautaka na gusumu e na ka vinaka; sa vakavoutaki na nomu cauravou me vaka na nona na ikeli.

6Sa kitaka ko Jiova na ka dodonu kei na lewa vinaka e na vukudra kecega era sa vakasaurarataki.

7Sa vakatakila ko koya na nonai valavala vei Mosese, kei na nona cakacaka vei ira na luve i Isireli.

8Sa yalololoma ko Jiova ka daulomasoli, sa daubera ni cudru, ka daulevu na nona yalololoma.

9Ena sega ni ia tikoga na veivunauci: ena sega ni vakabauta tikoga na nona cudru.

10Sa sega ni cakacaka vei keda me vaka na nodai valavala ca; sa sega talega ni cudruvi keda me vaka na nodai valavala tawa dodonu.

11Ni sa vaka na kena cecere ki vuravura ko lomalagi, sa vakakina na kena levu ni nona yalololoma vei ira era sa rerevaki koya.

12Me vaka na kena yawa na vanua e cadra kina na siga ki na vanua e dromu kina na siga, sa vakayawataka ko koya vakakina vei keda na nodai valavala ca.

13Me vaka sa lomana na luvena na tamata, sa lomani ira, vakakina ko Jiova era sa rerevaki koya.

14Ni sa kila ko koya na nodai bulibuli; sa nanuma ga ni da sa kuvu-ni-soso.

15Ia na tamata, sa vaka na co na nona siga: me vaka na se ni kau ni vanua, sa se ka beta ka vakakina.

16Ni sa liwara na cagi, a sa yali; a sa sega ni kunei koya tale na nona yasana.

17Ia na yalololoma i Jiova sa mailiu sara ena tawa mudu talega vei ira era sa rerevaki koya, kei na nonai valavala dodonu, ki na luvedra na luvedra;

18vei ira era sa vakabauta na nona veiyalayalati, kei ira era sa nanuma tiko na nona vunau me cakava.

19Sa vakataudeitaka ko Jiova na nonai tikotiko vakaturaga mai lomalagi; a sa lewa na ka kecega na nona matanitu.

20Dou vakavinavinaka vei Jiova, na nona agilose, sa uasivi e na kaukauwa, a sa cakava na nona vunau, ni dou sa vakarorogo tiko ki na domo ni nona vosa.

21Dou vakavinavinaka vei Jiova, na nona ka lewe vuqa; oi kemudou na nonai talatala, sa kitaka tiko na nona veitalia.

22Dou vakavinavinaka vei Jiova, na nona cakacaka kecega, e na veiyasana kecega sa lewa kina ko koya: mo vakavinavinaka vei Jiova, na yaloqu.