Meke 89 - AI VOLA TABU（FIJ1864）

Sa dina na Kalou ni sa yalayala, 1-4. Sa kaukauwa, 5-14. Sa nanuma na ka e yalataka, 15-37. A sa qai nanumi me dua tani beka mai, ni sa biuti ira, 38-52.A Masikili i Ecani na Esirai.

1AU na tawa mudu ni meketaka na yalololoma i Jiova: au na vakatakila e na gusuqu na nomu yalodina ki nai tabatamata kecega.

2Niʼu a kaya, Ena tara cake na loloma me tawa mudu: o na vakataudeitaka na nomu vosa dina me vaka na lomalagi:

3Au sa ia oti na veiyalayalati kei koya kaʼu a digitaka, au sa vosavavakini vei Tevita na noqu tamata,

4au na vakataudeitaka me tawa mudu rawa na nomu kawa, au na tara cake na nomui tikotiko me yacova nai tabatamata kecega. Sela.

5Ia na lomalagi ena vakavinavinaka e na vuku ni nomu ka mana, Jiova: kei ira nai vavakoso e na vuku ni nomu vosa dina.

6Ni sai cei mai lomalagi me vakatauvatani kei Jiova? o cei vei ira na luve ni qaqa me tautauvata kei Jiova?

7Sa ka rerevaki vakalevu na Kalou e na nodrai soqosoqo na yalododonu, me vakarokorokotaki talega vei ira kecega era sa tiko voliti koya.

8I Jiova na Kalou ni lewe vuqa, o cei sa kaukauwa me vakataki iko, Jiova? se vaka na nomu yalodina sa vakavolivoliti iko?

9O sa lewa na cudru ni wasawasa: ni sa tubu na kena biau, o sa vakamaravutaka.

10O a vorolaki Reapi, me vaka e dua sa vuetaki; o a vakasevi ira na nomu meca e na ligamu kaukauwa.

11Sa nomu na lomalagi, sa nomu talega ko vuravura: o vuravura kei na ka e sinai kina, ko a tauyavutaka.

12Na tokalau kei na ceva ko a cakava: o Tapori kei Erimoni ena reki e na yacamu.

13Sa vei iko na liga kaukauwa: sa kaukauwa na ligamu, sa cecere na ligamu i matau.

14Ai tutu ni nomui tikotiko vakaturaga na yalododonu kei na lewa dodonu: ena liutaka na matamu na loloma kei na yalodina.

15Sa kalougata na tamata era kila na rorogo vinaka: era na lako voli, Jiova, e na rarama ni matamu.

16E na yacamu era na reki e na veisiga: era na laveti cake talega e na nomu cakacaka dodonu.

17Ni ko sai ukuuku ni nodra kaukauwa: ena cecere talega na neimami kaukamea e na nomu yalovinaka.

18Ni sa nei Jiova na nodai sasabai; a sa nei Koya na Yalosavasava nei Isireli na noda tui.

19O a qai vosa e na raivotu vua na nomu parofita yalododonu, ka kaya, Au sa solia na kaukauwa vua sa qaqa; au sa laveta cake e dua sa digitaki maivei ira na tamata.

20Au a kunei Tevita na noqu tamata; au sa lumuti koya e na noqu waiwai tabu:

21ena tiko dei kaya na ligaqu: a tabaqu talega ena vakaukauwataki koya.

22Ena sega ni vaqaseni koya rawa na meca; ka sega ni vakamalumalumutaki koya rawa na luve ni valavala ca.

23Au na mokuti ira sobu e matana na nona meca, ka yaviti ira era cati koya.

24Ia ena tiko kaya na noqu yalodina kei na noqu loloma: ia e na vuku ni yacaqu ena cecere na nona kaukamea.

25Au na vakayacora talega na ligana ki na waitui, kei na ligana i matau ki na veiuciwai.

26Ena kacivaka vei au, ko koya, O iko na tamaqu, na noqu Kalou, kei na uluvatu sa vakabulai au.

27Au na lesi koya talega me noqu ulumatua, me cecere vei ira na tui kei vuravura.

28Au na vakabauta tiko na noqu loloma vua ka tawa mudu, ena tu dei talega kaya na noqu veiyalayalati.

29Au na vakataudeitaka me tawa mudu na nona kawa, ena vaka talega na gauna vakalomalagi na nonai tikotiko vakaturaga.

30Kevaka era biuta na noqu vunau na luvena, ka tawa muria na noqu lewa;

31kevaka era vakacacana na ka kaʼu sa sautaka, ka sega ni vakabauta na noqui vakaro;

32kaʼu na qai cudruva na nodra bese e nai titoko, kei na nodrai valavala ca e na kuita.

33Ia kaʼu na sega ni kauta laivi vua na noqu loloma, se lasutaka na noqu vosa dina.

34Au na sega ni vakacacana na noqu veiyalayalati, se vakatanitaka na vosa sa lako tani e na tebenigusuqu.

35Au sa vavakini vakadua e na noqu yalododonu meʼu kakua ni lasu vei Tevita.

36Ena tawa mudu rawa na nona kawa, ena vaka na siga e mataqu na nonai tikotiko vakaturaga.

37Ena vaka na vula ena vakataudeitaki me tawa mudu rawa, ka vaka nai vakatakilakila dina mai lomalagi. Sela.

38Ia ko sa biuta ka vakasisilataka, ko sa cudru vua ko a lumuta.

39O sa vakatawayagataka na nomu veiyalayalati kaya na nomu tamata: o sa cakava me ka wale na nonai sala vakaturaga ni ko sa biuta ki na soso.

40O sa basuraka kecega na nona bai; o sa vakarusa sara na nona bai ni valu kaukauwa.

41Sa betiraki koya ko ira kece sa lako voli e na sala: sai rogo ca vei ira na tiko voleka vua.

42O sa vakaukauwataka na ligadra i matau era sa vakararawataki koya; o sa vakamarautaki ira na nona meca kecega.

43O sa moica na bati ni nonai seleiwau, ka sega ni vukea me tu rawa e nai valu.

44O sa vakaotia na nonai ukuuku, ka biuta ki na soso na nonai tikotiko vakaturaga.

45O sa vakalekalekataka na gauna ni nona cauravou: o sa vakaisulutaka e na madua. Sela.

46A cava na kena dede, Jiova? ena tawa mudu beka na nomu vunitaki iko? ena waqa beka me vaka na buka na nomu cudru?

47Mo nanuma na lekaleka ni noqu bula: a cava ko a cakava kina na luve ni tamata kecega me ka walega?

48O cei na tamata ko ya me na bula tiko ka tawa kunea na mate? ena vakabulai koya li mai na liga ni bulubulu? Sela.

49Sa evei, Turaga, na nomu yalololoma eliu, o a vosavavakini kina vei Tevita e na nomu yalodina?

50Nanuma, Turaga, na kedrai rogo ca na nomu tamata; au sa colata e lomaqu na nodra vosa ca na veimatanitu kecega e vuqa;

51a ya era sa vosa ca kina, Jiova, ko ira na nomu meca; a ya era sa vosacataka kina nai lakolako i koya ko a lumuta.

52Me vakarokorokotaki ko Jiova ka tawa mudu. Emeni, Emeni.