Meke 72 - AI VOLA TABU（FIJ1864）

Sa masulaki Solomoni ko Tevita, ka vakatakila na ka vinaka ena yaco e na nona lewa, 1-17. Sa vakavinavinaka kina, 18-20.A Meke nei Solomoni.

1NA Kalou, mo solia vua na tui na nomu lewa dodonu, kei na nomu cakacaka dodonu vua na luvena na tui.

2Ena lewai ira vakadodonu na nomu tamata ko koya, kei ira na nomu kaisi e na lewa vinaka.

3Ena tubura na kedra sautu na tamata na veiulu-ni-vanua, kei na veiulu-ni-koro, e na lewa dodonu.

4Ena ia na veilewai ko koya e na vukudra na tamata era vakararawataki, ena vakabulai ira na luveniyali, ka musuki koya na dauivalavala kaukauwa.

5Era na rerevaki iko ni sa tiko ga na siga kei na vula, io e nai tabatamata kecega.

6Ena lako sobu mai ko koya me vaka na uca ki na buroro: me vaka na uca sa vakasuasuataka na qele.

7Ena tubu e na nona gauna ko ira na yalododonu; kei na sautu levu, ka yacova na gauna e oti kina na vula.

8Ena lewa talega mai na wasawasa e dua ka yacova na Wasawasa e dua, mai na uciwai levu talega, ka yacova nai yalayala kei vuravura.

9Era na cuva e matana ko ira era tiko mai lekutu; era na dramica na kuvu-ni-soso ko ira na nona meca.

100 ira na tui Tarisisi kei na tui ni veiyanuyanu, era na kauta mai nai madrali: o ira na tui Sepa kei na tui Sipa era na cabora na ka ni loloma.

11Ia ko ira kecega na tui, era na cuva e matana: era na qaravi koya na veimatanitu kecega.

12Ni toa vakabula ko koya na dravudravua ni sa tagi; kei koya sa vakararawataki ka sa sega e vukei koya.

13Ena lomana ko koya na tamata malumalumu ka dravudravua, ka Vakabula na yalodra na dravudravua.

14Ena Vakabula na yalodra mai nai lawaki kei nai valavala kaukauwa: ena ka talei talega e matana na kedra dra.

15Ena bula talega ko koya, ena soli talega vua na koula mai Sepa: ena kitaki tiko talega na masu e na vukuna; ena vakavinavinakataki tiko talega e na veisiga.

16Ena sa tu e vuravura e na dela ni veiulu-ni-vanua na sila e qumi rawarawa ga; ena kurekure na vuana me vakataki Lipanoni: era na tubu talega na lewe ni koro me vaka na co ni vanua.

17Ena tawa oti rawa na yacana: ena tu na yacana ni sa tu na siga: a ra na vakalougatataki na tamata e na vukuna: era na vosaveivakalougatataki koya na lewe ni veivanua kecega.

18Me vakavinavinakataki ko Jiova na Kalou, na Kalou nei Isireli, o koya sa cakava duaduaga na ka e veivakidacalataki.

19Ia me vakavinavinakataki na yacana vakaiukuuku ka tawa mudu: ia me sinai talega ko vuravura kecega e na nonai ukuuku. Emeni, Emeni,

20Sa oti na masu i Tevita na luve i Jese.