Meke 69 - AI VOLA TABU（FIJ1864）

A masu sa ia e na gauna ni veivakacacani.Vua na Domo-ni-meke e na Sosanimi. A Meke i Tevita.

1MO vakabulai au, na Kalou; ni sa mai luvuca na yaloqu na wai.

2Au sa lutudromu e na oruoru, sa sega kina na ka meʼu tu kina: au sa yaco ki na wai titobu, sa dromuci au kina na wai levu.

3Au sa oca e na tagi: sa mamaca na noqui tilotilo: sa malumalumu na mataqu niʼu sa waraki koya tiko na noqu Kalou.

4Era le vuqa era sa cati au walega ka lailai na drau ni uluqu: era kaukauwa ko ira sa via vakarusai au, ni ra noqu meca walega: au a qai vakasuka tale na ka kaʼu a sega ni kovea.

5Na Kalou, ko sa kila na noqu lialia; a sa sega ni vuni vei iko na noqui valavala ca.

6Turaga Jiova ni lewe vuqa, me ra kakua ni madua e na vukuqu ko ira era qaravi iko: na Kalou nei Isireli, me ra kakua ni vakamaduataki e na vukuqu era qarai iko.

7Niʼu sa vosavakacacataki e na vukumu; sa ubia na mataqu na madua.

8Au sa vaka na kai tani vei ira na taciqu, kei na vulagi vei ira na luve i tinaqu.

9Ni sa kani au sara na loloma katakata ki na nomu vale: a sa lutuki au na nodra vosa ca era sa vosavakacacataki iko.

10Niʼu a tagicaka na yaloqu niʼu a lolo, kaʼu a vosavakacacataki kina.

11Au a vakaisulutaki au talega e nai sulu taqarotu; ia kaʼu a vakaibole kina vei ira.

12Era dauvosavakacacataki au ko ira na dautiko e na matamata-ni-koro; a ra sa serekalitaki au ko ira na daumateni.

13Ia koi au, Jiova, au sa masu vei iko e na gauna ni vinakati: mo rogoci au, na Kalou, e na kena levu ni nomu loloma, ni ko sa daudina ni ia na veivakabulai.

14Mo vueti au mai na oruoru, meʼu kakua ni dromu; meʼu vakabulai maivei ira era sa cati au, mai na wai titobu talega.

15Me kakua ni luvuci au na wai levu, a me kakua ni tilomi au na wai titobu, me kakua talega ni sogoti mai vei au na gusu ni bulubulu.

16Mo rogoci au, Jiova; ni sa ka vinaka na nomu loloma: mo golevi au mai me vaka na kena levu ni nomu yalololoma.

17Ia mo kakua ni vunia na matamu vua na nomu tamata; niʼu sa vakararawataki: mo rogoci au kusarawa.

18Mo toro voleka mai ki na yaloqu, ka sereka: vakabulai au e na vukudra na noqu meca.

19O sa kila na ka kaʼu sa vosacataki kina, kei na ka kaʼu sa vakamaduataki kina, kei na ka kaʼu sa vakarogocataki kina: era tiko kecega e matamu na noqu meca.

20Sa vakamavoataka na lomaqu na vosa ca; au sa bibi sara: ia kaʼu sa rai voli me lomani au e dua, ka segai; me so talega me vakalecataki au, ka sega kaʼu kunea.

21Era sa solia talega na ka gaga me qau kakana; kei na wai wiwi meʼu gunuva niʼu a viagunu.

22Me yaco na nodrai kanakana e matadra mei cori: kei na nodra tiko vinaka, me tudai.

23Me vakabutobutotaki na matadra, me ra kakua ni rai rawa; ia mo vakatekiloloutaka tikoga na tolodra.

24Sovara vei ira na nomu cudru, ia me tauri ira na nomu cudru waqawaqa.

25Me lala didi mai na nodra vale; ia me kakua e dua me tiko e nodra vale malo.

26Ni ra sa vakacacani koya ko sa yavita; ka vosa-vakararawataki ira ko sa vuetaka.

27Mo cudruvaka na nodrai valavala tawa dodonu: me ra kakua talega ni vakadonui vei iko.

28Me ra bokoci mai nai vola ni bula, ia me ra kakua ni volai vata kei ira na yalododonu.

29Ia koi au kaʼu sa malumalumu ka rarawa: me laveti au kicake, na Kalou, na bula sa maivei iko.

30Au na vakavinavinaka ki na yaca ni Kalou e na meke, ka vakalevulevui koya e na vakamolimoli.

31Ena vinaka na ka o qo vei Jiova, ka ca na karavau, se na karavau tagane sa vakau-kamea ka vaququna.

32Era na kunea na ka o qo na yalomalumalumu, ka reki: ena bula talega na lomamudou sa qarai koya na Kalou.

33Ni sa rogoci ira na dravudravua ko Jiova, ka sega ni beci ira na nona vesuki.

34Me vakavinavinaka vua ko lomalagi kei vuravura, na wasawasa kei na ka kecega sa yavala kina.

35Ni na vakabulai Saioni na Kalou, ka tara na Veikoro i Juta: me ra tiko maikina, ka taukena.

36Era na taukena talega na nodra kawa na nona tamata: ka tiko maikina ko ira era sa lomana na yacana.