Meke 96 - AI VOLA TABU（FIJ1864）

Sa vakarota na vakavinavinaka vua na Kalou, o koya me da doka.

1DOU meketaka vei Jiova na meke vou: dou meke vei Jiova, na vuravura kecega.

2Dou meke vei Jiova, dou vakavinavinaka ki na yacana; dou tukuna voli e na veisiga kece ni sa dauia na veivakabulai ko koya.

3Dou tukuna na nonai ukuuku e na veimatanitu, na nona ka mana vei ira na veimataqali kecega.

4Ni sa levu ko Jiova, ka sa dodonu me vakavinavinakataki vakalevu: me rerevaki vakalevu talega ka vakalailai na kalou kecega.

5Ni sa matakau walega na nodra kalou na veimatanitu: ia ko Jiova ga sa cakava na lomalagi.

6A vakarokoroko kei na ka vakaturaga sa tiko e matana: a kaukauwa kei nai ukuuku sa tiko e nona vale tabu.

7Dou solia vei Jiova, koi kemuni na veimataqali tamata, dou solia vei Jiova na vakarokoroko kei na kaukauwa.

8Dou solia vei Jiova na vakarokoroko ni yacana: dou kauta nai madrali ka curu ki na nona lomanibai.

9Dou soro vei Jiova e nai ukuuku ni yalosavasava: dou rere e matana, na vuravura kecega.

10Dou kaya e na veimatanitu, Sa lewa ko Jiova: ena vakataudeitaki talega ko vuravura me tawa yavala rawa: ena lewai ira vakadodonu na veimataqali.

11Me reki ko lomalagi, ka ladelade ko vuravura; me vadugu na wasawasa, kei na ka kecega sa sinai kina.

12Me rereki na veiwere, kei na ka kecega sa tiko kina, ena qai marau na kau kecega mai na veikau

13e na mata i Jiova; ni sa lako mai ko koya, ni sa lako mai me lewai vuravura: ena lewai vuravura e na yalododonu, kei na veimatanitu e nona lomadina.