Meke 75 - AI VOLA TABU（FIJ1864）

O ira na yalododonu ni ra sa tiko vakaca sara, era sa vakararavi ga vua na Kalou me vakabulai ira.Vua na Domo-ni-meke; Ali-tasikici. A Meke se Sere i Asafi.

1KEIMAMI sa vakavinavinaka vei iko, na Kalou, keimami sa vakavinavinaka: ia sa voleka mai na yacamu; sa tukuni mai e na nomu cakacaka mana.

2Niʼu na sa qai vakabauta na kena siga kaʼu na lewa vakadodonu.

3Sa waicala ko vuravura kei ira kecega na lewena: au sa vakataudeitaka na kena duru. Sela.

4Au a kaya vei ira na lialia, Dou kakua ni valavala vakalialia: vei ira talega nai valavala ca, Kakua ni laveta kicake na kaukamea:

5kakua ni laveta na kaukamea kicake: kakua ni vosa vaka-domokaukauwa.

6Ni sa sega ni taka na vei vakalevui mai cake, se mai ra, se mai na mata ni tokalau.

7Ia na Kalou sa daulewa: sa vakasivoya e dua, ka lesia e dua.

8Ni sa taura tu e dua na bilo ko Jiova, sa damudamu na kena waini; sa sinai e na ka e veiwaki vata: a sa livia yani e so: ia na kena soko, era na lobaka ka gunuva nai valavala ca kecega e vuravura.

9Ia koi au, kaʼu na tukutuku tikoga ka tawa mudu; au na meketaka na vakavinavinaka vua na Kalou i Jekope.

10Au na tamusuka laivi talega na nodra kaukamea nai valavala ca: ia ena cecere ga na nodra kaukamea na yalododonu.