Meke 77 - AI VOLA TABU（FIJ1864）

Sa tagi ki na Kalou ni sa rarawa, 1-9. Sa nanuma na cakacaka loloma ni Kalou, ka sa qai vakacegu, 10-20.Vua na Domo-ni-meke, vei ira na Jetucuni. A Meke i Asafi.

1AU a tagi vua na Kalou e domoqu, io, vua na Kalou e domoqu; a sa vaqara daligana mai vei au.

2E na siga kaʼu a rarawa kina kaʼu a qarai Jiova: sa dodo tu na ligaqu e na bogi, ka sega ni cegu: sa bese ni vakacegui na yaloqu.

3Au a nanuma na Kalou, kaʼu mani rarawa: au a vakanananu, a sa luvu na lomaqu. Sela.

4O sa ia me yadra tu na mataqu: sa rarawa na yaloqu kaʼu sa sega kina ni vosa rawa.

5Au sa vakanananu ki na gauna makawa kei na veiyabaki eliu.

6Au a nanuma na noqu meke e na bogi: au sa vakanananu e lomaqu: a sa vakataroga na yaloqu.

7Ena biuti au laivi beka na Turaga ka tawa mudu? ena sega beka ni yalololoma tale?

8Sa takali laivi beka na nona loloma ka tawa mudu? sa oti sara beka na nona vosa ni yalayala?

9Sa guilecava beka nai valavala loloma na Kalou? sa vakadaroya beka na nona loloma levu ni sa cudru? Sela.

10Au a qai kaya, O qo na noqu malumalumu: ia na veiyabaki ni liga i matau i Koya sa Cecere sara.

11Au na nanuma na cakacaka i Jiova: au na nanuma na nomu cakacaka mana mailiu.

12Au na veinanuyaka talega na nomu cakacaka kecega, ka veivosakitaka na nomui valavala.

13A nomui valavala, na Kalou, na ka savasava: o cei me Kalou levu me vakataki koya na Kalou?

14Sai iko na Kalou sa caka mana tiko: o sa vakatakila oti na nomu kaukauwa e na kedra maliwa na tamata.

15O sa vakabulai ira na nomu tamata e na ligamu, ia ko ira na luve i Jekope kei Josefa. Sela.

16Sa kunei iko, na Kalou, na wai, sa kunei iko na wai; a sa rere: io, sa kidroa talega na wai titobu.

17Sa livia yani na wai na o: sa vakarogotaka na domona ko lomalagi: io, sa lako voli yani na nomu gasau.

18A domo ni nomu kurukuru sa lako e na covulaca: sa vakararamataki vuravura na livaliva: sa sautaninini ka tavuki ko vuravura.

19A nomu sala sa koto e na Wasawasa, kei na nomu salatu e na wai levu, a sa sega ni kilai na we ni yavamu.

20O a tuberi ira na nomu tamata me vaka na qele ni sipi e na liga i rau ko Mosese kei Eroni.