Meke 86 - AI VOLA TABU（FIJ1864）

Sa masu ko Tevita vua na Kalou loloma ka kaukauwa, me kakua ni rawai koya na tamata ca.A masumasu i Tevita.

1ME vakalakala mai na daligamu, Jiova, mo rogoci au: niʼu sa rarawa ka dravudravua.

2Mo maroroya na yaloqu; niʼu sa yalododonu: o iko na noqu Kalou, mo Vakabula na nomu tamata sa vakararavi vei iko.

3Mo yalololoma mai vei au, Turaga: niʼu sa tagi vei iko e na veisiga.

4Mo vakamarautaka na yalona na nomu tamata: niʼu sa laveta cake vei iko, Turaga, na yaloqu.

5Ni ko sa dauyalovinaka, Turaga, ka daulomadonu; ka daulevu na nomu loloma vei ira kecega era tagi vei iko.

6Mo vaqara daligamu mai, Jiova, ki na noqu masu; ka vakarorogo ki na domo ni noqu kerekere.

7E na siga kaʼu rarawa kina kaʼu na masuti iko: ni ko na vosa mai vei au.

8Sa sega vei ira na kalou sa vakataki iko, Turaga; ka sega na cakacaka me tautauvata kei na nomu cakacaka.

9Na veimatanitu kecega ko a cakava era na lako mai ka soro vei iko, Turaga; ka vakarokorokotaka na yacamu.

10Ni sai iko sa levu, ka cakava na ka veivakidacalataki: sai iko duaduaga na Kalou.

11Mo vakavulici au, Jiova, e nomu sala; au na muria na nomu vosa dina: mo vakadua-takana lomaqu me rerevaka na yacamu.

12Au na vakavinavinaka vei iko, na Turaga na noqu Kalou, e na yaloqu kece: au na tawa mudu ni vakarokorokotaka na yacamu.

13Ni sa ka levu na nomu loloma vei au: ko sa Vakabula na yaloqu mai na eli titobu sara.

14Na Kalou, era sa tu cake mai vei au na tamata viavialevu, a sa vakasaqara na yaloqu nai vavakoso era tamata dauivalavala vakaukauwa; ka sega ni nanumi iko me tu e matadra.

15Ia sai iko, Turaga, na Kalou sa dauyalololoma, ka daulomasoli, sa vosovoso vakadede, ka dauyalovinaka ka daudina.

16Mo golevi au mai, ka lomani au; mo solia na nomu kaukauwa vua na nomu tamata, ka vakabula na luvena na nomu vada.

17Kitaka vei au e dua nai vakatakilakila ni loloma; me ra raica ko ira era cati au, ka madua kina: e na vuku ni ko sa vukei au, Jiova, ka vakalecataki au.