Meke 94 - AI VOLA TABU（FIJ1864）

Sa tagi ki na Kalou e na vuku ni valavala ni tamata ca, 1-7. Sa kilai ira na Kalou, ena cudruvi ira talega, 8-11. Era na kalougata ga sa vakanakuitataki ira na Kalou, 12-15. Ena totaki ira na nona ko Jiova, 16-23.

1I JIOVA na Kalou, sa nomui tavi na veisaumi; na Kalou, sa nomu na veisaumi, mo cila mai.

2Mo vakalevui iko, o iko sa daulewai vuravura: mo ia na veisaumi vei ira na viavialevu.

3A cava na kena dede, Jiova, ni ra na reki tiko nai valavala ca? ia a cava na kena dede ni ra na reki tiko nai valavala ca?

4ka cavuta ka vosataka tiko na ka rarawa? ka dokai ira tiko ko ira kecega nai valavala ca?

5Era sa tukilaka, Jiova, na nomu tamata, ka vakararawataka na nomui votavota.

6Era sa vakamatea na alewa dawai kei na vulagi, ka labati ira na gone e tawa vakatamani.

7A ra sa kaya ga, Ena sega ni raica ko Jiova, ena sega ni nanuma na Kalou i Jekope.

8Dou yalomatua mai na yalovakamanumanu vei ira na tamata; ia dou na vuku ninaica, koi kemudou na lialia?

9O koya sa tea na daligana, ena sega beka ni rogo rawa? o koya sa bulia na matada, ena sega beka ni rai rawa?

10O koya sa vunauci ira na veimatanitu, ena sega beka ni vunauci kemudou? o koya sa vakavulica na tamata me kila ka, ena sega beka ni kila ka ko koya?

11Sa kila ko Jiova na ka e vakanananu kina na tamata, ni sa ka tawa yaga.

12Sa kalougata, Jiova, na tamata ko sa vunauca, ka vakavulici koya e na nomu vunau;

13mo vakacegui koya kina mai na siga rarawa, ka me keli mada eliu na kedrai bulubulu nai valavala ca.

14Ni na, sega ni biuta na nona tamata ko Jiova, ka sega ni laiva na nonai votavota.

15Ia ena saumaki na lewa me dodonu; a ra na muria ko ira kecega na yalododonu.

16O cei ena tu cake mai e na vukuqu me ia kei ira nai valavala ca? o cei ena tu mai e na vukuqu me ia kei ira na caka cala?

17Kevaka sa sega ni noqui vukevuke ko Jiova, sa voleka ni tiko vagagalu na yaloqu.

18Niʼu a kaya, Sa tidara na yavaqu; sa qai tokoni au, Jiova, na nomu loloma.

19Ni sa vuqa na ka e nanuma rarawa kina na lomaqu, sa vakamarautaka na yaloqu na nomu vosaveivakacegui.

20Ena veiriti li kei iko nai tikotiko vakaturaga ni valavala ca, o ya sa tulia na ka rarawa e na vunau?

21Era sa soqoni ira vata me ra kitaka na yalona na yalododonu, ka cudruva na tamata tawa cala.

22Ia ka sa noqui drodro ko Jiova; kei na noqu Kalou na uluvatu kaʼu sa vakaruru kina.

23Ia ena vakayacora vei ira na nodra cala, ka muduki ira e na nodra ca; io, ena muduki ira laivi ko Jiova na noda Kalou.