Meke 74 - AI VOLA TABU（FIJ1864）

Sa tagi vua na Kalou ni sa ca na nona tamata, kei na nona vale tabu, e na vuku ni meca, 1-9. Sa masuta na Kalou me vakabulai ira, 10-23.A Masikili i Asafi.

1A CAVA, na Kalou, ko sa biuti keimami laivi kina ka tawa mudu? a cava e kubou kina na nomu cudru vei ira na sipi ni nomu veico?

2Mo nanuma na nomu lewe ni soro ko a volia eliu; na mataqali ni nomu vanua, a ya ko a vakabula; na ulu-ni-vanua ko Saioni o qo, a ya ko a dautiko kina.

3Me kusarawa mai na yavamu ki na veivakarusai sa tawa mudu; ki na ka kecega sa vakacacana na meca e nomu vale tabu.

4Era sa qoqolou na nomu meca e na kedra maliwa na nomui soqosoqo; era sa vakaduria na nodrai vakatakilakila mei vakatakilakila.

5Sa rogo eliu na tamata e na vuku ni sa laveta na matau me dauta kau lelevu.

6Ia o qo, na kena ka sa ceuceu era sa qai basuka sobu vata e na matau kei nai tukituki.

7Era sa vakama na nomu vale tabu e na buka, era sa vakacacana nai tikotiko ni yacamu ni ra sa talaraka ki na qele.

8Era sa kaya e lomadra, Me da musuki ira vata: era sa vakama oti na nodra vale kecega nai soqosoqo ni Kalou e na vanua.

9Keimami sa sega ni raica tiko na neimami vakatakilakila: sa sega tale e dua na parofita: a sa sega e dua vei keimami e kila se na vakaevei na kena dede.

10A cava na kena dede, na Kalou, ni na vosa ca tiko na meca? ena tawa mudu beka ni na vosacataka tiko na yacamu na meca?

11A cava ko sa vakasuka tale kina na ligamu, io, na ligamu i matau? mo cavuta tale mai na lomaseremu.

12Ia na Kalou sa noqu Tui mailiu, e sa ia tiko na veivakabulai e vuravura.

13O a wasea na wasawasa e nomu kaukauwa: o a bola na uludra na tavuto e loma ni wai.

14O a bola na ulu i Livaiacani, ka soli koya me kedra kakana era tiko mai na veikau.

15O a basia na mata-niwai kei na uciwai: o a vakadiva na uciwai kaukauwa.

16Sa nomu na siga, a sa nomu talega na bogi: o a vakarautaka na rarama kei na mata-ni-siga.

170 a lesia nai yalayala kecega kei vuravura: o a cakava na vula i katakata kei na vula i liliwa.

18I Jiova, mo nanuma na ka o qo, ni sa vosavakacaca na meca, a ra sa beca na yacamu na mataqali lialia.

19Kakua ni solia yani na yalona na nomu ruve ki na nodrai soqosoqo nai valavala ca: mo kakua ni guilecava tikoga nai soqosoqo ni nomu tamata dravudravua.

20Mo nanuma na vosa ni yalayala: ni sa sinai e na vale e dau veivakararawataki na veiyasana butobuto kei vuravura.

21Me ra kakua ni lesu tale ka vakamaduataki ko ira era vakacacani: me ra dui vakavinavinaka ki na yacamu na rarawa kei na dravudravua.

22Mo tu cake, na Kalou, mo veileti e na vukumu: mo nanuma ni sa vosavakacataki iko e na veisiga na tamata lialia.

23Mo kakua ni guilecava na domodra na nomu meca: sa lako cake tikoga na nodra ue era tu cake me veivala kei iko,