Meke 63 - AI VOLA TABU（FIJ1864）

Sa gadreva sara na Kalou ko Tevita, a sa vaka-lomavinaka vua, 1-5. Ni sa vakararavi tiko vei koya, sa kila ni ra na ca na nona meca, 6-10, ka vinaka ga ko koya, 11.A Meke i Tevita, ni sa tiko e na veikau mai Juta.

1O IKO Kalou, ko sa noqu Kalou; kaʼu na sou meʼu qaravi iko: sa viagunu vei iko na yaloqu, sa domoni iko na lewequ e na vanua mamaca ka dauveivakaocai, sa sega kina na wai;

2meʼu kunea na nomu kaukauwa kei na nomui ukuuku, me vaka ni kaʼu a kunea e na nomu vale tabu.

3E na vuku ni sa vinaka na nomu loloma ka ca na bula, ena vakavinavinaka kina vei iko na tebenigusuqu.

4Sa vakaoqo kaʼu na vosavinakataki iko niʼu sa bula tiko: kaʼu na laveta cake na ligaqu e na yacamu.

5Ena mamau na yaloqu me vaka e na uto ni sui kei na uro, ena vakavinavinaka talega na gusuqu e na tebenigusumu e rereki tiko.

6Niʼu sa nanumi iko e noqui mocemoce, ka vakanananu vei iko e na veitiki ni bogi.

7E na vuku ni ko a dauvukei au, kaʼu na rekitaka kina na yaloyalo ni tabamu.

8Sa cici matua na yaloqu niʼu muri iko: sa tokoni au na ligamu i matau.

9Ia ko ira era qara na yaloqu me vakarusa, era na lako sobu ki na tikina e ruku i vuravura.

10Era na bale e nai seleiwau: era na kedrai votavota na fokise.

11Ia na tui ena reki tiko e na Kalou: era na marau tiko ko ira yadua sa vosa vavakini vua: ia ena vagalutaki na gusudra na vosa lasu.