1I JIOVA na Kalou sa dauvakabulai au, kaʼu sa tagi oti e na siga kei na bogi e matamu:
2me curu ki matamu na noqu masu: mo vakalakala daligamu ki na noqu kaci;
3Ni sa sinai na lomaqu e na ka rarawa: a sa toro voleka ki nai bulubulu na noqu bula.
4Au sa wili vata kei ira era sa lako sobu ki nai bulubulu: au sa vaka na tamata sa sega vua na kaukauwa:
5sa lalaga kei ira na mate, me vakai ira na moku era sa koto e nai bulubulu, o ira ko sa sega ni nanuma tiko: a ra sa tawase laivi mai na ligamu.
6O sa virikotora au ki nai keli titobu sara, e na butobuto, e loma ni wai titobu.
7Sa bitaki au na nomu cudru, ia ko sa vakararawataki au ni sa sevi au na nomu biau kecega. Sela.
8O sa vakayawataka vei au na wekaqu; o sa cakavi au meʼu sevaki vei ira: au sa sogolati, ka sega ni lako tani rawa.
9Sa tagi na mataqu e na vuku ni rarawa: i Jiova, kaʼu sa kaci oti vei iko e na veisiga kecega, kaʼu sa dodoka yani na ligaqu vei iko.
10O na cakava li na ka mana e na vukudra na mate? ena tu cake li na mate ka vakavinavinaka vei iko? Sela.
11Ena tukuni li na nomu yalololoma e nai bulubulu? se na nomu yalodina e na rusa?
12Ena kilai li na nomu cakacaka mana mai na vanua butobuto? se na nomu cakacaka dodonu mai na vanua e dauveinanu-leca?
13Ia koi au kaʼu sa tagi oti vei iko, Jiova; ia ena lako ki matamu e na sabogibogi na noqu masu.
14I Jiova, a cava ko sa biuta tani kina na yaloqu? a cava ko sa vunia kina vei au na matamu?
15Oi au kaʼu sa vakararawataki ka voleka ni mate niʼu sa cauravou ka yacova na siga o qo: au sa domobula niʼu sa vosota na ka rerevaki maivei iko.
16Sa sevi au na nomu cudru waqawaqa; sa muduki au tani na nomu veivakarerei:
17sa lako vakavolivoliti au e na veisiga kecega me vaka na wai; sa lako vata mai ka viviraki au.
18O sa vakayawataka vei au na wekaqu kei koya sa lomani au, ka kauti ira ki na butobuto e keitou sa dauveikilaki.
Who We AreWhat We EelieveWhat We Do
2025 by iamachristian.org,Inc All rights reserved.
