Meke 62 - AI VOLA TABU（FIJ1864）

Sa vakararavi tabakidua vua na Kalou ke Tevita, 1-7. Sa vakaroti ira na tamata kecega me ra vakararavi vua, 8-12.Vua na Domo-ni-meke, vei ira na Jetucuni. A Meke i Tevita.

1SA wawa tikoga na yaloqu vua na Kalou: vei koya ga kaʼu na vakabulai kina.

2O koya ga na noqu uluvatu kei na noqui vakabula; na noqui vakaruru ko koya; kaʼu na sega ni yavalati vakalevu.

3A cava na kena dede ni dou na nanuma tiko na ka ca me vakayacora vua na tamata? dou na moku koi kemudou kecega: dou na vaka na bai vatu sa vakalakala tu, kei na bai kau sa yavala toka.

4Era bose ga me ra vakasivoki koya mai na nona ka vakaturaga: era marautaka na ka lasu: era vosa vakavinavinaka e gusudra, a ra sa ruru ga e lomadra. Sela.

5Na yaloqu, mo wawa tikoga vua na Kalou; ni sa mai vua ga na ka kaʼu namaka tiko.

6O koya duaduaga na noqu uluvatu, kei na noqui vakabula: na noqui drodro ko koya; kaʼu na sega ni yavalati.

7Sa mai vua na Kalou na noqu bula kei na noqu vakarokoroko: na noqu uluvatu kaukauwa, kei na noqui drodro na Kalou.

8Dou vakararavi vua e na veisiga kecega; oi kemudou na tamata, dou sova yani na lomamudou e matana: sa nodai drodro na Kalou. Sela.

9E dina ni ra ka walega na tamata kaisi, a ra sa ka lasu na tamata turaga: kevaka era sa vakarauti, era tautauvata ni ra ka mamada vakaidina sara.

10Dou kakua ni vakararavi e nai valavala vakausausa, ka kakua ni viavialevu e na daubutako: kevaka sa tubu nai yau, dou kakua ni daunanuma kina.

11Sa vosa vakadua na Kalou; io, e rua na ka kaʼu sa rogoca; ni sa nona na Kalou na kaukauwa;

12a sa nomu talega, Turaga, na yalololoma: ni ko sa solia vei ira na tamata yadua me vaka na nodrai valavala.