Meke 73 - AI VOLA TABU（FIJ1864）

Sa vakatakila ni sa sega ni kila nai balebale ni nodra tiko vinaka sara nai valavala ca, 1-12. Ni sa yalolailai kina, sa lako ki na vale ni Kalou, a sa qai kila; a sa reki e na vuku ni sa nonai yau na Kalou, 13-28.A Meke i Asafi.

1SA yalololoma vakaidina na Kalou vei ira na Isireli, io, vei ira era sa yalosavasava.

2Ia koi au, sa voleka ni lako sese na yavaqu; sa voleka ni tidara na noqui lakolako.

3Niʼu a vuvutaki ira na lialia, niʼu a raica na nodra sautu na tamata caka ca.

4Ni sa sega vei ira nai vau ni mate: a sa dei ga na nodra kaukauwa.

5Era sa sega ni rarawa me vaka na tamata tani; a ra sa sega ni yaviti e na mate me vaka na tamata tani.

6O koya o qo sa vauci ira kina na viavialevu me vaka nai taube; sa ubi ira nai valavala vakaukauwa me vaka nai sulu.

7Sa levu tu na matadra e na uro: era sa yawasivita na nanuma ni lomadra.

8Era sa veivakalialiai, ka vosataka vakaca nai valavala kaukauwa: era vosa vakaviavialevu.

9Era sa vosavakacataka na lomalagi, a sa lako voli e vuravura na yamedra.

10O koya o qo era sa lesu maikina kike na nona tamata: a sa loba vei ira na wai me sinai sara na medra bilo.

11A ra sa kaya, Sa kila vakaevei na Kalou? a sa vuku vakacava ko Koya sa Cecere?

12Raica, ko ira o qo nai valavala ca, a ra sa tiko vinaka ga e vuravura; sa levu cake tiko na nodrai yau.

13E dina sa tawa yaga niʼu sa vuya na lomaqu, ka vuluvulu na ligaqu e nai valavala savasava.

14Niʼu sa yaviti tiko e na siga ka bogi, ka cudruvi e na mataka kecega,

15Kevaka kaʼu na kaya, Au na vosa vakaoqo; raica, au na vakalialiai ira na mataqali ni nomu tamata.

16Niʼu a nanuma meʼu kila na ka o qo, sa dredre vei au;

17ia kaʼu a qai lako ki na vale tabu ni Kalou; kaʼu a qai kila rawa na kedrai vakataotioti.

18E dina ni ko sa lesi ira ki na sala titidara; o sa biuti ira sobu ki na veivakarusai.

19Sa vaka na liva na nodra vakarusai mai! era sa rusa ka oti sara e na ka rerevaki.

20Me vaka na tadra ni sa yadra maikina e dua; sa vakakina, Turaga, ni sa yadra, ko na beca na nodra ka vakayaloyalona.

21Sa vakaoqo niʼu a yaloca, a sa vakararawataki na lomaqu.

22Au a lialia vakaoqo, ka tawa vuku: au a vaka na manumanu e matamu.

23Ia kaʼu sa tiko ga kei iko e na veisiga: o sa taura tiko na ligaqu i matau.

24O na tuberi au e na nomu lewa, ka kauti au emuri ki na vanua vakaiukuuku.

25O cei tale e yaga vei au mai lomalagi? a sa sega e vuravura kaʼu sa domona, o iko ga.

26Sa malumalumu mai na yagoqu kei na lomaqu: ia na Kalou na kaukauwa ni lomaqu, kei na noqui votavota ka tawa mudu.

27Raica, era na rusa kecega era sa tiko vakayawa vei iko: o sa vakarusai ira kecega era sa biuti iko me ra gole tani.

28Ia koi au, e yaga vei au meʼu toro vua na Kalou: au sa vakararavi oti vua na Turaga ko Jiova, meʼu tukuna kina na nomu cakacaka kecega.