Meke 95 - AI VOLA TABU（FIJ1864）

Sa vakarota na vakavinavinaka vua na Kalou levu ka loloma.

1TOU mai sere vei Jiova; tou mai ia na meke vua na uluvatu ni noda bula.

2Tou lako ki na matana ni da vakavinavinaka, ka rereki ni da mai kitaka vua na meke.

3Ni sa Kalou levu ko Jiova, ka Tui levu vei ira na kalou kecega.

4Sa tiko e ligana na kikilo kei vuravura; a sa nona talega na veiulu-ni-vanua cecere.

5Sa nona na wasawasa, ni sa cakava ko koya: a sa bulia na vanua mamaca na ligana.

6Tou mai soro ka cuva sobu: tou mai vakatekiduru e na mata i Jiova, o koya ka buli keda.

7Ni sa noda Kalou ko koya; koi keda na tamata ni nona vanua, kei na sipi sa tubera ko koya. E na siga edaidai kevaka dou sa via rogoca na domona,

8dou kakua ni vakaukauwataka na yalomudou, me vaka e na veivakacudrui, me vaka e na siga ni dauvere mai na lekutu:

9era sa dauveretaki au kina ko ira na nomudou qase, ka vakatovolei au vakaca, ni ra sa raica tiko na noqu cakacaka.

10E vasagavulu na yabaki kaʼu a rarawa kina vei ira nai tabatamata ko ya, ka kaya, Era tamata e daulako sese na lomadra, a ra sa sega ni kila na noqui valavala:

11ia kaʼu a vosavavakini vei ira e na noqu cudru me ra kakua ni curu ki na noqui vakavakacegu.