Meke 76 - AI VOLA TABU（FIJ1864）

Sa vakatakila ni sa rerevaki na Kalou, e na ruku ni nona cakacaka e na vukudra na nona lewe ni soro.Vua na Domo-ni-meke e na Nikinoca. A Meke se Sere i Asafi.

1SA kilai e Juta na Kalou: sa levu na yacana mai Isireli.

2Ia sa tu mai Selemi na nona vale, kei na nonai tikotiko mai Saioni.

3Sa musuka maikina ko koya na gasau ni dakai, nai sasabai, kei nai seleiwau, kei nai valu. Sela.

4O iko, ko sa rogo ka levu vakaidina, ka lailai na nodra veiulu-ni-vanua na dauivalavala vakaukauwa.

5Sa kauti tani na nodrai toki ni valu na qaqa, era sa moce lutu: a sa sega vei ira na kaukauwa era sa kunea na ligadra.

6Ni ko a vunauca, na Kalou i Jekope, sa moce lutu mai na veivale-vodoki, kei na ose.

7O iko, io, sai iko ga, sa rerevaki: o cei sa tu rawa e matamu ni ko sa qai cudru?

8O a vakarogotaka mai na nomu lewa mai lomalagi; sa rere ko vuravura, ka tiko lo,

9ni sa tu cake na Kalou me lewa, me vakabulai ira kecega era vakararawataki e vuravura. Sela.

10Ni na vakarokorokotaki iko na cudru ni tamata: ia na kena vo ni cudru ko na vakadaroya.

11Dou vosa vavakini, ka kitaka talega vei Jiova na nomudou Kalou: o ira kecega era tiko vakavolivoliti koya, me ra kauta mai na ka ni loloma vei koya sa rerevaki.

12Ena waicalataka ko koya na lomadra na turaga: sa rerevaki ko koya vei ira na tui kei vuravura.