Meke 60 - AI VOLA TABU（FIJ1864）

Sa masu rua na Kalou me oti na nona cudruvi ira, 1-4; a sa cavuta na nona vosa ni yalayala, 5-8; kei na nodra vakararavi kina, 9-12.Vua na Domo-ni-meke e na Susani-ituca. Ai vola i Tevita, me vakavuvuli; ni sa kabai ko Mesopotemia kei Siria-sopa, ni sa lesu mai ko Joape ka vakamatei ira na kai Itomi e tinikarua na udolu e na buca ni masima.

1O IKO, na Kalou, ko sa biuti keimami, o sa dui vakasevi keimami, o a cudru: mo lesu tale mai vei keimami.

2O sa cakavi vuravura me sautaninini; o sa basuka: mo Vakabula na veitikina sa ca; ni sa veitosoyaki.

3O sa vakatakila na ka rarawa vei ira na nomu tamata; o sa vagunuvi keimami e na waini keimami yatayata kina.

4O sa solia na drotini vei ira era sa rerevaki iko, me cevuya e na vuku ni nomu yalodina. Sela.

5Me vakabulai kina ko koya ko sa lomana; mo vakabulai au e na ligamu i matau, ka rogoci au.

6Sa vosa oti na Kalou e nona yalosavasava; au na rekitaka; au na votai Sikemi, ka vakarauta na buca mai Sukoci.

7Sa noqu ko Kiliati, a sa noqu ko Manase; ai vakaruru ni uluqu ko Ifireimi; a noqu tamata daulewa ko Juta;

8a noqui silisili ko Moapi; o Itomi, kaʼu na viritaka vua na noqui vava: o Filisitia, mo ia na tama kivei au.

9O cei ena kauti au ki na koro kaukauwa? o cei ena tuberi au cake ki Itomi?

10O iko, Kalou, se segai, o iko ka sa biuti keimami? ia ko iko, Kalou, ka sa sega ni lako yani kei ira na neimami valu?

11Mo vukei keimami mai na ka rarawa; ni sa ka walega na nodra veivuke na tamata.

12E na vuku ni Kalou eda na gugumatua: ni sai koya ga ena buturaka sobu na noda meca.