Meke 79 - AI VOLA TABU（FIJ1864）

Sa tagi vua na Kalou e na vuku ni sa ca ko Jerusalemi, 1-4. A sa masuti koya me vakabulai ira, 5-13.A Meke i Asafi.

1NA Kalou, era sa curu mai ki na nomu vanua ko ira na kai tani; era sa vakadukadukalitaka na nomu vale tabu; era sa kitaki Jerusalemi me bukebuke walega.

2Era sa solia na yagodra na nomu tamata ni sa mate, me kedra kakana na manumanu kei lomalagi, kei na lewedra na nomu tamata yalododonu vei ira na manumanu kei vuravura.

3Era sa livia voli na kedra dra mai Jerusalemi me vaka na wai; a sa sega me buluti ira.

4Keimami sai rogorogo ca vei ira sa tiko torovi keimami, ka vakalialiai ka dredrevaki vei ira era tiko voleka vei keimami.

5I Jiova, ena vakaevei na kena dede? ena tawa mudu beka na nomu cudru? ena waqa tiko beka na nomu vuvu me vaka na buka?

6Sova yani na nomu cudru me tauci ira na veimataqali era sa sega ni kilai iko, kei na veimatanitu era sa sega ni masuta na yacamu.

7Ni ra sa kani Jekope oti, ka vakacacana na nonai tikotiko.

8Mo kakua ni nanuma me cudruvi keimami e na vuku ni valavala ca eliu: me rairai vakasauri mai e na vuku i keimami na nomu yalololoma levu: ni keimami sa vakasaurarataki vakalevu.

9Na Kalou na neimami vakabula, mo vukei keimami e na vuku ni yacamu, me rogo: ka vakabulai keimami, ka bokoca na neimami valavala ca, e na vuku ni yacamu.

10Me ra kaya vakacava na veimatanitu, Sa evei na nodra Kalou? me kilai ko koya vei ira na veimatanitu e na mata i keimami ni sa cudruvaki na kedra dra na nomu tamata e sa vakadavei.

11Me yaco mada ki na matamu na nona vutugu na vesuki; me vaka na kaukauwa ni ligamu mo vakabulai ira era sa lesi me mate;

12ia mo saumi keimami vakavitu vei ira na tiko torovi keimami, e na vuku ni nodra vosa ca, era sa vosacataki iko kina, na Turaga.

13Ia koi keimami na nomu tamata kei na sipi ni nomu veico, keimami na tawa mudu ni vakavinavinaka vei iko: keimami na tukuna na ka mo vakavinavinakataki kina ki nai tabatamata kecega.