1DOU vaqara daligamudou, noqu tamata, ki na noqu vunau: dou vakalakala daligamudou ki na vosa ni gusuqu.
2Au na dalaga na gusuqu e na vosa vakatautauvata: au na tukuna e so na ka sa vuni tu mai na gauna makawa:
3a ya keitou sa rogoca ka kila, a ra sa tukuna mai vei keitou ko ira na noda qase.
4Keitou na sega ni vunia vei ira na luvedra, keitou na vakatakila ki nai tabatamata emuri na kena vinaka ko Jiova, kei na nona kaukauwa, kei na nona cakacaka mana sa kitaka ko koya.
5Ni sa lesia ko koya nai vakaro vei ira na Jekope, ka tauca na vunau vei ira na Isireli, a sa vakarota vei ira na noda qase, me ra vakatakila vei ira na luvedra:
6me kila rawa nai tabatamata emuri, io ko ira na gone era na sucu maimuri; me ra tubu talega ka tukuna ki na luvedra:
7ka me ra vakararavi ga vei koya na Kalou, ka tawa guilecava na cakacaka ni Kalou, ka vakabauta ga na nona vunau:
8ia me ra kakua ni vakai ira na nodra qase, nai tabatamata yalovakatani ka talaidredre; nai tabatamata sa sega ni vakarautaka na lomadra, a sa sega ni dina vua na Kalou na yalodra.
9Na luve i Ifireimi, sa vakaiyaragi e na dakai, era sa saumaki e na siga ni veivala.
10Era sega ni vakabauta na veiyalayalati kei na Kalou, ka bese ni muria na nona vunau;
11a ra sa guilecava na nona cakacaka, kei na nona ka vakurabui sa vakatakila oti ko koya vei ira.
12A ka vakurabui sa kitaka ko koya e matadra na nodra qase, e na vanua ko Ijipita, kei na tiki ni vanua mai Soani.
13Sa tawasea na wasawasa, ka kauti ira kina; ka cakava na wai me tu me vaka nai tuva tu va.
14Sa tuberi ira e na siga e na o, kei na bogi e na rarama ni buka waqa.
15Sa tasea na veivatu mai na veikau, ka vagunuvi ira me vaka mai na wai titobu sara.
16Sa vakatubura talega na wai drodro mai na vatu, ka vakadavea sobu na wai me vaka na uciwai.
17A ra sai valavala ca tale vua, ni ra vakacudrui Koya na Cecere mai na veikau.
18A ra sa dauveretaki koya na Kalou e lomadra, ni ra kerea na kakana ni ra garova.
19A ra sa vosacataka na Kalou; ka kaya, Sa cokonaka rawa li na Kalou nai kanakana e na veikau?
20Baica, sa yavita na vatu ko koya, a sa vure maikina na wai, a sa vuabale na dreke ni wai; sa solia rawa tale beka na madrai? sa vakarautaka rawa beka na lewe ni manumanu vei ira na nona tamata?
21A sa rogoca na ka o qo ko Jiova, a sa cudru: a sa waqa kina na buka vei ira na Jekope, a sa tubu talega na cudru vei ira na Isireli;
22e na vuku ni ra sa sega ni vakabauta na Kalou, ka sega ni vakararavi vua me vakabulai ira:
23ia ka sa rotaka oti na o maicake, ka dolava na katuba kei lomalagi,
24a sa vakatauca na mana vei ira me ra kania, a sa solia vei ira na sila kei lomalagi.
25Ia na tamata, sa kania na kedra na agilose: sa solia vei ira nai vaqa me ra mamau sara.
26Sa vakaliwara na tokalau mai lomalagi: a sa kauta mai na ceva e nona kaukauwa.
27A sa vakatauca vei ira na lewe ni manumanu me vaka na kuvu-ni-soso, kei na manumanu vakatabana me vaka na nuku mai na matasawa:
28a sa tauca e nai saqata ni nodrai tikotiko vakaivalu, ka vakavolivolita na nodra veivale.
29A ra sa kania, ka mamau sara: ni sa solia ko koya na ka era garova.
30Ia ka sa sega ni mudu rawa na nodra gagaro: ia ni sa tu ga e gusudra na kedra kakana,
31sa yacovi ira na cudru ni Kalou, ka vakamatei ira era sa uro vei ira, ka mokuta na tamata bula nei Isireli.
32Ia sa oti kecega o qo, ka rai valavala ca tikoga, ka sega ni vakabauta e na vuku ni nona cakacaka mana.
33O koya o qo sa vakaotia kina na nodra siga e na ka tawa yaga, kei na nodra yabaki e na ka rarawa.
34Ni sa mokuti ira, era sa qai qarai koya: ka lesu mai ka souta me taroga na Kalou.
35A ra sa nanuma ni sa nodra kaukauwa na Kalou, kei na nodrai Vakabula na Kalou Cecere.
36Ia ka ra sa vosaveicavilaki vua e gusudra, ka lasu vua e na yamedra.
