Meke 68 - AI VOLA TABU（FIJ1864）

A vakavinavinaka e na vuku ni cakacaka loloma ni Kalou.Vua na Domo-ni-meke. A Meke se Sere i Tevita.

1ME tu cake na Kalou, me ra dui vei-droyaki na nona meca: me ra kubu tani e matana ko ira era sa cati koya.

2Me vaka ni sa kauti tani na kubou, mo kauti ira tani me vakakina: me vaka ni sa waicala na drega ni vola e na mata ni buka, me rusa tani vakakina nai valavala ca e na mata ni Kalou.

3Ia me ra marau ga na yalododonu; me ra rereki e na mata ni Kalou: io, me ra ladelade e na marau.

4Dou meke vua na Kalou, dou meketaka na yacana: dou vakavinavinaka vua sa vodo lako tu e loma ni lekutu, e na yacana ko Ja, ka rekireki e matana.

5A tamadra na luveniyali, kei na nodra dauveilewai na alewa dawai, na Kalou e na nonai tikotiko tabu.

6Sa cakavi ira na Kalou era tiko taudua me ra tiko vakamataqali: sa kauti ira kitautuba era vesuki e na sinucodo: a ra sa tiko ga e na vanua dausiga na tamata be.

7Na Kalou, ni ko a liutaki ira na nomu tamata, ni ko a lako vakaturaga e loma ni veikau; Sela:

8sa tavuki na vanua, a sa tau na lomalagi e na mata ni Kalou: io, ko Sinei sa yavala e na mata ni Kalou, na Kalou nei Isireli.

9O iko, na Kalou, ko a vakatauca mai na uca levu, ko a vakaukauwataka kina na nomui votavota, ni sa ceguoca.

10Era a tiko maikina na nomui vavakoso: e na nomu yalololoma, na Kalou, ko a vakarautaka na ka me nodra na dravudravua.

11Sa solia na vosa na Turaga: sa ra lewe vuqa sara na dautukutuku.

12A nodra turaga na mataivalu era sa dui dro sara: ia na alewa ka tiko ga e vale sa vota nai toki ni valu.

13Kevaka dou a koto e na maliwa ni kuro, dou na vaka ga na taba ni ruve sa botani e na siliva, kei na lawena e na koula dromodromoa.

14Ena vaka na uca-vulavula mai Salimoni, ni sa vakasevi ira maikina na tui ko Koya sa Kaukauwa.

15A ulu-ni-vanua ni Kalou sa vaka na ulu-ni-vanua ko Pasani; na ulu-ni-vanua cecere na ulu-ni-vanua ko Pasani.

16A cava dou sa yadrava kina, na ulu-ni-vanua cecere? o qo na ulu-ni-vanua sa vinakata na Kalou me tiko kina; io, ko Jiova ena tiko kina ka tawa mudu.

17A vale-vodoki ni Kalou sa rua na oba, ia na nona agilose e udolu vakavuqa sara: sa tiko na Turaga e na kedra maliwa, me vaka mai Sinei, e na tikina tabu.

18O a lako kicake, o sa vakabobulataki ira na bobula e lewe vuqa; o sa rawata nai solisoli me nodra na tamata; io, me nodra na dautalaidredre, me sa tiko kei ira ko Jiova na Kalou.

19Me vakarokorokotaki na Turaga e na veisiga kecega; o koya sa dautauca vei keda nai colacola ka vinaka, io, na Kalou na nodai Vakabula: Sela:

20a noda Kalou na Kalou dauveivakabulai; a sa nei Jiova na Turaga na nodai drodro mai na mate.

21Ia na Kalou, ena vuetaka na uludra na nona meca, kei na buradela vakaulu i koya sa kitaka tiko na talaidredre.

22Sa kaya na Turaga, Au na kauta tale mai Pasani na noqu tamata, au na kauti ira tale mai na loma ni wasawasa:

23me lomo kina na yavamu e na dra ni nomu meca, kei na yamedra na nomu koli e na ka ko ya.

24Era sa kunea oti, na Kalou, na nomui lakolako; io, na nomui lakolako, na noqu Kalou, na noqu Tui, e na vale tabu.

25Era sa liuliu na daumeke, a ra sa murimuri na dauqiriqiri; sa tiko e na maliwa na gonealewa era dauqiri lali.

26Dou vakavinavinaka vua na Kalou e nai vavakoso, io, vei koya na Turaga, oi kemudou sa tubu maivei Isireli.

27Sa tiko maikea ko ira na luve i Penijamini na lailai kei na nodra turaga; kei na nodra turaga na Juta kei na nodrai vavakoso; kei na nodra turaga na Sepuloni, kei na nodra turaga na Nafitalai.

28Sa vakarota na nomu Kalou mo kaukauwa: mo vakaukauwataka, na Kalou, na ka ko sa cakava e na vuku i keimami.

29E na vuku ni nomu vale mai Jerusalemi era na kauta mai nai solisoli vei iko ko ira na tui.

30Mo vunauci ira na manumanu ni veigasau; kei na karavau kaukauwa ni veimatanitu, kei na luvedra; me ra vakamalumalumu mada e nai soro siliva: sa vakasevi ira ko koya era vinakata nai valu.

31Era na lako mai Ijipita na turaga; ena dodoka vakasauri ko Kusi na ligana vua na Kalou.

32Dou meke vua na Kalou, na veimatanitu e vuravura; dou vakacaucautaki koya na Turaga; Sela:

33ko koya sa vodo tu e na dela i lomalagi ecake sara, ia na lomalagi ka tu mailiu; raica, sa tabalaka na domona, io, na domona kaukauwa.

34Dou tukuna ni sa kaukauwa na Kalou: sa nodra turaga levu na Isireli, a sa tiko mai lomalagi na nona kaukauwa.

35Na Kalou, ko sa rerevaki mai na nomu veiyasana tabu: na Kalou nei Isireli sai koya ga sa dausolia na kaukauwa kei na qaqa vei ira na nona tamata. Me vakarokorokotaki na Kalou.