Meke 71 - AI VOLA TABU（FIJ1864）

A masu ni tamata yalododonu vakararawataki.

1I JIOVA, au sa vakararavi vei iko: kakua ni laivi au meʼu madua e na gauna e dua.

2Mo vakabulai au e na nomu yalododonu, ka meʼu dro rawa: mo vakatu daligamu mai vei au, ka vakabulai au.

3Mo noqu vale kaukauwa, meʼu dro tikoga kina: o sa vosa oti meʼu bula; ni ko sa noqu uluvatu kei na noqu koro kaukauwa.

4Mo vakabulai au, na Kalou, mai na ligana na tamatai valavala ca, mai na ligana na tamata tawa dodonu kai valavala vakaukauwa.

5Ni sai iko ga, Turaga Jiova, kaʼu sa goleva tiko: o iko ga kaʼu a vakararavi kina niʼu a cauia-vou ka yacova na gauna o qo.

6O a tokoni au mai na siga kaʼu a sucu kina; o iko ga ka kauti au mai na kete i tinaqu: au na vakavinavinaka tikoga e na vukumu.

7Au sa vaka na ka e dauveivakidacala-taki vei ira na lewe vuqa; ia ko iko ga na noqui drodro kaukauwa.

8Me sinai na gusuqu e na vakavinavinaka vei iko, kei na vakacaucautaki iko e na siga ka Bogi.

9Kakua ni biuti au e na gauna kaʼu sa qase mai kina; kakua ni laivi au ni sa oti na noqu kaukauwa.

10Ni ra sa vosava-kacacani au na noqu meca; a ra sa bose vata ko ira era sa lawakitaka na yaloqu,

11ka kaya, Sa biuti koya na Kalou: dou vakasavi koya ka taura; ni sa sega e dua me vakabulai koya.

12Na Kalou, mo kakua ni vakayawa vei au: noqu Kalou, mo kusarawa ni vukei au.

13Me ra vakamaduataki ka vakarusai era sa meca ni yaloqu; me ra vakarogocataki vakalevu ka tawa vakarokorokotaki ko ira sa qara na ka meʼu ca kina.

14Ia koi au, kaʼu na namaka vinaka tikoga, ka vakavinavinaka vakalevu cake tiko vei iko.

15A gusuqu, ena tukuna tikoga na nomu cakacaka dodonu kei na bula sa maivei iko; niʼu sa sega ni kila na kenai wiliwili.

16Au na lako yani e na kaukauwa ni Turaga ko Jiova: au na vakananuma na nomu cakacaka dodonu, io, na nomu duaduaga.

17O a vakavulici au, na Kalou, niʼu a gone: ka yacova na gauna o qo kaʼu sa tukuna tiko na nomu cakacaka veivakidacalataki.

18O qo talega, ni kaʼu sa qase ka sika mai, mo kakua ni laivi au, na Kalou; ka meʼu vakatakila mada eliu na ligamu vei ira nai tabatamata o qo, kei na nomu kaukauwa vei ira kecega ena tubu mai emuri.

19A nomu yalododonu talega, na Kalou, na ka cecere sara, o sa cakava oti na ka vakaidina: na Kalou, o cei sa vakai iko!

20 O iko, ko sa vakatakila mai vei keimami na ka rarawa vakalevu ka ca sara, o na vakabulai keimami tale, ka kauti keimami cake tale mai na wai titobu e vuravura.

21O na vakalevulevui au, ka vakacegui au e na veiyasana kecega.

22Au na meketaki iko talega e nai qiriqiri, to na nomu yalodina, na noqu Kalou: au na sere vei iko e na api, o iko na Yalosavasava nei Isireli.

23Ena marau vakalevu na tebenigusuqu niʼu sa sere vei iko; kei na yaloqu, o koya ko sa vakabula.

24A yamequ talega, ena tukuna tikoga na nomu cakacaka dodonu e na siga kecega ka bogi: ni ra sa vakamaduataki, ni ra sa vakarogocataki era sa qara na ka meʼu ca kina.