37Ni sa sega ni dodonu vua na yalodra, a ra sa sega ni tiko dei e na nona veiyalayalati.
38Ia ko koya, ni sa yalololoma, sa tawa cudruvaka na nodrai valavala ca, ka sega ni vakarusai ira: ia sa vakalesuya tani vakavuqa na nona cudru, ka sega ni laiva me waqawaqa sara na nona cudru.
39Ni sa nanuma era sa tamata ga; na cagi sa lako tani, ka sega ni lako tale mai.
40A ka tani na nodra talaidredre vua mai na veikau, ka vakararawataki koya mai lekutu!
41Io, era sa lesu tale yani ka vakatovolei koya vakaca na Kalou, ka vosalevutaki Koya na Yalosavasava nei Isireli.
42Era sa sega ni nanuma na ligana, se na siga sa vakabulai ira kina mai na meca.
43Ni sa kitaka nai vakadinadina mai Ijipita, kei na nona cakacaka veivakidacalataki e na tiki ni vanua mai Soani:
44a sa vukica na nodra uciwai me dra; kei na nodra soniwai, me ra kakua ni gunuva rawa.
45Sa tala vei ira na manumanu lalai e vuqa, a sa kani ira; kei na boto, a sa vakacacani ira.
46A sa solia talega na nodra vuata ki na nuve, kei na ka era oca kina ki na vodre.
47Sa vakamatea na nodra vaini e na uca-cevata, kei na nodra lolo e na liliwa levu.
48Sa solia na nodra manumanu lelevu ki na uca-cevata, kei na nodra manumanu lalai ki na livaliva.
49Sa vakayacora vei ira na nona cudru waqawaqa, na lesavi, kei na yaluma, kei na ka rarawa, ni sa tala na agilose ca vei ira.
50Sa carata na sala ki na nona cudru; sa sega ni tarova na yalodra me kakua ni mate, a sa solia na nodra bula ki na mate vei vei tauvi;
51a sa yavita na ulumatua kecega mai Ijipita; a nodra kaukauwa levu mai na veivale i Ami:
52a sa kauti ira tani na nona tamata me vaka na sipi, ka tuberi ira voli e na veikau me vaka na qele ni sipi.
53A sa tuberi ira vakavinaka yani, a ra sa sega kina ni rere: ia ka sa dromuca na nodra meca na Wasawasa.
54A sa kauti ira ki nai yalayala ni nona vanua tabu, io ki na ulu-ni-vanua o qo, a ya sa, volia e na ligana i matau;
55a sa vakaseva tani e matadra na veimatanitu, a sa vota vei ira na nodra veiyasana e na dali, ka vakatikori ira na veimataqali i Isireli e na nodra veivale.
56Ia ka ra sa vakatovolea ka vakacudruya na Kalou Cecere, ka sega ni cakava na nona vunau:
57a ra sa lesu tani ga, ka cakacaka vakailasu me vaka na nodra qase: a ra sa vuki vakatani me vaka na dakai e daulasu.
58A ra sa vakacudrui koya e nodra veiyasana cecere, ka kitaki koya me vuvu e na vuku ni nodra matakau ceuceu.
59Sa rogoca na Kalou, a sa cudru sara, a sa vakasisilataki ira vakalevu na Isireli:
60a sa biuta kina na nonai tikotiko mai Silo, na nona vale sa lesia ko koya me tiko kei ira na tamata;
61a sa soli ira na nona kaukauwa me ra vakabobulataki, kei na nonai ukuuku ki na ligana na meca.
62A sa soli ira na nona tamata me mate e nai seleiwau; a sa cudruva na nonai votavota.
63Sa kania na nodra cauravou na buka; a sa sega ni musu na nodra gonealewa me vakawati.
64Sa bale na nodra bete e nai seleiwau; a sa sega ni tagi na nodra alewa dawai.
65A sa qai yadra mai na Turaga me vaka e dua mai na moce, ka vaka na tamata qaqa ni sa kaila e na vuku ni waini.
66A sa yavita nai murimuri ni nona meca: a sa cakavi ira me rai rogorogo ca tikoga.
67A sa bese ni tiko e na vale i Josefa, ka sega ni digitaka na mataqali i Ifireimi:
68a sa digitaka na mataqali i Juta, na ulu-ni-vanua ko Saioni, a ya ka lomana ko koya.
69A sa tara vakacecere na nona vale tabu, me vakataki vuravura, a ya sa tauyavutaki me tawa oti rawa.
70Sa digitaki Tevita talega na nona tamata, ka kauti koya mai na bai ni sipi:
71ni sa muria tiko na sipi sa vakasucu, sa kauti koya me vakani ira na Jekope na nona tamata, kei ira na Isireli na nonai votavota.
72A sa vakani ira me vaka na nona yalododonu; ka tuberi ira ni sa vuku na ligana.
Who We AreWhat We EelieveWhat We Do
2025 by iamachristian.org,Inc All rights reserved.
